فوتو: تۇركىستان وبلىسى اكىمدىگى
اتالعان ينتەللەكتۋالدى سايىستىڭ فينالدىق كەزەڭىنە تۇركىستان وبلىسى اكىمىنىڭ ورىنباسارى بەيسەنباي تاجىباەۆ, مادەنيەت جانە اقپارات مينيسترلىگىنىڭ جاستار جانە وتباسى ىستەرى كوميتەتى توراعاسىنىڭ ورىنباسارى ءبىرجان ءالىمجانوۆ قاتىسىپ, جەڭىمپاز اتانعان جاستاردى ماراپاتتاپ, ساتتىلىك تىلەدى.
– تۇركىستان تورىندە جىل سايىن ءداستۇرلى تۇردە وتكىزىلەتىن رەسپۋبليكالىق «اL-FARABI» ينتەللەكتۋالدى ويىنى بيىل دا ءوز جالعاسىن تاۋىپ وتىر. بۇل سايىس وبلىسىمىزدا «جاستار رەسۋرستىق ورتالىعىنىڭ» ۇيىمداستىرۋىمەن جىل سايىن تۇراقتى وتكىزىلىپ كەلەدى. ناعىز بىلىمگە قۇشتار, ۇنەمى ىزدەنىس جولىندا جۇرەتىن جاستاردىڭ باسىن بىرىكتىرەتىن رەسپۋبليكالىق دەڭگەيدەگى ينتەللەكتۋالدى سايىستاردىڭ ءبىزدىڭ وڭىرىمىزدە ءوتىپ جاتقاندىعى كوڭىل قۋانتادى. «بىلەكتى ءبىردى جىعار, ءبىلىمدى مىڭدى جىعار» دەگەندەي, سايىسقا قاتىسىپ ءوز باقتارىن سىناعان بارلىق كومانداعا العىس ايتامىن. اتالعان سايىستىڭ ىرىكتەۋ كەزەڭدەرىنەن دارا شىعىپ, فينالدىق كەزەڭدەرگە جولداما العان كوماندالارعا ساتتىلىك تىلەيمىن, – دەدى وبلىس اكىمىنىڭ ورىنباسارى بەيسەنباي تاجىباەۆ.
تۇركىستان وبلىسى قوعامدىق دامۋ باسقارماسىنىڭ «جاستار رەسۋرستىق ورتالىعى» كمم-ءنىڭ ۇيىمداستىرۋىمەن وتكىزىلگەن شارانىڭ ماقساتى – دارىندى جاستاردى قولداۋ, ولاردىڭ تانىمدىق قىزىعۋشىلىقتارىن وياتۋ ارقىلى ءبىلىم دەڭگەيىن كوتەرۋ. سونداي-اق ينتەللەكتۋالدى ورتانى قالىپتاستىرۋ, جاستار اراسىندا وراتورلىق مادەنيەتتى, تولەرانتتىق تارتىپپەن ازاماتتىق تانىمدى دامىتۋ. تۇركىستان تورىندە ناعىز ءبىلىمدى جاستاردىڭ باسىن قوسقان بۇل سايىسقا 100-گە جۋىق كوماندا ءوتىنىم بەرگەن. ونىڭ ىشىندە تۇركىستان وبلىسىنان بولەك, استانا, الماتى, شىمكەنت قالالارى مەن جامبىل, پاۆلودار جانە قىزىلوردا وبلىستارىنان دا كوماندالار بار.
ويىننىڭ ىرىكتەۋ كەزەڭىندە ءوزارا مىقتىنى انىقتاعان كوماندالار, تارتىسقا تولى ويىننىڭ كوركىن قىزدىردى. فينالعا جولداما العان كوماندالار كورەرمەندەرگە تاماشا كوڭىل كۇي سىيلادى.
جالپى 72 كوماندا اراسىنان شيرەك فينالعا وتكەن 12 كوماندا شىقتى. ولاردىڭ تورتەۋى فينالدىق كەزەڭنىڭ جولداماسىن ساراپقا سالىپ, ناتيجەسىندە ءبىرىنشى ورىندى سايرام اۋدانىنىڭ «ەرۋديت» كومانداسى جەڭىپ الدى. ال ەكىنشى ورىندى جامبىل وبلىسىنان كەلگەن «Chicago bulls» كومانداسى السا, ءۇشىنشى ورىن بايدىبەكتىك «BBC» كومانداسىنا بۇيىردى. I ورىن العان كومانداعا 1000 000 تەڭگە, II ورىنعا 500 000 تەڭگە جانە III ورىن يەگەرلەرىنە 300 000 تەڭگە قارجىلاي سىيلىق تابىستالدى. سايىسقا قاتىسقان ءارتۇرلى كوماندالارعا «ۇزدىك ۇجىم», «ۇزدىك بىلىمگەر», «ۇزدىك توپ باسشى», «ۇزدىك جاۋاپ», «ۇزدىك كيىم ۇلگىسى» نوميناتسيالارى بەرىلدى.
ايتا كەتەيىك, ينتەللەكتۋالدى ويىننىڭ ءبىرىنشى كەزەڭى 28 مامىر كۇنى «فاراب» امبەباپ عىلىمي كىتاپحاناسىندا وتكەن بولاتىن.
