فرانتسيا استاناسىنداعى جارىس جەرلەستەرىمىز ءۇشىن كوڭىلسىزدەۋ باستالدى. ىرىكتەۋ تۋرنيرىنەن ىركىلمەي ءوتىپ, مىقتىلارمەن كۇش سىناسۋ قۇرمەتىنە يە بولعان ميحايل كۋكۋشكين (الەمنىڭ 135-راكەتكاسى) تۇساۋكەسەر كەزدەسۋىندە ماجارستاندىق فابيان ماروجانعا (№43) ەسە جىبەردى – 2:6, 2:6, 3:6. ەسەسىنە ودان كەيىن كورتقا شىققان وتانداستارىمىزدىڭ بارلىعى دا باستاپقى باسەكەلەرىندە باسىمدىق تانىتتى. اتاپ ايتساق, الەكساندر شەۆچەنكو (№58) رەسەيلىك اسلان كاراتسەۆپەن (№82) كۇش سىناستى. وسىدان ءۇش جىل بۇرىن سولتۇستىك وسەتيانىڭ تۋماسى مەلبۋرندەگى دودانىڭ جارتىلاي فينالىنا دەيىن جەتكەن ەدى. كەيىنگى كەزدە كارتسەۆ قارقىنىن ءبىراز باسەڭدەتىپ الدى. ۇزاق ۋاقىت بويى تارازى باسى تەڭسەلىپ تۇرعان تارتىس شەۆچەنكونىڭ پايداسىنا شەشىلدى – 6:4, 4:6, 1:6, 6:1, 6:4. ال الەكساندر بۋبليك (№17) فرانتسيالىق گرەگۋار باررەردەن ايلاسىن اسىردى – 6:4, 7:5, 6:3.
قازاقستاننىڭ ۇزدىگى ەلەنا رىباكينا (№4) گرەت ميننەنمەن شەبەرلىك بايقاستى. الەمدىك رەيتينگتە 86-ورىندا تۇرعان بەلگيالىق بۇرىمدىنىڭ باعىندىرعان پالەندەي بەلەستەرى جوق. سول سەبەپتى دە رىباكيناعا قارسىلاسىن قاپى قالدىرۋ ەش قيىندىق تۋعىزبادى – 6:2, 6:3. ەلىمىزدىڭ ەكىنشى راكەتكاسى يۋليا پۋتينتسەۆا (№39) سلوان ستيۆەنسپەن سايىسقا ءتۇستى. قازىرگى كەزدە WTA رەيتينگىندە 45-ساتىعا جايعاسقان 31 جاستاعى اقش تەننيسشىسى كەزىندە ۇزدىكتەر تىزىمىندە ءۇشىنشى ورىنعا دەيىن كوتەرىلگەن. ول 2017 جىل US open تۋرنيرىندە توپ جارىپ, 2018 جىلى رولان گارروستىڭ اقتىق سىنىندا وينادى. اۋستراليانىڭ اشىق بىرىنشىلىگىنىڭ جارتىلاي فينالىنا دەيىن جەتتى. بىراق وسى جولى ستيۆەنستىڭ جۇلدىزدى ساتتەرى ارتتا قالعانىنا انىق كوز جەتكىزدىك. امەريكالىق تەننيسشى پۋتينتسەۆاعا جارىتىپ قارسىلىق كورسەتە المادى – 1:6, 2:6.
ەكىنشى كەزەڭدە ەلەنا رىباكينا نيدەرلاندتىق ارانتا رۋسپەن شەبەرلىك بايقاستى. قىزعالداقتار ەلىنەن كەلگەن 33 جاستاعى سپورتشىنىڭ ەڭ ۇزدىك كورسەتكىشى – وسىدان 12 جىل بۇرىن «رولان گارروستىڭ» ءتورتىنشى كەزەڭىندە ونەر كورسەتكەن. قازىرگى كەزدە ول ۇزدىكتەر تىزىمىندە 56-ساتىعا جايعاستى. پاريجدەگى تۋرنيرگە ارانتانىڭ جاقسى دايارلىقپەن كەلگەنى بىردەن بايقالدى. تۇساۋكەسەر كەزدەسۋىندە نيدەرلاندتىڭ ويىنشىسى گەرمانيانىڭ اتاقتى تەننيسشىسى, الەمنىڭ بۇرىنعى ءبىرىنشى راكەتكاسى انجەليكا كەربەردىڭ ءوزىن قاپى قالدىردى. بىراق رىباكينا ودان مىقتى ەكەنىن تايعا تاڭبا باسقانداي ەتىپ دالەلدەدى – 6:3, 6:4.
يۋليا پۋتينتسەۆا يسپانيالىق پاۋلا بادوسامەن كەزدەستى. پيرەنەي تۇبەگىنىڭ وكىلى وسىدان ءۇش جىل بۇرىن ءدال وسى ءتۋرنيردىڭ شيرەك فينالىندا وينادى. 2021 جىلى «ۋيمبلدون» مەن 2022 جىلى اۋستراليانىڭ اشىق بىرىنشىلىگىنىڭ ءتورتىنشى اينالىمىنا دەيىن جەتتى. سول تابىستارى ارقىلى الەمنىڭ ەكىنشى راكەتكاسى اتاندى. كەيىنگى ۋاقىتتا قارقىنىن قاتتى باسەڭدەتىپ العان بادوسا WTA رەيتينگىندە 124-ورىندى قاناعات تۇتىپ تۇر. دەسەك تە پۋتينتسەۆاعا قارسى كەزدەسۋدە وتە ساۋاتتى ءارى جيناقى ويناعان يسپانيانىڭ وكىلى 4:6, 6:1, 7:5 ەسەبىمەن جەڭىسكە جەتتى.
الەكساندر شەۆچەنكو فرانتسيالىق كورەنتەن مۋتەمەن كۇش سىناستى. كورت قوجايىنى اتر رەيتينگىندە 75-ورىندا تۇر. بۇل باسەكەدە مۋتۋ باسىم ءتۇستى – 4:6, 2:6, 6:0, 3:6. الەكساندر بۋبليك گەرمانيالىق يان-لەننارد شترۋففپەن ايقاستى. 25 جاستاعى نەمىس ويىنشىسى 2019 جانە 2021 جىلدارى «رولان گارروستىڭ» ءتورتىنشى اينالىمىندا سۇرىنگەن. بۇل كۇندەرى ول – WTA تىزىمىندە 39-ورىندا. بۇل ويىندا شترۋففتىڭ مىسى باسىم بولدى – 2:6, 2:6, 3:6. ءسويتىپ, جارىس جولىندا قازاقستاننىڭ ءبىر عانا تەننيسشىسى قالدى. ول – ەلەنا رىباكينا. ەندى وتانداسىمىز بەلگيالىق ەلينە مەرتەنسپەن كەزدەسەدى.
وسىدان ءبىر اپتا بۇرىن «رولان گارروستا» كىمنىڭ باعى جانادى؟» دەگەن ماقالاسىندا وسى ءتۋرنيردىڭ رەكوردشىسى رافاەل نادال جايىندا ءبىراز اڭگىمەلەدىك. ستاتيستيكالىق دەرەكتەرگە سۇيەنسەك, 2005-2022 جىلدار ارالىعىندا ول پاريجدەگى جارىسقا 18 مارتە قاتىسىپ, 13 رەت باس جۇلدەنى ولجالادى. بارلىعى 116 مارتە كورتقا شىعىپ, 112 رەت جەڭىس تويىن تويلادى. بۇل – كەرەمەت كورسەتكىش. وسىنداي زور تابىسىنىڭ ارقاسىندا رافاەل «گرۋنت كورولى» دەگەن اتاققا يە بولدى. مىنە, سول يسپانيانىڭ داڭقتى تەننيسشىسى بيىلعى «رولان گارروستىڭ» العاشقى اينالىمىنان اسا المادى. 37 جاستاعى ءنادالدى 27 جاستاعى نەمىس ويىنشىسى الەكساندر زۆەرەۆ توقتاتتى. ەسەپ – 6:3, 7:6, 6:3.
رافاەل نادالمەن تۇيدەي قۇرداس ۇلىبريتانيالىق ەندي ماررەي دە ءبىرىنشى كەزدەسۋىندە جەڭىلىستىڭ كەرمەك ءدامىن تاتتى. كەزىندە ۋيمبلدون مەن وليمپيادانى ەكى جانە US وpen دوداسىن ءبىر مارتە ۇتىپ, اۋستراليانىڭ اشىق بىرىنشىلىگىنىڭ فينالىندا بەس رەت ويناعان الەمنىڭ بۇرىنعى ءبىرىنشى راكەتكاسى جاسى 40-قا تاياپ قالعان ستەن ۆاۆرينكاعا جول بەردى – 4:6, 4:6, 2:6. دەسەك تە شۆەيتساريا تەننيسشىسىن دە وسال دەپ ايتا المايمىز. ءداۋىرى ءجۇرىپ تۇرعان كەزىندە ۆاۆرينكا «ۇلكەن دۋلىعا» ساناتىنا جاتاتىن مەلبۋرن, پاريج جانە نيۋ-يوركتەگى تۋرنيرلەردە توپ جارعانىن جانكۇيەرلەر جاقسى بىلەدى.
