وبلىس اكىمىنىڭ ورىنباسارى مارات مۋرزيەۆتىڭ ايتۋىنشا, قۇلسارى قالاسىندا تاسقىننان كەيىنگى سۋدى سورۋ جۇمىسىنا توتەنشە جاعدايلار مينيسترلىگىنەن 159 مامان, 27 ارنايى تەحنيكا تارتىلىپ وتىر. بۇل جۇمىسقا «جىلىوي تازالىق» جشس-دان 18 ۆاكۋم بولىنگەن.
«مامىردىڭ ورتاسىنا دەيىن قۇلسارى قالاسىنىڭ تۇرعىن ۇيلەرى مەن كوشەلەرىنەن 5,6 ملن تەكشە مەتر سۋ سورىلدى. وسى جۇمىستىڭ ناتيجەسىندە 2 906 تۇرعىن ءۇي سۋدان قۇرعاتىلدى. قازىر اۋدان ورتالىعىندا قۇرىلىسى ءالى تولىق اياقتالماعان 14 تۇرعىن ءۇي مەن 7 بيزنەس نىسان ءالى كۇنگە دەيىن سۋ ورتاسىندا قالىپ تۇر», دەدى م.مۋرزيەۆ.
«جىلىوي تازالىق» جشس ديرەكتورى باۋىرجان ابدۋراحمانوۆتىڭ دەرەگىنە قاراعاندا, سۋ تاسقىنىنان كەيىن 4 689 توننادان اسا قوقىس شىعارىلعان. قوقىس ارنايى پوليگونعا جيناقتالادى. ارنايى تەحنيكالار تاۋلىگىنە 50 رەيس جاسايدى.
«كۇن سايىن 5 بريگادا قوقىس جيناۋعا جۇمىلادى. بريگادالار تاڭەرتەڭگى ساعات 08.00-دەن كەشكى ساعات 20.00-گە دەيىن جۇمىس ىستەيدى. ويتكەنى ءبىزدىڭ مىندەتىمىز – ۇيلەر مەن اۋلالاردى قوقىستان تەز تازارتۋ. وسىلايشا, تۇرعىنداردىڭ جوندەۋ جۇمىستارىن جۇرگىزىپ, ۇيلەرىن رەتكە كەلتىرۋىنە قولايلى جاعداي جاساۋىمىز كەرەك. قۇلسارى قالاسىنداعى سۋ باسقان ۇيلەردەن كەي كۇنى 1,7 تونناعا دەيىن تۇرمىستىق قالدىقتار جينالادى. جاقىندا ءبىر كۇندە سۋ باسقان اۋلالاردان 10 توننادان اسا قوقىس پەن تۇرمىستىق قاتتى قالدىقتار شىعارىلدى», دەيدى سەرىكتەستىكتىڭ ۋچاسكە باسشىسى اسقار تەمىرجان.
اتىراۋ وبلىسى
