قوستانايدا جاسوتاندىقتار سوعىس ارداگەرلەرىنە كومەككە باردى

قوستاناي. 16 قاڭتار. «نۇر وتان» پارتياسى قوستاناي وبىلستىق فيليالى «جاس وتان» جاستار قاناتىنىڭ ەرىكتىلەرى بوراننان كەيىن ارداگەرلەر ءۇيىن قاردان تازارتۋعا باردى. بۇل تۋرالى egemen.kz حابارلادى. «جاستار - وتانعا!» پارتيا جوباسى اياسىندا ارداگەرلەرگە قامقورلىق كورسەتىپ كەلە جاتقان ەرىكتىلەر فەدور پاۆلوۆيچ مەلنيكوۆ قاريانىڭ اۋلاسىن قاردان تازالادى. ءۇرىپ جاۋعان قار ءۇيىن كومىپ قالعان قارت ءۇشىن بۇل كۇتپەگەن سىي بولدى. ويتكەنى اۋلانى قاردان تازالاۋ 91 جاستاعى كىسى ءۇشىن وتە اۋىر جۇمىس ەدى. ونىمەن بىرگە تۇراتىن جۇبايى دا, قىزى دا جاستاردىڭ بۇل كومەگىنە شەكسىز ريزاشىلىق ءبىلدىردى. ال مەديتسينالىق كوللەدجدىڭ ستۋدەنتتەرى ارداگەردىڭ دەنساۋلىعىن تەكسەردى. فەدور مەلنيكوۆ 1943 جىلى 17 جاسىندا قىزىل اسكەر قاتارىنا شاقىرىلىپ, ەكىنشى ۋكراينا مايدانىندا سوعىستى. سوعىستان كەيىن 1947 جىلى قورعان وبلىسىنان قوستاناي وبلىسى مەندىقارا اۋدانىنىڭ قاراتال اۋىلىنا قونىس اۋدارعان. سول ۋاقىتتا تراكتورشى-مەحانيزاتور بولىپ ەڭبەك ەتتى. 1981 جىلى زەينەتكە شىعىپ, قوستاناي قالاسىنا كوشىپ كەلدى. ۇلى وتان سوعىسىنىڭ ارداگەرى فەدور مەلنيكوۆ: «مەن حاركوۆ جانىنداعى چۋگۋن قالاسىن ازات ەتۋگە قاتىسىپ, دنەپر وزەنىنە دەيىن جەتتىم. سۇراپىل ۇرىستا جارالانىپ, گوسپيتالعا ءتۇستىم. «ۋكراينانى ازات ەتكەنى ءۇشىن», «ەرلىگى ءۇشىن» جانە تاعى باسقا مەدالدەرىم بار. سول سۇراپىل كەزدى ەسكە العىم كەلمەيدى. ءاردايىم جەر بەتىندە بەيبىتشىلىك پەن تىنىشتىق بولسىن دەپ تىلەيمىن», – دەيدى. مەديتسينالىق كوللەدج ستۋدەنتتەرى قاريانىڭ دەنساۋلىعىن قاراپ, قان قىسىمىن, قانداعى حولەستەرين مولشەرىن تەكسەردى. جاسوتاندىقتار ءاردايىم قارتتارعا, ۇلى وتان سوعىسىنىڭ جانە تىل ارداگەرلەرىنە كوڭىل ءبولىپ كەلەدى. ولار قارتتاردى قۇرمەتتەپ, ۇرپاقتار اراسىنداعى ساباقتاستىقتى جالعاۋدى ادەتكە اينالدىرعان. «جاس وتان» جاستار قاناتىنىڭ جوبا ۇيلەستىرۋشىسى ماۋلەن ورداباەۆ: «بۇگىن «جاستار – وتانعا!» جوباسى اياسىندا قوستاناي وبلىسى بويىنشا بارلىق اۋدان مەن قالالاردا ەرىكتىلەر ارداگەرلەرگە قار تازالاۋعا كومەكتەسۋدە. بۇل شارا قىستىڭ سوڭىنا دەيىن جالعاسادى. ءبىز اپتا سايىن ولارعا حابارلاسىپ, حال-جاعدايلارىن ءبىلىپ تۇرامىز», – دەيدى. ءنازيرا جارىمبەتوۆا. دەرەك, سۋرەت: egemen.kz.