بيىلعى كوكتەم ەلىمىزگە وڭاي سوقپادى. بايتاق ەلىمىزدىڭ ءار ءوڭىرى قيىن قىستاۋ كەزەڭدى باستان وتكەرىپ, ءتىلسىز جاۋ – تاسقىننان زارداپ شەكتى. قيىندىق بىرىككەندە ەڭسەرىلەتىنى ءمالىم. بۇل ورايدا ەلدە بولعان تابيعي اپاتتىڭ سالدارىن جويۋ جۇمىستارىنان قور دا قالىس قالمادى. اتاپ ايتقاندا, قورعا قاراستى پورتفەلدىك كومپانيالار مەن ولاردىڭ شەتەلدىك سەرىكتەستەرى كومەك رەتىندە ارنايى قاراجات ءبولدى جانە بۇل يگى ءىستى ءالى دە جالعاستىرىپ جاتىر.
وسىعان دەيىن قور جانە كومپانيالار توبى اتىنان 15 ملرد تەڭگە قاراجات بولىنگەن بولاتىن. سونداي-اق قوردىڭ كورپوراتيۆتىك ورتالىعى, «قازمۇنايگاز», «قازاتومپروم», «قازاقستان تەمىر جولى», «QazaqGaz», «KEGOC», «ەير استانا», «سامۇرىق-ەنەرگو» سەكىلدى وزگە دە پورتفەلدىك كومپانيالار گۋمانيتارلىق كومەكتەر جونەلتىپ, كۇردەلى جاعدايعا تاپ بولعان وڭىرلەرگە ارنايى تەحنيكالار ءبولدى. ال ازاماتتاردى قاۋىپسىز ايماقتارعا كوشىرۋ ءۇشىن ارنايى اۋە تاريفتەرى ەنگىزىلدى. قور قىزمەتكەرلەرى قورعانىس بوگەتتەرىن نىعايتۋ, ينفراقۇرىلىمداردى قايتا جوندەۋ جۇمىستارىنا جۇمىلدىرىلدى. بۇل جۇمىستار سۋ قاۋپى سەيىلمەگەن ايماقتاردا ءالى دە جالعاسىپ جاتىر.
قازىرگى كەزدە كومەك كورسەتۋشىلەردىڭ قاتارىنان «سامۇرىق-قازىنا» اق شەتەلدىك ارىپتەستەرىن كورۋگە بولادى. اتاپ ايتقاندا, الەمدەگى ەڭ ءىرى ۋران وندىرۋشىلەردىڭ ءبىرى كانادالىق «Cameco» كومپانياسى – 150 ملن تەڭگە, جاپوندىق «Marubeni» ساۋدا كومپانياسى – 14,1 ملن تەڭگە جانە قىتايلىق «CGN» اتوم كومپانياسى 221 ملن تەڭگە كولەمىندە «Samruk-Kazyna Trust» قايىرىمدىلىق قورىنا قاراجات اۋداردى. اتالعان كاسىپورىندار – «قازاتومونەركاسىپ» اق شەتەلدىك سەرىكتەستەرى.
«قازاتومونەركاسىپتىڭ» وزگە دە بىرقاتار ءىرى شەتەلدىك سەرىكتەستەرى الاپات تاسقىننىڭ سالدارىن جويۋ ءۇشىن قاراجات ءبولۋدى جوسپارلاپ وتىر. ولاردىڭ قاتارىندا «كاتكو» قازاقستاندىق-فرانتسۋزدىق بىرلەسكەن كاسىپورنى, رەسەيدىڭ اتوم ەنەرگياسى جونىندەگى مەملەكەتتىك «روساتوم» كورپوراتسياسى, فرانتسيانىڭ «Orano» اتوم كومپانياسى, قىتايدىڭ «CGN» اتوم كومپانياسى جانە جاپوندىق «Sumitomo» سەكىلدى ءىرى كومپانيالار بار.
سونداي-اق مۇناي-گاز سالاسىنداعى ۇلتتىق وپەراتور – «قازمۇنايگاز» اق-نىڭ سەرىكتەسى رۋمىندىق «Rompetrol» كومپانياسى دا زارداپ شەككەن جەرلەستەرىمىزگە قولداۋ كورسەتۋ ءۇشىن 45 ملن تەڭگە اۋداردى.
قازىرگى كەزدە قوردىڭ شەتەلدىك سەرىكتەستەرى دە ەلىمىزدەگى جاعدايعا بايلانىستى بارىنشا قولداۋ كورسەتۋگە نيەت ءبىلدىرىپ وتىر.
جينالعان قاراجات قوردىڭ بىرىڭعاي قايىرىمدىلىق وپەراتورى – «Samruk-Kazyna Trust» ارقىلى كوكتەمگى قارعىن سۋدان زاقىمدانعان ينفراقۇرىلىمدى قالپىنا كەلتىرۋ جانە تۇرعىنداردىڭ جاعدايىن وڭالتۋ جۇمىستارىنا جۇمسالاتىن بولادى.
