فوتو: baq.kz
ءىس-شارا تاۋەلسىز قازاقستان قارۋلى كۇشتەرى قالىپتاسۋىنىڭ باستاۋىندا تۇرعان اتاقتى اسكەري قولباسشىنىڭ تۋعانىنا 100 جىل تولۋىنا وراي ۇيىمداستىرىلدى.
وعان پارلامەنت دەپۋتاتتارى, قارۋلى كۇشتەردىڭ قۇرىلۋى جولىندا قاجىرلى ەڭبەك ەتكەن ارداگەرلەر, قوعام قايراتكەرلەرى, پروفەسسورلىق-وقىتۋشىلار قۇرامى جانە ۇلتتىق قورعانىس ۋنيۆەرسيتەتىنىڭ ماگيسترانتتارى قاتىستى. بەينەبايلانىس ارقىلى ازەربايجان, قىرعىزستان, رەسەي, تاجىكستان جانە وزبەكستان اسكەري وقۋ ورىندارىنىڭ وكىلدەرى ءىس-شاراعا قوسىلدى.
كونفەرەنتسياعا قاتىسۋشىلارعا ارناپ قورعانىس ءمينيسترىنىڭ ءبىرىنشى ورىنباسارى – قر قارۋلى كۇشتەرى باس شتابىنىڭ باستىعى, گەنەرال-لەيتەنانت سۇلتان كامالەتدينوۆ ءسوز سويلەدى.
– ساعادات نۇرماعامبەتوۆتىڭ ەسىمى ەل تاريحىندا ماڭگى تاڭبالانعان. ساعادات قوجاحمەت ۇلى – كورنەكتى اسكەري باسشى عانا ەمەس, وتانعا ادال قىزمەت ەتۋدىڭ ۇلگىسى. ونىڭ جاۋىنگەرلىك جولى مەن ەل يگىلىگى ءۇشىن ەتكەن قىزمەتى – بارىمىزگە ونەگە, – دەپ اتاپ ءوتتى س. كامالەتدينوۆ.
كونفەرەنتسيادا سوعىس تاريحى مەن اسكەري ونەر جانە ونىڭ دامۋ پەرسپەكتيۆالارى تۋرالى باياندامالار تىڭدالدى. وعان قاتىسۋشىلار كەڭەس وداعىنىڭ باتىرى ساعادات نۇرماعامبەتوۆتىڭ جاۋىنگەرلىك جولىنداعى سوعىس تاريحىن زەرتتەۋ تاجىريبەسىمەن ءبولىستى. ودان بولەك, جيىندا باتىردىڭ قازاقستان ارميانىڭ قالىپتاسۋى مەن دامۋىنداعى تاريحي ءرولى تۋرالى ايتىلدى.
ءىس-شاراعا ارنايى كىتاپ كورمەسى, ارميا گەنەرالى ساعادات نۇرماعامبەتوۆتىڭ قۇجاتتارى مەن جەكە زاتتارى قويىلعان ەكسپوزيتسيا دايىندالدى. استانا قالاسىنىڭ مەملەكەتتىك ءارحيۆى ول تۋرالى سيرەك كەزدەسەتىن ماتەريالدارمەن تانىستىردى.
– ساعادات نۇرماعامبەتوۆ – قازاق حالقىنىڭ ءبىرتۋار ۇلى. ول اسكەردە 54 جىل قىزمەت ەتىپ, ءوزىنىڭ بارلىق كۇش-جىگەرىن, قاجىر-قايراتىن وسى سالاعا ارنادى. باتىر ەسىمى – ەل ەسىندە, ماڭگى جادىمىزدا ساقتالادى. ونىڭ ءمىنسىز قىزمەتى – وتانعا شىنايى ادال قىزمەت ەتۋدىڭ, ەلگە, جەرگە دەگەن سۇيىسپەنشىلىكتىڭ ايقىن كورىنىسى, – دەدى قورعانىس ءمينيسترىنىڭ تاربيە جانە يدەولوگيالىق جۇمىس جونىندەگى ورىنباسارى, گەنەرال-مايور شايح-حاسان جازىقباەۆ.
باياندامالاردا قاتىسۋشىلار ارميا گەنەرالى ساعادات نۇرماعامبەتوۆتىڭ اسكەري-تەوريالىق جانە رۋحاني مۇراسىن زەردەلەۋ قاجەتتىگىن اتاپ ءوتتى, ول جاس ۇرپاقتىڭ بويىندا دۇرىس ومىرلىك باعدارلار مەن پاتريوتيزم, ازاماتتىق, ەل ىسىنە ارالاسۋ مەن جاۋاپكەرشىلىك سەزىمى سياقتى جەكە قاسيەتتەردى قالىپتاستىرۋعا وڭ ىقپال ەتەدى.
ءىس-شارا سوڭىندا ۇلتتىق قورعانىس ۋنيۆەرسيتەتىنىڭ باستىعى, گەنەرال-مايور اسقار مۇستابەكوۆ بىرقاتار كونفەرەنتسياعا قاتىسۋشىعا «س.ق.نۇرماعامبەتوۆكە 100 جىل» ەستەلىك بەلگىلەرىن, سەرتيفيكاتتار مەن العىسحاتتار تابىس ەتتى.
