فوتو:gov.kz
كوكتەمگى سۋ تاسقىنى كەزىندە وبلىستىڭ اتباسار, استراحان, ەسىل, تسەلينوگراد, بۇلاندى, ارشالى اۋداندارىنداعى بىرقاتار ءبىلىم وشاعى زارداپ شەككەن بولاتىن. ىلە وقۋ ۇدەرىسى ونلاين جۇرگىزىلدى. بيىل ۇلتتىق بىرىڭعاي تەستىلەۋدە وسى جاعداي ەسكەرىلىپ, تۇلەكتەردىڭ دايىندالۋىنا ۋاقىت بەرىلدى. اتا-انالاردىڭ پىكىرىنشە, بۇل – تۇلەكتەرگە جاسالعان ءتاپ-ءتاۋىر قامقورلىق.
«ۇلتتىق بىرىڭعاي تەستىلەۋ مەرزىمىنىڭ ۇزارتىلۋى جاقسى بولدى», دەيدى اتباسار اۋدانىنىڭ تۇرعىنى نۇرلان الپىسباەۆ. – بۇل شەشىمدى ەڭ الدىمەن تۇلەكتەرگە جاسالىپ وتىرعان جاناشىرلىق دەپ قابىلداۋىمىز كەرەك. اتا-انالار ارقاشان بالالارىنىڭ بولاشاعىن ويلايدى ەمەس پە؟»
ۇلتتىق بىرىڭعاي تەستىلەۋگە ءوتىنىش بەرگەندەردىڭ ءبىلىمىن قاپىسىز ساراپقا سالۋعا بارلىق جاعداي جاسالعان. تۇلەكتەردى تاسىمالدايتىن كولىك, جاتىن جەرلەرى تالاپقا ساي.
«سۋ تاسقىنىنان زارداپ شەككەن اتباسار اۋدانىنىڭ تۇلەكتەرىنەن ۇلتتىق بىرىڭعاي تەست تاپسىرۋعا 1566 ءوتىنىش ءتۇستى», دەيدى كوكشەتاۋ قالاسىنىڭ ۇلتتىق تەستىلەۋ ورتالىعى فيليالىنىڭ جەتەكشىسى قۋانىش مۇحامەدجانوۆ. – ال كوكشەتاۋ قالاسىنان 6139 ءوتىنىش قابىلداندى. اقمولا وبلىسىندا اتالعان وڭىرلەردە تىركەلۋ مەرزىمى ۇزارتىلدى. ۇلتتىق بىرىڭعاي تەستىلەۋ 3 ماۋسىم – 12 شىلدە ارالىعىندا وتكىزىلەدى.
فيليال جەتەكشىسىنىڭ ايتۋىنا قاراعاندا, جاۋاپتى ناۋقان ۇتىمدى ۇيىمداستىرىلىپ وتىر. ەلوردا ىرگەسىندەگى سۋ تاسقىنىنان زارداپ شەككەن ءبىلىم وشاقتارىنىڭ تۇلەكتەرى ۇلتتىق بىرىڭعاي تەستىلەۋدى استانا قالاسىندا تاپسىرماق. تاعى ءبىر ايتا كەتەتىنى – عىلىم جانە جوعارى ءبىلىم مينيسترلىگىنىڭ شەشىمىمەن 2024 جىلى تالاپكەرلەر نەگىزگى ۇلتتىق بىرىڭعاي تەستىنى ەكى رەت تاپسىرىپ, ەڭ ۇزدىك ناتيجەسىمەن گرانت كونكۋرسىنا قاتىسا الادى.
اقمولا وبلىسى
