فوتو: nege.kz
16 مامىردا باستالعان نەگىزگى ۇبت-2024-ءتىڭ ءبىرىنشى اپتاسى اياقتالدى. عىلىم جانە جوعارى ءبىلىم مينيسترلىگى حابارلاعانداي, نەگىزگى ۇبت باستالعالى 30 مىڭنان استام تۇلەك سىناقتان ءوتتى. ونىڭ ىشىندە تالاپكەرلەردىڭ 69 پايىزى قازاق تىلىندە, 31 پايىزى ورىس تىلىندە, 40 ادام اعىلشىن تىلىندە تاپسىرعان.
«ۇبت باستالعالى بەرى شەكتى ۇپايدى تالاپكەرلەردىڭ 71 پايىزى جينادى. ورتاشا باللعا كەلەتىن بولساق, ول 64 باللدى قۇرادى. ەڭ جوعارى بالل – 136», دەپ اتاپ ءوتتى مينيسترلىك.
وسىلايشا, تەستىلەۋدەن وتكەندەردىڭ شامامەن 29 پايىزى شەكتى باللعا جەتە المادى, بۇل شامامەن 8700 ادام.
ەستەرىڭىزگە سالا كەتەيىك, تەستىلەۋگە قاتىسۋعا بارلىعى 186 مىڭ تالاپكەردەن 342 مىڭعا جۋىق ءوتىنىش قابىلدانعان. قازىرگى ۋاقىتتا تەستىلەۋگە قاتىسۋشىلاردىڭ ەڭ كوپ سانى, ياعني 20 پايىزى «شىعارماشىلىق ەمتيحان», 18 پايىزى «ماتەماتيكا-فيزيكا» پاندەرىنىڭ قوسىندىسىنان ءوتتى. تەست تاپسىرۋشىلاردىڭ 11 پايىزى «ماتەماتيكا-ينفورماتيكا» كومبيناتسياسىن تاڭداعان. حيميا-فيزيكا كومبيناتسياسىنا ەڭ از باسىمدىق بەرىلگەن - 45 ادام.
