بۇل تۋرالى دينارا زاكيەۆا جەلى پاراقشاسىندا جازدى.
«اتالعان قىلمىس بويىنشا اقپان ايىنان باستاپ ىشكى ىستەر مينيسترلىگىمەن, باس پروكۋراتۋرا جانە شىمكەنت قالاسى بويىنشا بالالار ومبۋدسمەنىمەن بىرلەسىپ جۇمىس ىستەپ جاتىرمىز. بۇل جەردە كوپتەگەن سۇمدىق مالىمەتتەر بار. ۇلكەن بالانىڭ بەرگەن جاۋابىنا سايكەس, بالالارعا ءزار ىشكىزىپ, ءناجىس بەرگەن. ءىس سوتقا جىبەرىلدى»,-دەپ جازدى دينارا زاكيەۆا.
بۇدان وزگە ۇلكەن بالاعا مەملەكەتتەن بەرىلىپ كەلگەن جيناقتالعان قارجىسىنىڭ جۇمسالۋ دەرەگى بويىنشا دا تەرگەۋ جۇرگىزىلىپ جاتىر. بولجام بويىنشا ول قارجى بالانىڭ ءوزى باققان ەشكىنى ساتىپ الۋعا جۇمسالعان بولۋى مۇمكىن.
«بۇل رەتتە ۇلكەن بالانىڭ دەنەسىندەگى كوگەرگەن ىزدەردى كورگەن مەكتەپ مۇعالىمدەرىنە, سونداي-اق قورعانشىلىق ورگانىنا قويىلار سۇراق كوپ. ولاردىڭ دا ۇستىنەن قىلمىستىق ءىس قوزعالىپ, تەرگەۋ ءجۇرىپ جاتىر»,-دەلىنگەن جازبادا.
شىمكەنتتەگى بۇل فاكت ەلىمىز بويىنشا سوڭعى بىرنەشە ايدا اسىراپ الىنعان بالالارعا قاتىستى جاسالىنعان ءتورتىنشى وقيعا بولىپ وتىر ەكەن.
بالالار ومبۋدسمەنىنىڭ دەرەگىنشە, ەلىمىزدە قامقورشىلىق ورگانى قىزمەتكەرلەرىنىڭ سانى بالا سانىنا شاققاندا وتە از. ماسەلەن, جىل باسىندا شىمكەنتتە 485 مىڭ بالاعا 5 قامقورشىلىق قىزمەتكەرى, ياعني ءبىر قىزمەتكەرگە 90 مىڭ بالادان كەلگەن. وعان قوسا بۇل قىزمەتكەرلەردىڭ الىپ وتىرعان جالاقىسى دا ماردىمسىز.
«قورعانشىلىق قىزمەتكەرلەرىنىڭ جەتىسپەۋشىلىگى ماسەلەسىن جۇيەلى شەشۋ ءۇشىن ءبىز بالالاردىڭ قۇقىقتارىن قورعاۋ كوميتەتىمەن جانە دەپۋتات يۋ.ۆ.كۋچينسكيمەن بىرلەسىپ, قورعانشىلىق جانە قامقورشىلىق جونىندەگى قىزمەتكەرلەردىڭ قۇزىرەتى مەن نورماتيۆتىك سانىنا قاتىستى زاڭعا وزگەرىس ەنگىزۋ بويىنشا تۇزەتۋلەر ەنگىزىپ, ۇسىنىس جولدادىق. بۇل تۇزەتۋلەر قازىرگى تاڭدا ۇكىمەتتىڭ قاراۋىندا», – دەپ جازدى دينارا زاكيەۆا.
اتالعان تۇزەتۋلەر قابىلدانسا, حالىقارالىق ستاندارتتارعا ساي 5 مىڭ بالاعا 1 قورعانشىلىق قىزمەتكەرى بەرىلەدى. ياعني, شىمكەنتتە 90 قىزمەتكەر بولادى. سونىمەن قاتار ولاردىڭ جالاقىسى 50 پايىزعا ارتادى.
وبلىستىق جانە رەسپۋبليكالىق ماڭىزى بار قالالارداعى اكىمدىكتەر قورعانشىلىق قىزمەتكەرلەرى سانىن كوبەيتۋ ماسەلەسىن قولدايتىنىن جازباشا راستاعان. ال جالاقىنى كوبەيتۋدى ءۇش وڭىردەن باسقا اكىمدىكتەر قولداپ وتىر. قازىرگى تاڭدا كەلىسىمىن بەرمەگەن جەرگىلىكتى اتقارۋشى ورگاندارمەن جۇمىس جۇرگىزىلىپ جاتىر.
ەسكە سالساق, ءبىز بۇعان دەيىن شىمكەنتتە التى بالانى اسىراپ العان ەر كىسى ولاردى ابدەن قيناپ, ازاپتاپ كەلگەنى تۋرالى اقپارات تاراعان. بالالاردىڭ ايتۋىنشا, ەر ادام ولاردى جۇمىسقا جەگىپ, جۋىندىرماي, اياق-قولىن بايلاپ ۇستاعان. ءتىپتى يت پەن مىسىق سويىپ, سولاردىڭ ەتىن بەرگەن.
