جىل سايىن ءداستۇرلى تۇردە ۇيىمداستىرىلاتىن جارمەڭكە تۇلەكتەردى جۇمىسقا ورنالاستىرۋدا اشىق ديالوگ الاڭىنا اينالعالى قاشان. ناتيجەسىندە, تۇلەكتەر بولاشاق جۇمىس ورنىن تابۋعا مۇمكىندىك الادى. بيىل دا اتالعان ۋنيۆەرسيتەتتى 9 مىڭعا جۋىق ستۋدەنت ءبىتىرىپ وتىر.
م.اۋەزوۆ اتىنداعى وڭتۇستىك قازاقستان ۋنيۆەرسيتەتىنىڭ باسقارما توراعاسى – رەكتور مىندەتىن اتقارۋشى قايرات نۇرمانبەتوۆ ءىس-شارادا قۇتتىقتاۋ ءسوز سويلەپ, جارمەڭكەگە قاتىسقان جۇمىس بەرۋشى مەكەمەلەرگە العىسىن ءبىلدىردى.
– جوعارى وقۋ ورنىنان تۇلەپ ۇشقان جاستارعا مۇنداي جارمەڭكە – جۇمىسقا تۇرۋعا زور مۇمكىندىك. جاس ماماندار الىسقا بارماي-اق, تۇيىندەمەسىن ارقالاپ ءار مەكەمەنى ارالاماي-اق وسىندا كومپانيا, مەكەمە وكىلدەرىمەن كوزبە-كوز سويلەسىپ, ماماندىعى بويىنشا جۇمىسقا ورنالاسۋعا كوپ مۇمكىندىگى بار. ەندەشە, جاستار وسى جەڭىلدىكتى پايدالانىپ, وزدەرى وقىپ بىتىرگەن ماماندىعىنىڭ كەلەشەكتە جەمىسىن كورۋگە تىلەكتەسپىز. ءبىزدىڭ جوعارى وقۋ ورنى ساپالى ماماندار دايارلايدى. بۇگىنگى تاڭدا مەگاپوليستەگى جەتەكشى كاسىپورىندارمەن كەلىسىم جاسالىپ, سول بويىنشا ءدۋالدى وقىتۋ جۇيەسى قولعا الىنعان. ياعني ستۋدەنتتەر تەوريامەن بىرگە سول كاسىپورىندا ستانوكتارمەن جۇمىس ىستەپ, تاجىريبەسىن شىڭدايدى. بۇل كەلەشەكتە ولاردىڭ كاسىبي مامان اتانۋىنا, سول جەردە جۇمىسقا قابىلدانۋىنا ۇلكەن مۇمكىندىك بەرەدى, – دەدى ق.نۇرمانبەتوۆ.
جارمەڭكەدە ەڭبەكشى اۋدانى بويىنشا مانساپ ورتالىعىنىڭ ەڭبەك رەسۋرستارىن بولجاۋ جانە جۇمىسپەن قامتۋ ءبولىمىنىڭ باسشىسى ناعيما دوسانوۆا, «Renaissance SHIK» جشس ديرەكتورى يگور كارپوۆ, «سيتي-ينجينەرينگ» جشس ديرەكتورى سايددين اجيدينوۆتار دا ىزگى تىلەك ءبىلدىرىپ, جاس تۇلەكتەرگە تابىس تىلەدى. ولار ءوز كەزەگىندە وقۋ ورداسىنىڭ ءبىلىمدى, ىزدەنىسى جوعارى جاستارىنا بوس جۇمىس ورىندارىن ۇسىنۋعا ءاردايىم دايىن ەكەنىن جەتكىزدى.
ال ءىس-شارا بارىسىندا ءبىتىرۋشى تۇلەكتەر جۇمىس بەرۋشىلەرمەن سۇحباتتاسىپ, ماماندىقتارى تۋرالى تولىققاندى اقپارات الىپ, مەكەمەلەردىڭ وتىنىشىمەن تۇيىندەمەلەرىن قالدىرىپ كەتتى. ماسەلەن, كىلەم ونىمدەرىن شىعاراتىن جەرگىلىكتى «بال تەكستيل» كومپانياسى كىلەم توقيتىن ستانوكتارعا وپەراتورلار قاجەت ەكەنىن جەتكىزدى. جۇمىسقا تۇرۋعا كەلگەن جاستاردى اتالعان ستانوكتا قالاي جۇمىس ىستەۋ كەرەكتىگىنە وقىتىپ, سول ءۇشىن باستاپقى ۇيرەنۋ ساتىسىندا اقشا تولەۋگە دە دايىن. بۇل كاسىپورىن تەك كىلەم توقىمايدى, وعان كەرەكتى ءجىپتى دە وزدەرى يىرەدى ەكەن. وندا قازىر 500-گە جۋىق ادام ەڭبەك ەتەدى. اتالعان فابريكاعا جۇمىسقا قابىلدانعان ازاماتقا بارلىق الەۋمەتتىك جەڭىلدىك قاراستىرىلادى. سونىڭ ىشىندە تەگىن تۇسكى اس, جۇمىسقا تەگىن تاسىمالداۋ, تەگىن ارنايى كيىممەن قامتاماسىز ەتۋ سەكىلدى جەڭىلدىكتەر بار. العاشقى جۇمىسقا ورنالاسقان كەزدە جۇمىسكەردىڭ ايلىق جالاقىسى 150 مىڭ تەڭگەدەن باستالىپ, تاجىريبەسى مەن بىلىكتىلىنە قاراي جوعارىلاي بەرەدى.
سونداي-اق قالاداعى تاعى ءبىر ءىرى توقىما فابريكاسى «ازالا تەكستيل» كومپانياسى دا وزدەرىنە تىگىنشى, توقىماشى, حيميالىق زەرتحاناشى ماماندارىن جۇمىسقا قابىلداۋعا وسى جارمەڭكەگە كەلىپتى. بۇل كاسىپورىندا دا ەڭ تومەنگى ايلىق جالاقى 150 مىڭ تەڭگەدەن باستالادى ەكەن. ماماندار ەكى اۋىسىم بويىنشا جۇمىس ىستەيدى. اسحانادا تاماقتانۋ وتە ارزان دەيدى كومپانيا وكىلدەرى. ماسەلەن, كەشەندى تۇسكى اس 500 تەڭگە تۇرادى. دەگەنمەن جۇمىس بەرۋشىلەر توقىما ستانوگىندە جۇمىس ىستەۋ وڭاي ەمەس ەكەنىن ايتتى. بىلىكتى توقىماشى بولۋ ءۇشىن ءبىراز تاجىريبە مەن ءتوزىم قاجەت.
سونىمەن قاتار جارمەڭكە كەزىندە قاتىسۋشىلار اراسىندا قىزىقتى ويىندار ويناتىلىپ, ءىس-شارا دۋماندى كونتسەرتكە ۇلاستى. بيىلعى جارمەڭكەگە ءىرى ءوندىرىس وشاقتارىمەن بىرگە شىمكەنت قالاسى اكىمدىگىنە قاراستى باسقارمالار, تۇركىستان وبلىستىق سوتىنىڭ كەڭسەسى, قوس ءوڭىردىڭ پروكۋراتۋراسى, حالىققا قىزمەت كورسەتۋ ورتالىقتارى, مەگاپوليستىڭ مادەني مەكەمەلەرى مەن كىتاپحانالارى قاتىستى.
شىمكەنت
