فوتو: اقوردا ءباسپاسوز قىزمەتى
«بىزگە ەكونوميكامىزدىڭ اسا ماڭىزدى سالالارى ءۇشىن يننوۆاتسيالىق جوبالار مەن ۇتقىر شەشىمدەر قاجەت. ەڭ الدىمەن, قوعامداعى بارلىق ۇدەرىستەر مەن سالالاردى ودان ءارى تسيفرلاندىرۋعا نازار اۋدارۋ كەرەك. بۇل ورايدا جاس عالىمداردىڭ, ينجەنەرلەر مەن كاسىپكەرلەردىڭ الەۋەتىن بىرىكتىرۋ ماڭىزدى ءرول اتقارادى», دەدى پرەزيدەنت جيىن بارىسىندا.
مەملەكەت باسشىسىنىڭ سوزىنشە, قازاقستان وز مۇمكىندىگىن ءمۇلت جىبەرمەي, الەمدىك تەحنولوگيالىق باسەكەدەگى پوزيتسياسىن نىق ورناتۋ كەرەك.
«بىلىمگە نەگىزدەلگەن ەكونوميكا جوعارى تەحنولوگيالىق بيزنەس تۋرالى پىكىرىمىزدى تۇبەگەيلى وزگەرتتى. بۇگىندە وراسان زور كاپيتال نەمەسە قىزمەتكەرلەردىڭ كوپتىگى ەمەس, بىرەگەي يدەيالاردى تۋدىرىپ, ولاردى جۇزەگە اسىرا ءبىلۋ قابىلەتى باستى ارتىقشىلىق سانالادى. ال ول جاستاردىڭ, وزگەرىستەردەن قورىقپايتىن تاباندى ءارى باتىل ادامداردىڭ, سونىڭ ىشىندە عالىمداردىڭ قولىنان كەلەدى. الەمدەگى Google, Microsoft, Apple سياقتى كوپتەگەن تەحنولوگيالىق الپاۋىتتاردىڭ نەگىزىن ستۋدەنتتەر قالاعان. ءبىزدىڭ ەلىمىزدە دە تالانتتى كوماندالار پايدا بولادى جانە ولار جاھاندىق نارىقتا كوش باستايتىن IT-كومپانيالار قۇرادى دەپ سەنەمىن. ءوز مۇمكىندىگىمىزدى ءمۇلت جىبەرمەي, الەمدىك تەحنولوگيالىق باسەكەدەگى پوزيتسيامىزدى نىقتاي ءتۇسۋ قاجەت», دەپ ءتۇسىندىردى قاسىم-جومارت توقاەۆ.
ودان بولەك, پرەزيدەنت ەلىمىزدە جاساندى ينتەللەكتىنى دامىتۋعا قولايلى جاعداي جاساۋ قاجەت ەكەنىن تىلگە تيەك ەتتى.
«قارجى تەحنولوگياسى مەن ەلەكتروندى ۇكىمەت سالالارىن دامىتۋدا ايتارلىقتاي ىلگەرىلەدىك. الايدا مۇنىمەن توقتاپ قالۋعا بولمايدى. قازاقستان ەۋرازياداعى ەڭ ءىرى تسيفرلىق حابتاردىڭ بىرىنە اينالۋعا ءتيىس. وعان ەلىمىزدىڭ الەۋەتى تولىق جەتەدى. ماقساتقا جەتۋ ءۇشىن جاساندى ينتەللەكتىنى بارلىق سالاعا جىلدام ەنگىزۋ قاجەت. قازىر الەم ەكونوميكاسىنداعى وزىق تەحنولوگيالاردىڭ ۇلەسى ارتىپ كەلەدى. ساراپشىلار ونىڭ كولەمى 2030 جىلعا قاراي 16 تريلليون دوللارعا جەتەدى دەپ بولجاپ وتىر. ءبىز وسى كوشتىڭ باسىندا بولۋىمىز كەرەك. ول ءۇشىن جاساندى ينتەللەكتىنى دامىتۋعا تەزىرەك قولايلى جاعداي جاساعانىمىز دۇرىس. بۇل قادام ەكونوميكانى ورنىقتى دامىتۋعا تىكەلەي اسەر ەتەدى. سونداي-اق ەلىمىزدىڭ تەحنولوگيالىق تاۋەلسىزدىگىن ساقتاۋعا ىقپالىن تيگىزەدى», دەدى مەملەكەت باسشىسى.
ايتا كەتسەك, قازىر وسى سالانىڭ ينفراقۇرىلىمىن دامىتۋ ءۇشىن ناقتى ءىس-شارالار كەشەنى قولعا الىندى. ماسەلەن, سۋپەركومپيۋتەر جاساۋعا قاتىستى جۇمىس جۇرگىزىلىپ جاتىر. بولاشاقتا مەملەكەتتىك ورگاندارمەن قاتار, عىلىمي قاۋىمداستىق پەن بيزنەس تە ونىڭ يگىلىگىن كورەدى دەگەن جاعىمدى بولجام بار. الايدا جاساندى ينتەللەكتىنى دامىتۋ ىسىندە ەلدىڭ كادرلىق الەۋەتى ماڭىزدى ءرول اتقارادى. وسى ورايدا پرەزيدەنت بىلىكتى مامانداردىڭ قاتارىن كوبەيتۋ قاجەت ەكەنىن ايتتى.
«جوعارى وقۋ ورىندارى بۇل جۇمىسپەن مىقتاپ اينالىسۋى قاجەت. بۇگىندە الەمنىڭ جەتەكشى ۋنيۆەرسيتەتتەرىنىڭ ءبىلىم بەرۋ ۇدەرىسىندە پراكتيكاعا باسىمدىق بەرىلەدى جانە ستۋدەنتتەردىڭ جاڭاشىلدىققا ۇمتىلىپ, ستارتاپتار ازىرلەۋىنە جاعداي جاسالعان. ەلىمىزدىڭ وقۋ ورىندارى وسىنداي ادىستەن ۇلگى الۋى كەرەك دەپ ويلايمىن. اسىرەسە, ماشينالىق ۇيرەتۋدى دامىتۋ ماڭىزدى. بۇل ساراپتاما جاساۋ جانە مۇقيات پىسىقتالعان شارالار قابىلداۋ ءۇشىن وزىق تاسىلدەردى يگەرۋگە ىقپال ەتەدى. بىراق اتالعان تەحنولوگيانى كەڭ كولەمدە ەنگىزۋمەن قاتار مۇقيات زەردەلەۋدى جانە جاۋاپكەرشىلىكتى قاجەت ەتەتىن جاڭا سىن-قاتەرلەر دە پايدا بولادى. ەڭ الدىمەن, جاساندى ينتەللەكتىنى دامىتۋ, قولدانۋ ىسىندە اشىقتىق پەن ەتيكاعا ساي بولۋ ماسەلەلەرىنە باسا ءمان بەرگەن ءجون», دەدى قاسىم-جومارت توقاەۆ.
مەملەكەت باسشىسى ءوز سوزىندە كيبەرقاۋىپسىزدىك سالاسىندا دا بىلىكتى مامان دايارلاپ, وزىق زەرتتەۋ جۇمىستارىن جۇرگىزۋ قاجەت ەكەنىن قوسا ايتتى.
«دەرەكتەردىڭ تاراپ كەتۋى ءوز الدىنا بولەك قاۋىپ. تسيفرلاندىرۋ داۋىرىندە مالىمەتتەر ساف «التىنعا» اينالادى. سوندىقتان ولاردى تولىققاندى قورعاۋ ماسەلەسىنىڭ ماڭىزى زور. بۇگىننەن باستاپ كيبەرقاۋىپسىزدىك سالاسىندا مامان دايارلاپ, وزىق زەرتتەۋ جۇمىستارىن جۇرگىزۋ قاجەت. جالپى قازىر كوز الدىمىزدا الەمدىك ەكونوميكادا تەحنولوگيالىق تۇرعىدان ايتارلىقتاي وزگەرىستەر ورىن الىپ جاتىر. عالامدىق دەڭگەيدە ەنەرگيانىڭ جاڭارتىلاتىن جانە بالامالى تۇرلەرىن كوبىرەك پايدالانۋعا نەگىزدەلگەن قۋات كوزىنە كوشۋ قارقىن الدى», دەپ قوستى پرەزيدەنت.
