تۇركى دۇنيەسىنىڭ ابىرويىن كوتەرگەن جيىندا قازاقستان اتىنان مادەنيەت جانە اقپارات ءمينيسترى ايدا بالاەۆا ءسوز سويلەپ, ەلارالىق بايلانىسقا قاتىستى ورەلى پىكىر ءبىلدىردى. سونداي-اق ماڭىزدى فورۋمعا مادەنيەت, ءتىل-ادەبيەت, ەكولوگيا سالاسى وكىلدەرى, يۋنەسكو-نىڭ وڭىرلىك ماماندارى, كىتاپحانا باسشىلارى قاتىستى. ءوزارا ارىپتەستىك اياسىندا وتكەن باسقوسۋ قارىم-قاتىناستىڭ جاڭا دەڭگەيگە كوتەرىلگەنىن ايقىندادى.
اتالعان حالىقارالىق ءىس-شارا اياسىندا تۇرىكمەن عىلىم اكادەمياسى ماحتىمق ۇلى اتىنداعى ءتىل, ادەبيەت جانە ۇلتتىق قولجازبالار ينستيتۋتى «ماحتىمق ۇلى پىراعىنىڭ دانالىق قازىناسى» اتتى عىلىمي-تەوريالىق كونفەرەنتسيا وتكىزدى.
عىلىمي فورۋمعا قاتىسۋشىلار ماقتىمق ۇلى اتىنداعى مادەنيەت پاركى كەشەنىن تاماشالاپ, وسىندا ورناتىلعان الەمدىك 24 تۇلعانىڭ ەسكەرتكىشىمەن تانىستى. ولاردىڭ ىشىندە قازاقتىڭ ايگىلى كۇيشى-كومپوزيتورى قۇرمانعازى ەسكەرتكىشىنىڭ بوي تۇزەگەنىن ايتا كەتكىمىز كەلەدى. وسى پاركتىڭ جوعارعى جاعىنداعى قىراتتا ماقتىمق ۇلىنىڭ 60 مەترلىك تاستان سومدالعان بەينەسى مەنمۇندالاپ تۇر. اۆتورى – وسى ەلدىڭ اتاقتى سكۋلپتورى ساراگت باباەۆ.
«قازاق گازەتتەرى» سەرىكتەستىگىنىڭ باس ديرەكتورى ديحان قامزابەك ۇلى تۇركى ەلدەرى جانە باسقا دا شەتەلدىك عالىمدارىمەن, قايراتكەرلەرىمەن سۇحباتتاسىپ, قازاقستان مادەنيەتى مەن مەرزىمدى باسىلىمدارىن تانىمالداندىرۋ تۋرالى كەڭەستى. بۇلاردىڭ ىشىندە رەسەي, قىتاي, يران, اقش, تۇركيا, وڭتۇستىك كورەيا, گرۋزيا, ليتۆا, پولشا, قىرعىزستان, وزبەكستان, ازەربايجان, ت.ب. ەلدەردىڭ ادەبيەتتانۋشى, ءتىلشى, تاريحشى, ءماتىنتانۋشى, مادەنيەتتانۋشى, الەۋمەتتانۋشى, مەدياتانۋشى كاسىبي ماماندارى بولدى.
17 مامىردا «سپورت» قوناقۇيىنىڭ ءماجىلىس زالىندا «تۇرىكمەنستان» گازەتىنىڭ باس رەداكتورى كاكامۇرات رەجەپوۆپەن, «نەيترالنىي تۋركمەنيستان» گازەتىنىڭ باس رەداكتورى مايا اليموۆامەن, «گۇنەش» (بالالار جۋرنالى) باس رەداكتورى گۇلالەك باباەۆامەن كەزدەسىپ, قازاقستان مەن تۇرىكمەنستان تاريحي تۇلعالارىن تانىمالداندىرۋ تۋرالى ۋاعدالاستى. ارىپتەس ەلدىڭ گازەت باسشىلارى «قازاق گازەتتەرى» باسشىلىعىنىڭ: «تاريحتا ايرىقشا ورنى بار كەمى 20 تۇلعانى انىقتاپ, ءتۇرلى فورماتتا ناسيحاتتايىق. بۇگىنگى قوعامعا ەڭبەك ءسىڭىرىپ جاتقان دياسپورا وكىلدەرى كورسەتىپ وتىرايىق. قوس ەلدىڭ عىلىم, ءبىلىم, مادەنيەت, سپورت باعىتىنداعى ساڭلاقتارىن بىرلەسە جازايىق» دەگەن ۇسىنىسىن قولدادى. سونداي-اق الاش باسپاسوزىندە ورنى بار تۇرىكمەن قالامگەرى, عالىمى كۇمىشالي بوريەۆتى بىرلەسە ناسيحاتتاۋ ەكى ەل ءۇشىن دە ماڭىزدى ەكەنى ايتىلدى. باق باسشىلارى كەزدەسۋىندە بالالار سۋرەتشىلەرىنىڭ تاجىريبە الماسۋى, «مەنىڭ تۋعان ولكەم» تاقىرىبىندا قازاق-تۇرىكمەن وقۋشىلارىنىڭ ونلاين ەسسە بايقاۋىن وتكىزۋ ۇسىنىلىپ, قولداۋ تاپتى.
18 مامىردا «ماحتىمق ۇلى پىراعىنىڭ دانالىق قازىناسى» حالىقارالىق كونفەرەنتسياسىنىڭ نەگىزگى جۇمىس كۇنىندە اكادەميك د.قامزابەك ۇلى «تۇرىكمەن مادەني الەمىنىڭ بيىك قۇبىلىسى» اتتى بايانداما جاسادى. تۇستەن كەيىن وسى ەلدىڭ مادەنيەت ينستيتۋتىندا وتكەن «ماحتىمق ۇلى جانە ونىڭ زامانى» اتتى سەكتسيالىق جيىنىنا مودەراتورلىق ەتتى. وسى كۇنى تۇرىكمەنستاننىڭ «التىن عاسىر» تەلەارناسىنا سۇحبات بەردى.
