فوتو: تۇرار قازانعاپوۆ
پرەمەر-مينيستر ولجاس بەكتەنوۆتىڭ ايتۋىنشا, 30 770 وتباسىعا 100 اەك كولەمىندە بىررەتتىك تولەم بەرۋ ءۇشىن 11 ميلليارد تەڭگەدەن اسا قارجى بولىنگەن.
زارداپ شەككەن ايماق تۇرعىندارىن باسپانامەن قامتاماسىز ەتۋ جۇمىستارى قارقىندى جۇرگىزىلىپ جاتىر. جالپى, 15 103 تۇرعىن ءۇي تەكسەرىلىپ, 11 186 نىساندى باعالاۋ جۇمىستارى اياقتالدى.
قازىرگى تاڭدا 432 وتباسى بۇزىلعان باسپانالارىنىڭ ورنىنا جاڭا ۇيلەر مەن پاتەرلەرگە يە بولدى. اتاپ ايتقاندا, تۇرعىندارعا قوستاناي وبلىسىندا 225, اقمولا وبلىسىندا 83, اقتوبە وبلىسىندا 76, سولتۇستىك قازاقستان وبلىسىندا 40, قاراعاندى وبلىسىندا 6, پاۆلودار وبلىسىندا 2 باسپانا بەرىلدى.
سونىمەن قاتار مەملەكەت باسشىسىنا زارداپ شەككەن ازاماتتار ءۇشىن 1862 جاڭا ءۇي سالىنىپ جاتقانى تۋرالى مالىمەت بەرىلدى. ماسەلەن, باتىس قازاقستان وبلىسىندا 394, قوستاناي وبلىسىندا 184, اتىراۋ وبلىسىندا 48, اقتوبە وبلىسىندا 494, اقمولا وبلىسىندا 273, سولتۇستىك قازاقستان وبلىسىندا 500, پاۆلودار وبلىسىندا 5 تۇرعىن ءۇيدىڭ قۇرىلىسى جۇرگىزىلىپ جاتىر. 2947 وتباسىعا باسپاناسىن جوندەۋ جانە قالپىنا كەلتىرۋ ءۇشىن وتەماقى تولەندى.
ولجاس بەكتەنوۆ زارداپ شەككەن تۇرعىندارعا اسا قاجەتتى دۇنيە-م ۇلىك ساتىپ الۋ ءۇشىن 150 اەك-كە دەيىن قوسىمشا وتەماقى تولەنىپ جاتقانىن ايتتى. 4115 وتباسى جالپى سوماسى 1 ميلليارد تەڭگە كولەمىندە وتەماقى العان. سونداي-اق ولگەن مالدىڭ وتەۋى ءۇشىن مەملەكەتتەن بولىنگەن قارجىلاي كومەكتىڭ كولەمى 2,3 ميلليارد تەڭگەدەن اسقان.
بۇدان بولەك, تاسقىننان زارداپ شەككەن كاسىپكەرلەردىڭ شىعىنىن وتەۋ جۇمىستارى جۇرگىزىلىپ جاتىر. ايماقتىق كوميسسيالار تەكسەرۋ جۇمىستارىنىڭ ناتيجەسىنە سايكەس شاعىن جانە ورتا بيزنەس سۋبەكتىلەرىنىڭ 12 ءوتىنىمىن قاراستىرىپ, ماقۇلدادى. وعان جالپى سوماسى 21 ميلليون تەڭگە ءبولىندى.
جالپى, شىعىندى وتەۋ جانە قۇجاتتاردى وتكىزۋ ءتارتىبىن ءبىلۋ ءۇشىن 1432 ءنومىرى بويىنشا جەدەل جەلى جۇمىس ىستەپ تۇر. بۇل باعىتتاعى جۇمىس جالعاسۋدا. الدىن الا باعالاۋ بويىنشا سۋ تاسقىنىنان 731 بيزنەس سۋبەكتىسى زارداپ شەككەن.
