الماتى قالاسىنىڭ اكىمى ەربولات دوساەۆتىڭ ايتۋىنشا, قاناتقاقتى رەجىمدە ىسكە قوسىلاتىن «Mass Alert» جەلىگە قوسىمشا جۇكتەمە تۋعىزبايدى. «Cell Broadcast» تەحنولوگياسىنىڭ كومەگىمەن جۇزەگە اساتىن «Mass Alert» جۇيەسى ابونەمەنتكە جەر سىلكىنىسىنىڭ بولاتىنى تۋرالى شۇعىل حابارلاما جەتكىزۋدە زاماناۋي مۇمكىندىكتەرىمەن ەرەكشەلەنەدى.
وسى رەتتە عيماراتتاردىڭ سەيسميكالىق جاعدايىنا بايلانىستى ىسكە اسىپ جاتقان شارالارعا توقتالعان ونەركاسىپ جانە قۇرىلىس ءمينيسترى قانات شارلاپاەۆ سەيسميكالىق دەڭگەيى 7-9 بالل بولاتىن الاڭداردا تۇرعىن ۇيلەر مەن الەۋمەتتىك نىساندار سالۋ كەزىندە سەيسميكالىق وقشاۋلاۋدىڭ مىندەتتى جۇيەسى ەنگىزىلەتىنىن حابارلادى. وسىعان بايلانىستى نورماتيۆتىك-تەحنيكالىق قۇجاتتارعا ءتيىستى تۇزەتۋلەر ازىرلەندى. وسى ورايدا ۆيتسە-پرەمەر قانات بوزىمباەۆ حالىقارالىق تاجىريبەنى, ونىڭ ىشىندە جاپون ەلىنىڭ تاجىريبەسىن ەسكەرە وتىرىپ, سەيسميكالىق قاۋىپتى وڭىرلەردەگى نىسانداردى جوبالاۋ كەزىندە نورمالاردى قاتاڭداتۋدى, سونداي-اق ولاردىڭ اككرەديتتەلگەن زەرتحانالاردى قولدانۋمەن سايكەستىگىن قاداعالاۋدى كۇشەيتۋدى تاپسىردى.
سەيسمولوگيالىق باقىلاۋ جانە زەرتتەۋ ۇلتتىق عىلىمي ورتالىعىنىڭ ديرەكتورى داۋلەت سارسەنباەۆتىڭ ايتۋىنشا, بىلتىر سەيسموستانسالاردى جوندەۋ ءۇشىن جارتى ميلليارد تەڭگەدەن استام قارجىعا جابدىقتار ساتىپ الىنعان. نىسانالى قارجىلاندىرۋ باعدارلاماسى بويىنشا 25 باقىلاۋ بەكەتى اشىلدى. سونىمەن قاتار 10 ستانسا ءىشىنارا جاڭعىرتىلىپ, التىسى جاڭادان ىسكە قوسىلدى. تۇرعىندار مەن زاڭدى تۇلعالاردىڭ وتىنىشتەرى بويىنشا 23 قاڭتارداعى جەر سىلكىنىسىنەن كەيىن 183 نىسانعا تەكسەرۋ جۇرگىزىلگەن. ال 4 ناۋرىزداعى جەر سىلكىنىسىنەن كەيىن تۇسكەن وتىنىشتەرگە سايكەس 300-دەن استام نىساندى كەشەندى زەرتتەۋ باستالىپ, بيىلعى جىلدىڭ سوڭىنا دەيىن 13 مىڭنان استامىنا سەيسمو-اۋديت جۇرگىزۋ جوسپارلانىپ وتىر.
الماتى
