بۇل كۇنى وسكەمەننەن قىزىلتاسقا قاراي ىركەس-تىركەس شىققان كولىكتەردە ەسەپ بولمادى. ۇلاندا ۇيىمداستىرىلعان «Altai fest – 2024» تۋريستىك ماۋسىمىنىڭ اشىلۋىنا سوناۋ استانا, الماتى, قاراعاندى, پاۆلودار, سەمەي قالالارىنان دا ساياحاتشىلار كەلدى. اۋقىمدى ءىس-شاراعا قاتىسقان جۇرتتىڭ ءبىر توبى قىزىلتاس تاۋىنىڭ ۇشار بيىگىنە كوتەرىلسە, ەندى ءبىرى ەتەكتەگى كونتسەرتتى تاماشالادى, ساداق تارتىپ, سايىسقا ءتۇستى. جۇيرىك ءمىنىپ, جازيرا دالادا جوسقاندار دا جوق ەمەس.
فەستيۆالدىڭ باسى-قاسىندا جۇرگەن ازاماتتاردىڭ ايتۋىنشا, ەكىنشى جىل قاتارىنان ۇيىمداستىرىلىپ جاتقان ءىس-شاراعا بيىل كەلگەن تۋريستەردىڭ سانى بىلتىرعىمەن سالىستىرعاندا ەكى ەسە كوپ. ناقتىراق ايتساق, قىزىلتاستىڭ توڭىرەگىنە 400-دەن اسا ادام جينالعان. ايتىپ وتكەندەي, تۋريستىك ءىس-شارا تاۋعا شىعۋمەن عانا شەكتەلگەن جوق. باۋرايىندا ويىن-ساۋىق باعدارلامالارى دا ويلاستىرىلعان.
«ەلدەگى سۋ تاسقىنىنا بايلانىستى فەستيۆال ۋاقىتى شەگەرىلدى. ايتپەگەندە, قاتىسۋشىلار سانى بۇدان دا كوپ بولار ەدى. العاشىندا 700 ادام كەلەدى دەپ جوسپارلاعان. دەسە دە, وسىنداي تۋرلار ارقىلى شىعىستىڭ ءتۋريزمىن دامىتۋعا بولادى. تاۋ باسىنا شىعۋعا وسكەمەننەن عانا ەمەس, استانا, الماتى, قاراعاندى, پاۆلودار, سەمەي قالالارىنان دا قوناقتار كەلدى», دەيدى فەستيۆالدى ۇيىمداستىرۋشى مۇحتار تويبازاروۆ.
تاۋ قاتەلىكتى كەشىرمەيدى. بيىكتىك قاراعان كوزگە وڭاي كورىنگەنىمەن, تاقتايداي جازىق سوقپاق جوق. سوندىقتان قۇتقارۋشىلار الدىن الا تۋريستەر جۇرەتىن تۇستارعا بەلگى ورناتتى. قاۋىپسىزدىك شارالارى قاتاڭ ساقتالدى. ءوتىپ جاتقان «Altai fest – 2024» تۋريستىك ءىس-شاراسىنا وبلىستىڭ بىرقاتار مەكەمەسى, كاسىپكەرلەر دەمەۋشىلىك كورسەتتى. قۇسبەگى باقىتبەك ماناي ۇلى ۇلتتىق رۋحتى كورسەتۋگە بۇركىتىن كوتەرىپ, قاسىم قايسەنوۆ كەنتىنەن كەلدى.
ءىس-شارانىڭ ەڭ قىزىعى سول, اركىمنىڭ كوكەيىندە تاۋ باسىنا كىم ءبىرىنشى شىعادى دەگەن سۇراق تۇردى. ەتەكتەن بيىككە اسىققاندار كوپ كۇتتىرگەن جوق. تاۋدىڭ توبەسىنە قارا ءۇزىپ شىققان وبلىستىق «مەنىڭ ولكەم» گازەتىنىڭ ءتىلشىسى ءادىلحان ەسىمحانوۆ ەدى. ال ايەلدەر اراسىنان استانادان كەلگەن ايگۇل حاسەنوۆا ءبىرىنشى بولدى.
«گەوگرافتار 1 000 مەتردەن اسسا عانا تاۋ دەپ اتالادى دەيتىن. بىراق كەيبىرەۋلەر ءۇشىن بۇل دا بيىك بولعان سياقتى. مەن العاشقى توپتىڭ بىرىنە ءىلىنىپ, تاۋ ەتەگىنە دەيىن سوڭدارىنان ىلەسىپ وتىردىم. ورتان بەلىنە جەتپەي, كوبى دەمالا باستادى. سول كوتەرىلگەننەن 8-ۋچاسكەگە دەيىن توقتامادىم. سوسىن سوڭىمنان كىمدەر ىلەسىپ كەلەدى دەپ ارتىما ءبىر بۇرىلىپ, 15 سەكۋندتاي ايالدادىم. سودان توقتامادىم. شامامەن 22 مينۋتتا تاۋدىڭ بيىگىندە تۇردىم», دەيدى جۋرناليست ءارى سپورتشى ءادىلحان ەسىمحانوۆ.
ۇيىمداستىرۋشىلار بۇل ءىس-شارانى داستۇرگە اينالدىرۋدى جوسپارلاپ وتىر. جىلدا مامىردا وتەتىن بولسا, قاتىسۋشىلار قاتارى ءالى دە ارتاتىن سياقتى. كەلەر جىلى قىزىلتاستىڭ بيىگىنە شىعامىن دەسەڭىز, بۇگىننەن دايىندالا بەرىڭىز.
شىعىس قازاقستان وبلىسى,
ۇلان اۋدانى
