«قازاقستاننىڭ جەتەكشى ونەر مۋزەيىنىڭ قورىنان جاپون ونەرىنىڭ كاتالوگىن باسىپ شىعارۋ ەكى ەل اراسىنداعى حالىقارالىق مادەني ءىس-قيمىلدى نىعايتۋ مەن جانداندىرۋعا سەپتىگىن تيگىزەدى دەگەن ۇمىتتەنەمىز», – دەدى مۋزەي ديرەكتورى گۇلايىم جۇمابەكوۆا.
جاپون ونەرىن قامتىعان جيناققا 250 شىعارما توپتاستىرىلدى. تۋىندىلاردىڭ كوپشىلىگى مۋزەي قورىنا مەملەكەتتىك شىعىس ونەرى مۋزەيىنەن, قازاقستان مەملەكەتتىك ورتالىق مۋزەيىنەن, تسەلينوگراد وبلىستىق تاريحي-ولكەتانۋ مۋزەيىنەن, تاعى باسقا ونەر وشاقتارىنان 1936 جىلدان باستاپ تاپسىرىلا باستاعان. مۋزەيدىڭ عىلىمي قىزمەتكەرلەرى جاپون تاقىرىبىنداعى تۋىندىلاردى زەرتتەي كەلە, «جاپون ونەرى. XVII-XXI عاسىرلار» اتتى جاڭا كاتالوگتى ازىرلەۋگە جۇمىلىپ, 150 جىلدىق تاريحى بار, كەڭسە جانە كاسىبي تسيفرلاندىرۋ سالاسىنداعى الەمدىك كوشباسشى Konica Minolta Kazakhstan كومپانياسىنىڭ قولداۋىمەن جارىققا شىعارىپ وتىر. «العاش كوپشىلىك نازارىنا مۋزەي قورىنان ۇسىنىلىپ وتىرعان جاپون ساندىك قولدانبالى ونەرى, ءمۇسىن جانە گرافيكا توپتاماسى ونەرتانۋشىلار, مۋزەي قىزمەتكەرلەرى, ماماندار مەن ونەردى باعالايتىن بارشا وقىرماندارعا شابىت بەرىپ, تىڭ يدەيالاردىڭ باستاماشىسى بولا وتىرىپ, قازاقستان مەن جاپونيا اراسىنداعى دوستىق قارىم-قاتىناستى نىعايتۋعا قوسقان ۇلەس بولاتىنىنا شىن جۇرەكتەن سەنەمىز», – دەدى ورتالىق ازياداعى Konica Minolta Kazakhstan وكىلدىگىنىڭ باسشىسى پاۆەل شالاگينوۆ.
سونداي-اق كاسىبي مەرەكە كۇنگى اۋقىمدى ءىس-شارا ايگىلى جاپون سۋرەتشىسى كاورۋ ءموريدىڭ تۋىندىلارىنا ارنالعان «قالىڭدىقتىڭ حيكاياسى» تاقىرىبىنداعى مانگا كورمەسىمەن ساباقتاستى. كورمە ەكسپوزيتسياسى ورتالىق ازيانىڭ ەرەكشە مادەنيەتى مەن ءومىر سالتىن كورسەتەتىن اسەرلى وقيعالار مەن قىزىقتى كەيىپكەرلەردى سيپاتتايدى. مانگا – جاپون ونەرىن دارىپتەۋ ماقساتىنداعى XIX عاسىردىڭ ورتاسىندا باستاۋ العان ەرەكشە باعىت. XIX عاسىرداعى ورتالىق ازيانىڭ مادەنيەتى مەن ءداستۇرىن, وتباسىلىق قارىم-قاتىناسىن جانە باي مۇراسىن كاورۋ موري كەرەمەت مانگا ونەرى ارقىلى تانىستىرادى. XIX عاسىرداعى كوشپەلىلەر تاريحىمەن تانىسۋعا شاقىرعان اۆتوردىڭ بۇل تاراپتا ايتارى از ەمەس. كاورۋ موري ورتا ازيانىڭ ءومىرىن, پەيزاجدارى مەن ساۋلەتىن, وسى جەرلەردى مەكەندەگەن كوشپەلى رۋلار مەن قالا تۇرعىندارىنىڭ ءومىرىن اسقان شەبەرلىكپەن تارتىمدى بەينەلەيدى. كورمەنىڭ جەتەكشىسى ازات ديداردىڭ ايتۋىنشا, «قالىڭدىقتىڭ حيكاياسى» سەرياسى 2008 جىلدان باستاپ Aokishi (Kadokawa) مانگا جۋرنالىندا جاريالانا باستاعان. بۇگىندە 14 تومى جارىق كوردى, بىرنەشە تىلگە اۋدارىلىپ, الەمگە كەڭىنەن تانىلدى. سەريا كوپتەگەن وتاندىق جانە حالىقارالىق ماراپاتتارعا قول جەتكىزدى, سونىڭ ىشىندە 2014 جىلى Manga Awards سىيلىعىنىڭ باس جۇلدەسىن يەلەندى. 2022 جىلى جاپونيا مەن ورتالىق ازيانىڭ بەس ەلى اراسىنداعى ديپلوماتيالىق قارىم-قاتىناستاردىڭ ورناعانىنا 30 جىل تولۋىنا ارنالعان مەرەيتويلىق جوبا اياسىندا «قالىڭدىقتىڭ حيكاياسى» كيوتوداعى حالىقارالىق مانگا مۋزەيىندە كورمەگە قويىلدى.
«قالىڭدىقتىڭ حيكاياسى» مانگا كورمەسى «كادوكاۆا» كورپوراتسياسىنىڭ جانە قازاقستان رەسپۋبليكاسىنداعى جاپون ەلشىلىگىنىڭ قولداۋىمەن ۇيىمداستىرىلدى. مەرەكەلىك ءىس-شارا سەرىكتەسى «يچيكاۆا» جاپون ورتالىعى جانە ءال-فارابي اتىنداعى قازۇۋ-دىڭ شىعىس تىلدەرى كافەدراسىنىڭ ۇيىتقى بولۋىمەن وريگامي, كالليگرافيا, جاپون ءتىلىن ۇيرەنۋ, جىپتەن شار جاسايتىن تەماري ونەرى بويىنشا شەبەرلىك ساباقتارى تەگىن وتكىزىلدى.
الماتى
