ەل اراسىندا «اكەمتەاتر» اتىمەن تانىمال م.اۋەزوۆ اتىنداعى قازاق ۇلتتىق دراما تەاترى كەلە جاتقان 100 جىلدىق مەرەيتويىنا وراي ونەر ساپارىنا شىققان.
– شىعىس قازاقستانعا بەس كۇندىك ساپارمەن كەلدىك. 2026 جىلى مۇحتار اۋەزوۆ اتىنداعى قازاق ۇلتتىق دراما تەاترىنىڭ ءجۇز جىلدىعى. سوعان وراي ءار قالاعا رۋحاني ساپار جاساپ, رەپەرتۋارىمىزداعى قويىلىمداردى كورەرمەنگە ۇسىنىپ ءجۇرمىز. وسكەمەندىكتەرگە «قوزى كورپەش-بايان سۇلۋ» ماحاببات داستانى, «بەس بويداققا ءبىر توي» سىندى قويىلىمدار ۇسىنىلادى, – دەگەن مۇحتار اۋەزوۆ اتىنداعى قازاق ۇلتتىق دراما تەاترىنىڭ ديرەكتورى ەركىن تىلەۋقۇل ۇلى.
بارلىق قويىلىم انشلاگپەن ءوتتى. قۇشاقتارىن گۇلگە تولتىرىپ, تەاترعا اسىققان ەلدە ەسەپ جوق ەدى, راس. العاشقى كۇنى عابيت مۇسىرەپوۆتىڭ «قوزى كورپەش–بايان سۇلۋ» ماحاببات داستانىمەن ساحنا شىمىلدىعى اشىلدى. كورەرمەندەر ونەر كەرۋەنىن ەرەكشە قوشەمەتپەن قارسى الدى.
– شىنى كەرەك, «قوزى كورپەش – بايان سۇلۋ» داستانىن وقىعانىممەن, قويىلىمىن ءبىرىنشى رەت كوردىم. اكتەرلەر شەبەر ويناپ شىقتى. ءوزىم ساحنادا بىرگە جۇرگەندەي كۇي كەشتىم. وسىنداي قويىلىمداردى جاستارعا كورسەتۋ كەرەك, – دەيدى كورەرمەن ەركەبۇلان امىرەش.
ەرتەسى كوپشىلىك كورەرمەن دۋلات يسابەكوۆتىڭ ء«جۇز جىلدىق ماحاببات» دراماسىن تاماشالادى. ء«جۇز جىلدىق ماحاببات» قويىلىمى سىرشىل اقىن ماعجان جۇماباەۆقا ارناپ جازىلعانى بەلگىلى. سپەكتاكلدە اقىننىڭ جاستىق شاعى, البىرت سەزىمىنەن سىر شەرتىلەدى. ەكى اكتىلى قويىلىمدى حالىق تەبىرەنىپ, تولعانىپ وتىرىپ كوردى. قويىلىم اياقتالىپ, زالدا جارىق جانعان ساتتە كوز جاستارىن سىعىپ الىپ جاتقان كورەرمەندەردى دە كوز شالدى. ويتكەنى تاريحي قويىلىم عانا ەمەس, الاشتىڭ اۋىر تاعدىرىن سەزىندىردى.
– الەۋمەتتىك جەلىدەگى جىلت-جىلت ەتكەن دۇنيەگە اۋەس بولىپ بارا جاتىرمىز. وسىنداي سالماقتى رۋحاني دۇنيەنى كوبىرەك كورسەك شىركىن. كەشەگى ماعجان سەنگەن جاستار سەنىمدى اقتاۋى ءۇشىن كىتاپحانا, مۋزەي سياقتى رۋحاني ورتالىقتارعا كوپ بارۋىمىز كەرەك شىعار, – دەيدى قويىلىمنان وي ءتۇيىپ شىققان كورەرمەن ەرمەك احماديەۆ.
ءۇشىنشى كۇنى راحىمجان وتارباەۆتىڭ «قىتايدان جەتكەن سالەمدەمە» اتتى دراماسىن تاماشالاۋعا كەلگەن كورەرمەننىڭ دە قاراسى كوپ بولدى. شىمىلدىق ءتۇرىلدى. كورەرمەن بىردەن الماعايىپ زامانعا ەنىپ كەتكەندەي. جاس شاماسى الپىستى القىمداپ قالعان ءومىربايدىڭ الاڭسىز كوڭىلىن قىتايدان جەتكەن سالەمدەمە بۇزعان. سويتسە ول جاستىق شاعىندا ارعى بەتتە بالا-شاعاسىن تاستاپ, اكە-شەشەسىن الىپ, قازاقستانعا وتكەن ەكەن. قورقاقتىعى سول, شەكارا سىزىعىنا كەلگەندە, سوڭىنان قۋىپ جەتكەن ايەلىن تانىمايمىن دەپ, بەرگى بەتكە اسقان. قويىلىمدا مۇڭ دا, اڭساۋ دا, وكىنىش تە بار. وكىنىشتىسى, ءومىربايدىڭ ءبىر-اق اۋىز ءسوزى ەدى.
بۇل كۇنگى قويىلىم كورەرمەندى كۇڭىرەنتىپ جىبەرسە, كەلەسى قويىلىم كوڭىلدەرىن ءبىر سەرپىلتىپ تاستادى. قازاقستاننىڭ حالىق ءارتىسى ەسمۇحان وباەۆ قويعان يسرايل ساپاربايدىڭ «سىعان سەرەناداسى» ميۋزيكلى ساحنانى اۋەزدى انمەن تەربەدى. سوڭعى كۇنى «اكەمتەاتردىڭ» ارتىستەرى كورەرمەندى كۇلكىگە كومىپ كەتتى. بۇل كۇنى تىنىمباي نۇرماعامبەتوۆتىڭ رەجيسسەر ورازحان كەنەباەۆ قويعان «بەس بويداققا ءبىر توي» كومەدياسى ساحنالانعان. حالىقتىڭ كۇلكىگە قارق بولعانى سونداي, قويىلىم سوڭىندا توقتاۋسىز شاپالاق سوعىپ تۇرىپ الدى. بەلگىلى ءارتىس شىنار اسقاروۆا ايتقانداي, ساحنادا ويناپ جۇرگەن ارتىستەر دە كورەرمەن ىقىلاسىن سەزدى. ءيا, وسكەمەن – ءوندىرىستىڭ عانا ەمەس, ونەردىڭ قۇدىرەتىن ۇعىناتىن رۋحاني قالا.
وسكەمەن
