وتىرىسقا وبلىس اكىمدەرىنىڭ ورىنباسارلارى, ورتالىق مەملەكەتتىك ورگانداردىڭ وكىلدەرى قاتىستى. جيىندا ۇلتتىق كوميسسيا توراعاسى ايدا بالاەۆا حالىقتىڭ رەپرودۋكتيۆتى دەنساۋلىعىن قورعاۋ مەملەكەتتىك ساياساتتىڭ باسىم باعىتى بولىپ قالا بەرەتىنىن اتاپ ءوتتى.
«بۇل ماسەلە جالپىۇلتتىق ماڭىزعا يە, ويتكەنى ءبىز سالاۋاتتى ۇلت, ەلدىڭ بولاشاعى تۋرالى ايتىپ وتىرمىز. ءجاسوسپىرىم قىزدار مەن فەرتيلدى جاستاعى ايەلدەردىڭ رەپرودۋكتيۆتى دەنساۋلىعىن ساقتاۋ جانە نىعايتۋ, ولاردىڭ بالا تۋ تۋرالى جەتكىلىكتى اقپارات الىپ, شەشىم قابىلداۋ مۇمكىندىگىن ارتتىرۋ, جۇكتىلىك جانە بوسانۋ كەزىندەگى تاۋەكەلدەردى ازايتۋ ماقساتىندا الەۋمەتتىك-ەكونوميكالىق جانە ەمدەۋ-پروفيلاكتيكالىق شارالار كەشەنى ىسكە اسىرىلۋدا. ءبىزدىڭ ساراپشىلار مەديتسينالىق ينفراقۇرىلىمنىڭ ۇزدىكسىز جۇمىسىن قامتاماسىز ەتۋ, انا ءولىمىن ازايتۋعا مۇمكىندىك بەرەتىن شارالار كەشەنىن قابىلداۋ قاجەتتىگىن اتاپ ءوتتى. جالپى, بارلىق ۋاكىلەتتى ورگانداردىڭ بەلسەندى جۇيەلى جۇمىسى قاجەت دەپ سانايمىن», دەپ اتاپ ءوتتى مينيستر.
دەنساۋلىق ساقتاۋ ۆيتسە-ءمينيسترى ايجان ەسماعامبەتوۆا وسى سالاداعى قازىرگى جاعداي مەن جۇمىس جۇيەسىن جەتىلدىرۋ شارالارى تۋرالى حاباردار ەتتى. ال سەناتور ءلاززات قالتاەۆا وتىرىسقا قاتىسۋشىلاردىڭ نازارىن مۇگەدەكتىگى بار ايەلدەرگە مەديتسينالىق قىزمەت كورسەتۋدىڭ پروبلەمالىق ماسەلەلەرىنە اۋداردى. ءوز كەزەگىندە ۇلتتىق كوميسسيانىڭ مۇشەسى, قوعام قايراتكەرى توعجان قوجالى شالعايداعى اۋىلداردا ايەلدەرگە كومەك كورسەتەتىن اكۋشەرلىك-گينەكولوگيالىق قىزمەتتەگى بىرقاتار ماسەلەلەردى اتاپ ءوتتى.
وڭىرلەردەگى اۋىلدىق اۋرۋحانالارعا, فەلدشەرلىك پۋنكتتەرگە بارىپ, وسى ماسەلەلەردى ەگجەي-تەگجەيلى زەردەلەگەن ۇلتتىق كوميسسيا ساراپشىلارى دەنساۋلىق ساقتاۋ مەنەدجەرلەرىمەن, دارىگەرلەرمەن جانە پاتسيەنتتەرمەن كەزدەسۋ بارىسىندا ايەلدەردىڭ رەپرودۋكتيۆتى دەنساۋلىعىن قورعاۋ ءۇشىن ينفراقۇرىلىمنىڭ ۇزدىكسىز جۇمىس ىستەۋ ماسەلەسىنە نازار اۋداردى.
كوميسسيا وتىرىسىندا ايەلدەر كونسۋلتاتسيالارى, پەرزەنتحانالار, وتباسىن جوسپارلاۋ كابينەتتەرى, اۋىلدىق اۋرۋحانالار, جاستار دەنساۋلىق ورتالىقتارى ادىستەمەلىك تۇرعىدا كومەك كورسەتۋدى قاجەت ەتەتىنى ايتىلدى.
سونداي-اق وتباسىن جوسپارلاۋ كابينەتتەرىنىڭ جەتكىلىكتى سانىنا قاراماستان, جۇكتىلىكتىڭ 40%-ى جوسپارلانباعانى, ال پرەگراۆيدارلىق دايىندىقتان وتكەن جۇپتاردىڭ ۇلەسى 30%-دان اسپايتىنى ءسوز بولدى. وسى تۇرعىدا اتالعان جۇمىستى ۇيىمداستىرۋدىڭ تاسىلدەرىن قايتا قاراۋ ۇسىنىلدى.
ازاماتتاردىڭ ءوز دەنساۋلىعىن ساقتاۋ مەن نىعايتۋدا جاۋاپكەرشىلىكتىڭ تومەندىگى وسى پروتسەسكە بارلىق ۋاكىلەتتى ورگانداردىڭ اتسالىسۋىن قاجەت ەتەدى. قوعامدىق ۇيىمدار, ساراپتامالىق جانە عىلىمي قوعامداستىق حالىق اراسىندا, ماقساتتى اۋديتوريالار اراسىندا ءتۇسىندىرۋ جۇمىستارىن جۇرگىزۋگە ءتيىس.
وتىرىستى قورىتىندىلاي كەلە, ۇلتتىق كوميسسيا توراعاسى دەنساۋلىق ساقتاۋ مينيسترلىگىنىڭ جەرگىلىكتى اتقارۋشى ورگاندارمەن, وقۋ-اعارتۋ, عىلىم جانە جوعارى ءبىلىم مينيسترلىكتەرىمەن بىرلەسىپ, فەرتيلدى جاستاعى قىزدار مەن ايەلدەردىڭ دەنساۋلىعىن ساقتاۋ, جاسوسپىرىمدەردىڭ رەپرودۋكتيۆتى دەنساۋلىعىن نىعايتۋ, سونداي-اق جاستاردى سانالى اتا-انا بولۋعا دايىنداۋ جونىندە شارالار كەشەنىن قابىلداۋ قاجەتتىگىن اتاپ ءوتتى.
ايتا كەتەيىك ۇلتتىق كوميسسيا ءجاسوسپىرىم قىزدارعا مەديتسينالىق قىزمەت كورسەتۋدىڭ جانە اكۋشەرلىك-گينەكولوگيالىق قىزمەتتىڭ وڭىرلىك دەڭگەيدە فەرتيلدى جاستاعى ايەلدەرمەن جۇمىستىڭ ەگجەي-تەگجەيلى مونيتورينگىن جالعاستىرادى.
