اباي وبلىسىندا ءبىر اپتا بۇرىن ءىز-ءتۇزسىز جوعالعان قىزدىڭ ءولى دەنەسى تابىلدى. 30 جاستاعى دينارا دوسىمبەكوۆانى ءولتىردى دەگەن كۇدىكپەن تۋعان اناسى قاماۋعا الىندى.
كتك ارناسى جازعانداي, مارقۇم 26 مامىر كۇنى جوعالىپ كەتكەن. ونىڭ ءىز-ءتۇزسىز جوعالعانىن ايتىپ اناسى پوليتسياعا ارىز ءتۇسىرىپتى. ءتىپتى اۋىلدان سەمەي قالاسىنا بارماق بولىپ, «قىزىم تاكسيگە ءمىنىپ كەتتى» دەپ وتىرىك ايتقان. الايدا شاھارداعى بەينەباقىلاۋ كامەرالارىن تۇگەل تەكسەرىپ, شارق-ۇرىپ ىزدەگەن پوليتسيا قىزمەتكەرلەرى دينارانى تاپپادى. تەك ءبىر اپتادان كەيىن ءوز قىزىن ءولتىرىپ, مۇردەسىن جاسىرىپ تاستادى دەگەن كۇدىكپەن تۋعان اناسى ۇستالدى.
قازىر قاندىقول ايەل قاماۋعا الىنىپ, تەرگەۋ جۇرگىزىلىپ جاتىر.
«پوليتسيا قىزمەتكەرلەرى قابىلداعان شارالاردىڭ ناتيجەسىندە 30 جاستاعى قىزدىڭ جوعالىپ كەتۋ ءمان-جايى انىقتالدى. كىسى ءولتىرۋ فاكتىسى بويىنشا سوتقا دەيىنگى تەرگەۋ باستالدى. كۇدىكتى ايەل قاماۋعا الىندى. تەرگەۋ جۇرگىزىلىپ جاتىر, ساراپتامالار تاعايىندالدى», – دەدى اباي وبلىسى پد باستىعىنىڭ ورىنباسارى ەلدوس زاكىموۆ.
