اڭگىمەمىزدى پلەي-وفف سايىستارىنان باستاساق, شيرەك فينالداعى ەڭ قىزىقتى ويىن پراگاداعى و2 ارەناسىندا ءوتتى. بۇل ماتچتا كانادا سلوۆاكيانىڭ قاقپاسىنا 6 گول سوقسا, قارسىلاستارى 3 شايبامەن عانا جاۋاپ قايتاردى. ەسەپ – 6:3. شۆەيتساريا گەرمانيانى 3:1 ەسەبىمەن ۇتتى. چەحيا مەن اقش اراسىنداعى باسەكەنىڭ تاعدىرىن ءبىر عانا گول شەشتى – 1:0. شۆەتسيا مەن فينليانديا قۇرامالارى دا ءبىراز تىرەستى. كورشىلەس قوس مەملەكەت حوككەيشىلەرىنىڭ تارتىسى شۆەدتەردىڭ پايداسىنا شەشىلدى – 2:1.
جارتىلاي فينالدا سەنساتسيالىق ناتيجە تىركەلدى. سوڭعى الەم چەمپيوناتىندا قارسىلاس شىداتپاي, باس جۇلدەنى ولجالاعان كانادا ويدا-جوقتا شۆەيتساريادان ۇتىلىپ قالدى. بۇل ماتچتا العاشقى ەكى شايبانى كەۆين فيال مەن نينو نيدەررايتەر ءوز ەنشىلەرىنە جازدى. بىراق ويىن اياقتالعانعا دەيىن ۇيەڭكى جاپىراقتار ەلىنىڭ وكىلدەرى تارازى باسىن تەڭەستىردى. بۇل گولداردىڭ اۆتورلارى – برەندون تانەۆ پەن دجون تاۆارەس. وۆەرتايمدا دا جەڭىمپاز انىقتالعان جوق. بۋلليت سوعۋ بارىسىندا شۆەيتساريالىقتاردىڭ باعى جاندى – 3:2. ال چەحيا مەن شۆەتسيا اراسىنداعى كەزدەسۋ 7:3 ەسەبىمەن ايدىن يەلەرىنىڭ پايداسىنا شەشىلدى.
فينالدا شۆەيتساريا مەن چەحيا كەزدەستى. العاشقى ەكى كەزەڭدە بىردە-ءبىر شايبا قاقپاعا ەنبەدى. تابلوداعى ەسەپ 50-مينۋتتا وزگەردى. ەسەپتى جۇلدىزدى شابۋىلشى داۆيد پاسترنياك اشتى. ويىننىڭ اياقتالۋىنا ساناۋلى سەكۋند قالعاندا داۆيد كەمپف بوس قاقپانى ءدال كوزدەدى. ءسويتىپ, 2:0 ەسەبىمەن جەڭىسكە جەتكەن چەحتار الەم چەمپيونى اتاندى. ال قولا مەدال ءۇشىن باسەكەدە شۆەتسيا كانادانى قاپى قالدىردى – 4:2.
ەستەرىڭىزگە سالا كەتەيىك, چەحياداعى دوداعا قازاقستان قۇراماسى دا قاتىستى. جەتى كەزدەسۋدىڭ ەكەۋىن ۇتىپ, بەسەۋىندە جەڭىلىس تاپقان جەرلەستەرىمىز ۆ توبىندا التىنشى ورىندى قاناعات تۇتتى. وسى ناتيجە ارقىلى عالىم مامبەتاليەۆتىڭ شاكىرتتەرى كەلەسى جىلى ەليتالىق ديۆيزيوندا ونەر كورسەتۋ قۇقىعىن ساقتاپ قالدى.
سونىمەن قاتار پراگادا حالىقارالىق حوككەي فەدەراتسياسىنىڭ كەزەكتى كونگرەسى ءوتىپ, وسى جيىن بارىسىندا 2028 جىلعى الەم چەمپيوناتىن قابىلدايتىن مەملەكەت انىقتالدى. ونداي قۇقىق فرانتسيانىڭ پاريج بەن ليون قالالارىنا بەرىلىپ وتىر. ال كەلەسى جىلعى جارىس شۆەتسيانىڭ ستوكگولم مەن دانيانىڭ حەرنينگ قالالارىندا ۇيىمداستىرىلادى. 2026 جىلعى دودا شۆەيتساريانىڭ تسيۋريح پەن فريبۋرگىندە, 2027 جىلعى تۋرنير گەرمانيانىڭ ديۋسسەلدورف پەن مانگەيمىندە وتەدى.
