تىرشىلىگى قايناعان ءوڭىر

سۋدى ۇنەمدەيتىن جاڭا تەحنولوگيا

وندىرىستىك تەحنيكا 3 مىڭ شارشى مەتر اۋماققا ورنالاستىرىلعان. بۇل – ەلىمىزدە سۋ ۇنەمدەۋ تەحنولو­گيالارىن كەڭىنەن قولدانۋ ءۇشىن سۋ شاشىراتقىش ماشينالاردىڭ تولىق تسيكلىن ءوندىرۋدى جولعا قويۋعا مۇمكىندىك بەرەتىن ءىرى جانە كوپ ميل­لياردتىق ينۆەستيتسيالىق جوبا. الايدا بۇگىنگى تاڭدا كومپا­نيا قازاقستان رەزيدەنتى رەتىندە كۇشتى سا­لىق جۇكتەمەسىنە تاپ بولىپ وتىر. كاسىپ­ورىن ديرەكتورى نيا­زالي بەي­سەنباەۆتىڭ ايتۋىنشا, نارىق­تا ۇسى­نىلعان شەتەلدىك كوم­پا­نيا­­لار­دىڭ بۇل تۇرعىدا بىر­­قاتار ارتىقشىلىعى بار. مىسا­لى, قازاقستان رەزيدەنتى ەمەس كوم­پانيا­مەن جاسالاتىن كەلىسىمشارت­تاردىڭ كوپ­شىلىگى ققس جانە باسقا دا مەم­لەكەتتىك باج سالىقتارىنان بوساتىلعان.

«قازاقستانعا ءوز وندىرىسىندەگى جاڭبىرلاتقىش ماشينالار قاجەت ەكەنى ءسوزسىز. ءبىز وتاندىق وندىرۋشىگە باسقا وڭىرلەردە سۋ ۇنەمدەۋ تەحنولوگيالارىن ەنگىزۋ ءۇشىن تەحنيكا ساتىپ الۋ بولىگىندە قولداۋ كورسەتەمىز. ققس تولەۋگە كەلەتىن بولساق, اۋىل شارۋاشىلىعى مي­نيسترلىگىنە بۇل ماسەلەنى تەزىرەك شەشۋ ءۇشىن بارلىق مۇددەلى مەم­لەك­ەتتىك ورگانمەن كەڭەس وتكىزۋ­دى تاپ­سىرامىن», دەپ جاۋاپ بەردى كاسىپ­ورىن ديرەكتورىنا س.جۇمانعارين.

جالپى, تامشىلاتىپ سۋارۋ جانە ەليتالىق سۇرىپتاردىڭ تۇقى­مىن سەبۋ نەگىزىندە ماقتا-توقى­ما كلاستەرىن قۇرۋ ماقتا وسىرۋگە ارنال­عان اۋماقتى قىسقارتۋعا جانە قازىرگى زامانعى ستاندارتتارداعى توقىما ءوندىرىسى ءۇشىن جوعارى ساپالى شيكىزات جيناۋدى بىرنەشە ەسە ارتتىرۋعا مۇمكىندىك بەرەدى. ءوز كەزەگىندە جاڭبىرلاتقىش ماشينالار ءوندىرىسى ەكستەنسيۆتى ەگىنشىلىكپەن اۋماقتى ازايتۋعا جانە ىلعال سۇيگىش داقىلداردىڭ ونىمدىلىگىن ارتتىرۋعا كومەكتەسەدى.

ەكىنشى ءىرى ونەركاسىپ نىسانى – «Lihua Spinning Technology Co., Ltd» جشس تارتىلعان «تۇركىستان» اكك مەن «التىن دالا ماقتا»  جشس بىرلەسكەن جوباسى, كەڭەسشى رەتىندە قىتايلىق ماقتا-توقىما كلاستەرى. جوعارى ساپالى شيكىزاتتى وسىرۋدەن باستاپ, جۇقا ماتادان جاسالعان كيىمدەر مەن جوعارى ساپالى ءۇي توقىما بۇيىمدارىن وڭدەۋ مەن وندىرۋگە دەيىن ءوندىرىستىڭ تولىق تسيكلىن قۇرۋدى قامتاماسىز ەتەدى. كاسىپورىن وبلىستا العاش رەت تامشىلاتىپ سۋارۋ جۇيەلەرىن ورناتىپ, 1 مىڭ گەكتاردان استام اۋماققا ماقتانىڭ ەليتالىق سۇرىپتارىنىڭ تۇقىمىن سەپتى. مۇندا جەرگىلىكتى تۇرعىندار اراسىنان 50-دەن استام ادام جۇمىس ىستەپ جاتىر. كەزەڭ-كەزەڭمەن پلاستيكالىق قۇبىرلار, تامشىلاتىپ سۋارۋ جۇيەلەرى, ماقتا وڭدەۋ بويىنشا ەكى زاۋىت, ءيىرۋ, توقۋ فابريكالارى جانە كلاستەر­دىڭ باسقا دا جوسپارلانعان وبەك­تى­لەرىن وندىرەتىن زاۋىتتى پاي­دالانۋعا بەرە وتىرىپ, كاسىپ­ورىن 4 مىڭنان استام جۇمىس ورنىن قۇرىپ, ال تۇتىنۋشىلاردى – جوعا­رى ساپالى ماتالارمەن جانە توقى­ما ونىمدەرىمەن قامتاماسىز ەتەدى.

90%-دان استام جەر ماروككو شەگىرتكەسىنە قارسى وڭدەلدى

سونىمەن قاتار پرەمەر-ءمينيستردىڭ ورىنباسارى تۇركىستان وبلىسىنداعى شەگىرتكەگە قارسى جاپ­پاي وڭدەۋ جۇمىستارى جۇر­گىزىلىپ جاتقان اۋدانداردىڭ ەگىس القاپتارىن ارالاپ كوردى.

تۇركىستان وبلىسى ەگىستىك القاپ­تارىنىڭ كولەمى بويىنشا ەلىمىزدەگى توپ-3 ايماق قاتارىنا كىرەدى. ءوڭىر ءبىرىنشى بولىپ شەگىرتكەنىڭ ەڭ قاۋىپتى ءتۇرى  – ماروككو شەگىرتكەسىنە قارسى بەلسەندى كۇرەس كەزەڭىن باستادى.

بارلىعى 272 مىڭ گەكتار جەر وڭدەلەدى. ونىڭ  252 مىڭ گەكتارى 19 مامىرعا دەيىن وڭدەلدى, بۇل وڭدەۋ جۇمىستارى جوسپارلانعان جەردىڭ 93%-ى. قالعان 20 مىڭ گەكتاردا تاياۋ كۇندەرى وڭدەۋ جۇمىسى اياقتالادى.

وڭىردەگى ۇلكەن القاپتاردى وڭدەۋ جۇمىستارىنا 360-تان استام ادام تارتىلعان. ولاردىڭ قاتا­رىن­دا تۇركىستان جانە باسقا دا وبلىس­تاردىڭ اۋدان-قالالارىنان كەل­گەن ينسپەكتورلار, ماماندار, بولجاۋ ورتالىعىنىڭ قىزمەتكەرلەرى, سونداي-اق ماسەلەگە بەيجاي قارامايتىن جەرگىلىكتى تۇرعىندار دا بار. جۇمىستار جاياۋ, كولىكتە, ۇشاقتار مەن دروندار ارقىلى جۇرگىزىلىپ جاتىر. بارلىعى 162 مىڭ گا جەردەن, 107 مىڭ گا اۋادان, 1 مىڭ گا ريۋكزاك تۇرىندەگى بۇرىككىشپەن, 1,4 مىڭ گا دروندار ارقىلى وڭدەلۋدە.

سەرىك جۇمانعارين شەگىرتكەگە قارسى وڭدەۋ مەحانيزمدەرى مەن ادىستەرىن زەرتتەپ, زيانكەستەرگە قارسى جۇمىستاردىڭ بارلىق تسيكلىن جۇرگىزەتىن مەردىگەرلەرمەن پرەپاراتتاردى جەتكىزۋ, ساقتاۋ جانە وڭدەۋ جۇمىستارى جونىندە پىكىر الماستى.

ەسكە سالا كەتەيىك, تۇركىستان وبلىسىندا بۇكىل قىزمەت تسيكلىن ءبىر مەردىگەردىڭ كورسەتۋى قاناتقاقتى جوبا رەتىندە سىناقتان ءوتىپ جاتىر. كەلەر جىلى ەلىمىزدە شەگىرتكە­گە قارسى كۇرەس قىز­مەتتەرىن ورتالىقتاندىرىلعان بىرىڭعاي جۇيەدە ساتىپ الۋعا كوشۋ جوسپارلانىپ وتىر.