ەكى كەزەڭنەن تۇرعان بايقاۋدىڭ ءبىرىنشى بولىگىندە جاس اقىندار رامىزدەرگە ارنالعان, ۇلتتىق رۋحتى قاستەرلەۋ مەن وتاندى ءسۇيۋ تاقىرىبىنداعى پاتريوتتىق ولەڭدەرىن كوپشىلىك الدىندا وقىپ, سىنعا ءتۇستى. ەكىنشى كەزەڭدە ەركىن تاقىرىپتاعى جىرلارىن تالقىعا سالدى.
ءوزارا باسەكەدە جاستار اراسىنان سۋىرىلىپ شىققان شاكارىم ۋنيۆەرسيتەتىنىڭ ستۋدەنتتەرى ۇلان نۇربول, مەرەي تۇراربەك, سونداي-اق ءاليحان بوكەيحان ۋنيۆەرسيتەتىنىڭ ستۋدەنتى اقگۇل سەرىكقىزى ۇيىمداستىرۋشىلار تاراپىنان جىر بايگەسىنىڭ ارنايى جۇلدەسىنە يە بولدى. بايقاۋ قورتىندىسى بويىنشا ازامات سەرىك ۇلى 3-ورىندى قاناعات تۇتسا, 2-ورىننىڭ جۇلدەسى ميراس زەكەنوۆكە بۇيىردى. ءبىرىنشى ورىندى باعجان كارىپباەۆا يەلەندى.
«بايقاۋدىڭ باستى ماقساتى – 25 جاسقا دەيىنگى جاستاردى جارىسقا قاتىستىرا وتىرىپ, بۇگىنگى زاماننىڭ پاتريوتتىق جىرلارىن كوپشىلىككە تانىستىرۋ, جاس ونەرپازداردىڭ ولەڭدەرى ارقىلى ۇلتتىق ناقىشتى ەلىمىزدىڭ رامىزدەرىن ناسيحاتتاۋ», دەيدى ءىس-شارانى ۇيىمداستىرۋشىلاردىڭ ءبىرى اباي جاستارى رەسۋرستىق ورتالىعىنىڭ ءبولىم باسشىسى ەرسىنبەك ورلەۋبەك.
وبلىس اۋماعىندا رامىزدەر كۇنىنە وراي بارلىق اۋدان تۇرعىندارىنىڭ قاتىسۋىمەن مەملەكەتتىك تۋدى كوتەرۋ ءراسىمى وتكىزىلىپ, جينالعان كوپشىلىك مەملەكەتتىك ءانۇراندى ءبىر ۋاقىتتا شىرقادى. سەمەي, كۋرچاتوۆ قالالارى مەن جارما اۋدانىنىڭ جاستارى ۆەلوشەرۋگە قاتىسسا, اباي, بەسقاراعاي, بورودۋليحا اۋداندارىندا ەل مەرەيىن اسقاقتاتىپ اۆتوشەرۋ ۇيىمداستىرىلدى. شەرۋگە قاتىسۋشىلار ءبىر مەزەتتە تۋ كوتەرۋ ءىس-شاراسىنا قاتىسىپ, ەل رۋحىن كوتەرەتىن ءانۇراندى قوسىلىپ ورىندادى.
سونىمەن بىرگە سەمەي ونەرپازدارى كەشكىلىك قالا تۇرعىندارى مەن مەيماندارىنا پاتريوتتىق اندەردەن شاشۋ شاشىپ, كوتسەرتتىك باعدارلاما ۇسىندى.
اباي وبلىسى
