فوتو: اقوردا ءباسپاسوز قىزمەتى
«كەزىندە شوقان, اباي, ءاليحان, احمەت, قانىش سياقتى ارىستارىمىز زيالىلىعىمەن تالايدى تاڭعالدىرعان. وزگە جۇرتتىڭ قازاق تۋرالى پىكىرى وسىنداي تۇلعالارىمىز ارقىلى قالىپتاسقان. قازىر دە ءوزىنىڭ ءبىلىمى, ونەرى ارقىلى الەمدى مويىنداتىپ جۇرگەن جاستارىمىز از ەمەس. ولار كەز كەلگەن ءتىلدى تەز مەڭگەرىپ الادى. قانداي ورتاعا دا جىلدام بەيىمدەلەدى», دەدى پرەزيدەنت.
سونداي-اق مەملەكەت باسشىسى ءبىزدى الەم ەلدەرى كوزى اشىق, كوكىرەگى وياۋ حالىق رەتىندە تانيتىنىن, بىلىمپازدىق, ەڭبەكقورلىق, العىرلىق پەن جاسامپازدىق – قانىمىزعا سىڭگەن قاسيەت ەكەنىن, وسى قاسيەتتەرىمىزدى ءاردايىم ءتيىمدى پايدالانا ءبىلۋىمىز كەرەكتىگىن اتاپ ءوتتى.
ء«بىز قازىرگى زامانعى تەحنولوگيانى مەڭگەرگەن جاس عالىمدارعا زور ءۇمىت ارتامىز. جاستاردىڭ عىلىممەن اينالىسۋىنا بارىنشا جاعداي جاساپ جاتىرمىز. بيىل ۇلتتىق عىلىم اكادەمياسىنىڭ جانىنان جاس عالىمدار كەڭەسى قۇرىلدى. بۇل كەڭەس تالاپتى جاستاردىڭ باسىن قوسىپ, عىلىم جولىنا جۇمىلدىرادى دەپ سەنەمىن. شاكارىم «جاس كوڭىلدە جارىق بار» دەپ ايتقان. جاستارىمىز جاسامپاز جانە جاڭاشىل بولۋى كەرەك», دەدى قاسىم-جومارت توقاەۆ.
پرەزيدەنتتىڭ ايتۋىنشا, جاستىق شاق – ۋاقىتتى بوسقا وتكىزەتىن ەمەس, ەل ءۇشىن تاباندى قىزمەت ەتەتىن كەز. اكادەميك قانىش ساتباەۆتىڭ ءومىر جولى – وسىنىڭ جارقىن مىسالى. عۇلاما عالىم نەبارى 25 جاسىندا «الگەبرا» وقۋلىعىن جازۋعا كىرىسكەن. ال 30 جاس شاماسىندا جەزقازعانداعى كەن ورنىن اشقان.
«جاس عالىمدارىمىز تۋعان ەلىنە پايداسى تيەتىن جۇمىسپەن اينالىسقانى ءجون. ۇرپاقتىڭ ءبىلىمدى, وتانشىل, مەملەكەتشىل بولۋى ماڭىزدى. جاستارىمىز ادال ازامات بولۋى كەرەك. ەلىنە, ءوز ىسىنە ادال ازاماتتار عانا قازاقستاندى كوركەيتە الادى», دەدى مەملەكەت باسشىسى.
