قۇرامىندا رۋسلان قۇربانوۆ, ەلمير ءالىمجانوۆ, ۆاديم شارلايموۆ جانە ەرلىك سەرتاي سىندى نوياندارى بار ءبىزدىڭ كوماندا باستاپقى باسەكەلەردە يسپانيا (45:24) مەن ۋكراينادان (45:37) باسىم تۇسسە, جارتىلاي فينالدا فرانتسياعا (37:45) جول بەردى. ال قولا مەدال ءۇشىن تارتىستا الەم چەمپيوندارى دەگەن اتاعى بار يزرايلدەن (45:29) باسىم ءتۇستى. ءسويتىپ, جەرلەستەرىمىز قولا مەدالدى مويىندارىنا ءىلدى.
– قازاقستاننىڭ شپاگاشىلارى جاڭا دەڭگەيگە كوتەرىلدى. جەرلەستەرىمىز فرانتسيا, جاپونيا, يتاليا, ماجارستان سەكىلدى مەملەكەتتەردىڭ نوياندارىمەن بىرگە جەر-جاھانداعى ەڭ مىقتى كوماندالاردىڭ ساناتىنا قوسىلدى. وزدەرىڭىز بايقاساڭىزدار, ۇزدىك ۇشتىكتىڭ قاتارىنان كورىنۋ ءبىزدىڭ جىگىتتەر ءۇشىن تۇراقتى كورسەتكىشكە اينالىپ وتىر. بيىلعى ماۋسىمدا وتكەن جەتى كوماندالىق ءتۋرنيردىڭ تورتەۋىندە وتانداستارىمىزدىڭ جەڭىس تۇعىرىنا كوتەرىلۋى – وسى ءسوزىمىزدىڭ ايقىن دالەلى. اتاپ ايتساق, ىستانبۇلداعى الەم كۋبوگىنىڭ كەزەڭدىك سايىسىندا – التىن, قىتايداعى ازيا چەمپيوناتىندا – كۇمىس, تبيليسي مەن پاريجدە وتكەن ءدۇبىرلى دودالاردا قولا مەدالدى يەلەندىك. سونداي-اق بىلتىر حانچجوۋدا الاۋى تۇتانعان ازيا ويىندارىن دا ەستەن شىعارماعان ابزال. اتالعان جارىستا وتانداستارىمىز جاپونيا قۇراماسىنان ءبىر عانا ۇپاي ايىرماشىلىعىمەن ۇتىلىپ, كۇمىسپەن كۇپتەلدى, – دەيدى قازاقستان قۇراماسىنىڭ مەملەكەتتىك جاتتىقتىرۋشىسى تيمۋر بايتاسوۆ.
