ماحامبەت اۋدانى اكىمىنىڭ ورىنباسارى ارمان ادىلعاليەۆتىڭ مالىمەتىنە سۇيەنسەك, 9 اۋىلدىق وكرۋگتەگى 21 اۋىلدا 30 900 ادام تۇرادى. ال جايىق وزەنى جاعالاۋىنداعى 17 ەلدى مەكەننىڭ ءبىرى – تالدىكول.
وتكەن سەنبىدە اتىراۋ – ورال تاسجولىنان تالدىكول اۋىلىنا باراتىن 7 شاقىرىم جولدى تاسقىن سۋ باستى. سول سەبەپتەن اتالعان ەلدى مەكەندەگى تۇرعىنداردى قايىقپەن تاسىمالداۋعا شەشىم قابىلداندى. ال جەكسەنبىدە تالدىكولدىك تۇرعىنداردى تۇگەل ەۆاكۋاتسيالاۋعا تۋرا كەلدى.
«بەيبارىس اۋىلدىق وكرۋگىنە قارايتىن تالدىكول ەلدى مەكەنىندەگى تۇرعىندار سانى – 1 200-گە جۋىق. اۋىلدا 223 ءۇي, 5 كاسىپكەرلىك نىسانى بار. بىرنەشە كۇن بۇرىن اۋىل تۇرعىندارىن, ونىڭ ىشىندە جۇكتى انالاردى, بالالار مەن مۇمكىندىگى شەكتەۋلى جانداردى, ەگدە جاستاعى قاريالاردى اتىراۋ قالاسىنا كوشىرگەن ەدىك. ەندى اۋىلعا كىرەتىن جولدى سۋ شايۋىنا بايلانىستى اۋىلداعى بارلىق تۇرعىندى قاۋىپسىز ايماقتارعا كوشىرۋگە شەشىم قابىلداندى», دەدى ا.ادىلعاليەۆ.
ونىڭ ايتۋىنشا, ەۆاكۋاتسيالانعان تۇرعىندار ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ جاتاقحاناسىنا ورنالاستى. كەيبىرى تۋىستارىنىڭ ۇيىنە بارۋدى قولايلى كورىپتى.
«ۋنيۆەرسيتەت جاتاقحاناسىندا بارلىق جاعداي جاسالدى. تۇرعىندار ءۇشىن توسەك-ورىن جابدىعى دايىندالدى. ءۇش مەزگىل تاماق بەرىلەدى. بىزگە ەڭ باستىسى, تۇرعىنداردىڭ قاۋىپسىزدىگى, اماندىعى قاجەت», دەدى ا.ادىلعاليەۆ.
تۇرعىنداردى ەۆاكاۋاتسيالاۋعا جەرگىلىكتى ارىپتەستەرىمەن بىرگە ماڭعىستاۋ وبلىستىق توتەنشە جاعدايلار دەپارتامەنتىنىڭ قۇتقارۋشىلارى دا جۇمىلدى. اعا ينجەنەر, ازاماتتىق قورعاۋ اعا لەيتەنانتى ءۋاليحان جۇمابەكوۆتىڭ ايتۋىنا قاراعاندا, تالدىكول اۋلىنىڭ تۇرعىندارىن ەۆاكۋاتسيالاۋعا 24 قىزمەتكەر, 6 قايىق, 6 تەحنيكا تارتىلعان.
«اۋىل تۇرعىندارىن مەكتەپتىڭ جانىنا جينالۋدى سۇرادىق. قايىقپەن تاسىمالداۋ كەزىندە تۇرعىنداردىڭ, اسىرەسە, بالالاردىڭ قاۋىپسىزدىگىنە باسا ءمان بەرىلدى», دەيدى ۋ.جۇمابەكوۆ.
تالدىكول اۋلىنىڭ تۇرعىنى گۇلزيرا قابەنوۆانىڭ ايتۋىنا قاراعاندا, تاڭەرتەڭگى 8.00 شاماسىندا دابىل سيرەناسى ويناعان. تۇرعىندار قۇجاتتارىن, جول سومكەسىن ازىرلەپ, الدىن الا ەۆاكۋاتسيالاۋعا دايىن وتىرعان.
توتەنشە جاعداي دەپارتامەنتى قوعاممەن بايلانىس توبىنىڭ مالىمەتىنە قاراعاندا, تالدىكول اۋىلىنان 121 ادام, ونىڭ ىشىندە 41 بالا قايىقپەن ەۆاكۋاتسيالاندى. اتىراۋ قالاسىنداعى ەۆاكۋاتسيالىق پۋنكتتەرگە 26 ادام جەتكىزىلدى. ال 90-نان اسا ادام تۋىستارىنىڭ ۇيىنە بارعان.
كەشە توتەنشە جاعدايلار ءمينيسترى شىڭعىس ءارىنوۆ اتىراۋ وبلىسىنا كەلىپ, تاسقىن سۋعا قارسى جۇمىسپەن تانىستى. قازىر قۇتقارۋشىلار ارنايى تەحنيكانىڭ كومەگىمەن قۇلسارى قالاسىندا, ماحامبەت اۋدانىنىڭ جالعانساي اۋلىندا جانە يندەر اۋدانىندا تاسقىن سۋدى سورۋ جۇمىسىن جۇرگىزىپ جاتىر. كەشەگە دەيىن شامامەن 7 ميلليون تەكشە مەتر سۋ ايدالدى. سوڭعى تاۋلىكتە سورىلعان سۋ – 205 مىڭ تەكشە مەتر.
ال تالدىكول اۋلىندا 167 تۇرعىن قالىپ وتىر. ونىڭ دەنى – ەر ادام. ولار اۋىلداعى بوگەتتى بەكىتۋ ءۇشىن قالۋدى ۇيعارىپتى. ال 10 ايەل بوگەت بەكىتىپ جۇرگەن تۇرعىندارعا, اسكەريلەر مەن توتەنشەلىكتەرگە تاماق دايىنداۋدى قولعا العان.
اتىراۋ وبلىسىنىڭ جەدەل شتابىنان ءمالىم ەتكەندەي, پوليتسيا قىزمەتكەرلەرى تالدىكول اۋلىندا پاترۋلدىك باقىلاۋدى كۇشەيتتى. ماقسات – قاراۋسىز قالعان ۇيلەر مەن نىسانداردا تالان-تاراجعا جول بەرمەۋ, قوعامدىق ءتارتىپتى ساقتاۋ.
«جايىق وزەنىندەگى سۋ دەڭگەيى كوتەرىلىپ, اعىس قارقىنىنىڭ كۇشەيۋىنە بايلانىستى ماحامبەت اۋدانىنا قاراستى تالدىكول اۋلىنا سۋ باسۋ قاۋپى تونگەن ەدى. سول سەبەپتەن تۇرعىندارىنىڭ دەنى ەۆاكۋاتسيالانعان اۋىلدا قوعامدىق قاۋىپسىزدىكتى پوليتسيا قىزمەتكەرلەرى قامتاماسىز ەتۋدى قولعا الدى. اۋىلدا پاترۋلدىك باقىلاۋ جۇرگىزۋگە 14 پوليتسيا قىزمەتكەرى, 5 پاترۋلدىك كولىك تارتىلدى. پاترۋلدەۋ جانە كەزەكشىلىك تاۋلىك بويى جۇرگىزىلەدى. تۇرعىن ۇيلەر مەن شارۋاشىلىق ماقساتتاعى نىساندار تاۋلىك بويى كۇزەتىلەدى», دەپ حابارلادى وبلىستىق جەدەل شتاب.
اتىراۋ وبلىسى
