كەيىنگى بىرنەشە كۇننەن بەرى قۇلسارى قالاسى تۇرعىندارى تاراپىنان اۋىزسۋدىڭ لايلانعانى تۋرالى شاعىم كوبەيدى. جىلىوي اۋدانى اكىمدىگىنىڭ مالىمەتىنشە, مونوشاھاردى اۋىزسۋمەن «جىلىويسۋ» مكك قامتيدى. الايدا كاسىپورىننىڭ سۋ ايداۋ ستانساسىنداعى قازاندارىندا سۋ قورى ازايعان. وعان سەبەپ – «ماگيسترالدىق سۋاعىزعىسى» جشس-ءنىڭ سۋ تازارتۋ ستانساسى قاجەتتى سۋ قورىمەن قامتاماسىز ەتە الماۋى.
«سۋ تازارتۋ قوندىرعىلارىندا سۋ قۇرامى لايدان تولىق تازارتىلماعان. قۇلسارى قالاسىنا قاجەتتى سۋ كولەمى بەرىلمەدى. لايلانۋ كورسەتكىشى ستاندارتقا ساي ەمەس. وبلىس اكىمى لاي سۋدى جيناقتاۋ رەزەرۆۋارلارىنان اعىزۋدى, قۇبىرلار تولىق تازارعانشا ماگيسترالدىق جەلىدەن سۋ جىبەرۋدى تاپسىردى», دەپ حابارلادى وبلىستىق جەدەل شتاب.
قۇلسارىعا سۋ «استراحان-ماڭعىشلاق» ماگيسترالدىق قۇبىرىمەن تاسىمالدانادى. بۇل قۇبىرعا سۋ رەسەيدىڭ استراحان وبلىسىمەن شەكاراداعى قيعاش وزەنىنەن الىنادى. اتالعان قۇبىرعا يەلىك ەتەتىن «ماگيسترالدىق سۋاعىزعىسى» جشس-ءنىڭ مالىمەتىنە سۇيەنسەك, ورگانولەپتيكالىق كورسەتكىشتەر بويىنشا تەحنيكالىق سۋدىڭ ساپاسى وزگەرۋى مۇمكىن. ويتكەنى «استراحان-ماڭعىشلاق» ماگيسترالدىق سۋاعىزعىسىن قايتا قۇرۋ جانە كەڭەيتۋ جوباسىنىڭ ءبىرىنشى كەزەگى ىسكە اسىرىلىپ جاتىر. وسى جوبا شەڭبەرىندە 56-207 شاقىرىم ماگيسترالدىق قۇبىر جولىنىڭ جاڭا ۋچاسكەسى پايدالانۋعا بەرىلگەن.
اتىراۋ وبلىستىق سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى ايگۇل ىسقاقوۆانىڭ ايتۋىنشا, قۇلسارى قالاسىنداعى اۋىزسۋ ساپاسىنا ۇدايى مونيتورينگ جۇرگىزىلىپ كەلەدى. ماسەلەن, سۋ تاسقىنى بولعاننان بەرى اۋىزسۋ ساپاسىنا بايلانىستى 286 سىناما الىنعان. دەپارتامەنت ماماندارى تۇرعىندارعا قايناعان سۋدى تۇتىنۋدى ۇسىنىپ وتىر.
«جىلىويسۋ» مكك ديرەكتورىنىڭ ءبىرىنشى ورىنباسارى باتىر شاكىر ۇلىنىڭ ايتۋىنشا, اۋىزسۋ تەك قۇلسارى قالاسىندا عانا ەمەس, سونىمەن بىرگە جاڭاقاراتون كەنتىندە لايلانعان. وسىعان بايلانىستى كوممۋنالدىق كاسىپورىن 15 مامىردان 1 ماۋسىم ارالىعىنداعى كەزەڭ ءۇشىن سۋ اقىسىن ەسەپتەمەۋگە شەشىم قابىلدادى. مامىر ايىندا جەكە جانە زاڭدى تۇلعالاردىڭ تۇتىنعان سۋى ءۇشىن تاريفتىڭ تەك 50 پايىز مولشەرىندە تولەم ەسەپتەلەدى.
ال جىلىوي اۋداندىق كاسىپكەرلىك جانە اۋىل شارۋاشىلىعى ءبولىمىنىڭ باسشىسى نۇرتاس قۋاتباەۆتىڭ پىكىرىنشە, ساۋدا ورىندارىنىڭ يەلەرى قۇتىداعى سۋ باعاسىن وسىرمەۋى قاجەت. بۇل اۋىزسۋ تاپشىلىعىن سەزىنىپ وتىرعان تۇرعىندار ءۇشىن جاناشىرلىق بولار ەدى.
«قازىر قۇلسارى قالاسىندا اۋىزسۋ لايلاندى. بۇل سۋدىڭ ساپاسىنا اسەر ەتىپ وتىر. وسى ورايدا اۋىزسۋدى تاسىمالدايتىن, ءفيلترلى اۆتوماتتار ارقىلى تازالاپ جانە دۇكەندەردە ساتۋمەن اينالىساتىن كاسىپكەرلەردەن باعانى كوتەرمەي, تۇراقتى ۇستاۋى قاجەت», دەدى ن.قۋاتباەۆ.
«تەڭىزشەۆرويل» جشس-ءنىڭ ءباسپاسوز قىزمەتىنەن ءمالىم ەتكەندەي, جىلىوي اۋدانىنىڭ بەلسەندىلەرى قۇلسارى قالاسىنىڭ تۇرعىندارىنا اۋىزسۋ جەتكىزىپ بەرۋدى سۇراعان. وسىعان بايلانىستى كومپانيا 24 مىڭ ليتر بوتەلكەگە قۇيىلعان سۋ بولگەن. ونىڭ ىشىندە 6 مىڭ بوتەلكەدەگى سۋ بالالار, ايەلدەر مەن ەگدە جاستاعى ادامدار ورنالاسقان ەۆاكۋاتسيالىق پۋنكتتەرگە جەتكىزىلەدى.
«بۇل كومپانيا بۇعان دەيىن تاسقىن سۋدان زارداپ شەككەن قۇلسارى قالاسىنىڭ تۇرعىندارىنا بىرنەشە رەت كومەك كورسەتكەن ەدى. اۋىزسۋ ساپاسىنىڭ تومەندەۋىنە بايلانىستى كومپانيادان كومەك سۇرادىق. ويتكەنى ءبىز تۇرعىنداردىڭ اۋىزسۋ تاپشىلىعىنا ۇرىنباعانىن قالايمىز. كومپانيانىڭ دەمەۋشىلىگىمەن جەتكىزىلگەن سۋدى كوپبالالى وتباسىلارعا, قارتتارعا, بارلىق تۇرعىنعا جەتكىزىپ بەرەمىز», دەيدى جەرگىلىكتى بەلسەندى رايسا تەلەۋباەۆا.
اتىراۋ وبلىسى
