قازاقستاندا زاڭ ءبىلىمىن دامىتۋدىڭ جاڭا تۇجىرىمداماسى تالقىلاندى

2024 جىلدىڭ 21-23 مامىر ارالىعىندا Maqsut Narikbayev University «قۇقىق» باعىتى بويىنشا وقۋ-ادىستەمەلىك بىرلەستىك ۇيىمداستىرعان سەسسيا الاڭىنا اينالدى.

Maqsut Narikbayev University-دە جوعارى جانە جوعارى وقۋ ورنىنان كەيىنگى ءبىلىم كوميتەتى ۇيىمداستىرعان «قۇقىق» باعىتى بويىنشا ءواب شەڭبەرىندە زاڭگەرلىك ءبىلىم بەرۋدى دامىتۋ تۇجىرىمداماسىن ازىرلەۋ جونىندەگى ستراتەگيالىق سەسسيانىڭ اشىلۋى ءوتتى. بۇل سەسسيا قازاقستاندا زاڭ ءبىلىمىن دامىتۋدىڭ جاڭا تۇجىرىمداماسىن تالقىلاۋعا جانە ازىرلەۋگە ارنالعان.

ستراتەگيالىق سەسسيانىڭ ماقساتى الداعى جىلدارعا قۇقىقتىق ءبىلىم بەرۋدى دامىتۋدىڭ نەگىزگى باعىتتارى مەن باسىمدىقتارىن ايقىندايتىن بىرىڭعاي تۇجىرىمداما ازىرلەۋ.

اتالعان سەسسيا جۇمىسىنا قۇقىق سالاسىنداعى جەتەكشى ماماندار, اكادەميالىق قوعامداستىق وكىلدەرى, ءبىلىم بەرۋ سالاسىنىڭ جانە مەملەكەتتىك ورگانداردىڭ ساراپشىلارى, سونداي-اق 52 جوعارى وقۋ ورىندارى مەن ۆەدومستۆالىق وقۋ ورىندارىنىڭ وكىلدەرى قاتىسادى. اتاپ ايتقاندا, قر باس پروكۋراتۋراسى جانىنداعى قۇقىق قورعاۋ ورگاندارى اكادەمياسى, قر جوعارى سوت كەڭەسى جانىنداعى سوت تورەلىگى اكادەمياسى جانە قر ءىىم قاراعاندى اكادەمياسى.

«وسى ۋنيۆەرسيتەتتەگى ءاربىر ادامدى ورتاق ءبىر ميسسيا بىرىكتىرەدى – ساپالى ءارى قولجەتىمدى ءبىلىم بەرۋ ارقىلى حالىققا قىزمەت ەتۋ. بۇل ءبىزدىڭ ۇستاناتىن ميسسيامىز. سوندىقتان بۇگىن وسى جەردە جينالىپ وتىرعانىمىز دا بەكەر ەمەس. سەبەبى كەلەشەكتە ءبىزدىڭ ستۋدەنتتەر العان بىلىمدەرى مەن داعدىلارىن قوعامنىڭ يگىلىگى ءۇشىن قولداناتىن بولادى», دەدى ءواب-ءنىڭ «قۇقىق» باعىتى بويىنشا توراعاسى تالعات نارىكباەۆ.

قر عجبم جوعارى جانە جوعارى وقۋ ورنىنان كەيىنگى ءبىلىم كوميتەتى توراعاسىنىڭ ورىنباسارى گۇلجان جاراسوۆا ءوز سوزىندە سەسسيانىڭ ءۇش كۇنى ىشىندە ازىرلەيتىن قۇجات رەسپۋبليكالىق وقۋ-ادىستەمەلىك كەڭەسكە ماۋسىم ايىندا بەكىتۋگە ۇسىنىلاتىنىن ايتتى. ول سونداي-اق بۇل قۇجات قۇقىق سالاسى باعىتىنا كادرلار دايارلاۋ ءۇشىن جاۋاپكەرشىلىكتى ءوز موينىنا العان ءاربىر جوو-نىڭ جۇمىس ۇستەل كىتابى بولاتىنىن اتاپ ءوتتى.

سونىمەن قاتار سەسسيا شەڭبەرىندە قاتىسۋشىلار زاڭگەرلىك ءبىلىم بەرۋ جۇيەسىنىڭ الدىندا تۇرعان بارلىق نەگىزگى ماسەلەلەر مەن سىن-قاتەرلەردى تالقىلادى, سونداي-اق ولاردى شەشۋ ءۇشىن ناقتى قادامدار ۇسىندى. زاڭگەرلىك ءبىلىم بەرۋ ساپاسىن ارتتىرۋ, ءبىلىم بەرۋ باعدارلامالارىن جاڭعىرتۋ جانە وقىتۋدىڭ يننوۆاتسيالىق ادىستەرىن ەنگىزۋ ماسەلەلەرىنە ەرەكشە نازار اۋدارىلدى.

«وسى ءۇش كۇن ىشىندە بارشاڭىز بەلسەندى تۇردە ءبىلىم الىپ, جۇمىس ىستەۋدىڭ ارقاسىندا ناتيجەلى ۋاقىت وتكىزدىڭىزدەر. پىكىر الماسىپ, بارلىق يدەيالارىڭىزدى قامتيتىن جانە دامۋدىڭ كەلەسى قادامدارىن انىقتايتىن جوبا قۇجاتىن جاسادىڭىزدار», دەدى قر عجبم جوعارى جانە جوعارى وقۋ ورنىنان كەيىنگى ءبىلىم كوميتەتى توراعاسى گۇلزات ىزباسارقىزى كوبەنوۆا.

سەسسيا قورىتىندىسى بويىنشا قر عجبم جوعارى جانە جوعارى وقۋ ورنىنان كەيىنگى ءبىلىم كوميتەتى توراعاسى اتىنان قاتىسۋشىلارعا سەسسيادان وتكەنى تۋرالى سەرتيفيكاتتار تابىس ەتىلدى.

ستراتەگيالىق سەسسيانىڭ قورىتىندىلارى تۇجىرىمدامانىڭ سوڭعى نۇسقاسىن قالىپتاستىرۋ كەزىندە ەسكەرىلەدى.