تاياۋدا تابيعات جاناشىرلارى قولدىڭ سالاسىنداي اق قايىڭدار مەن ماڭگى جاسىل قاراعايلار كومكەرگەن بۋراباي باۋرايىن, ءبىر شوكىم گاۋھارداي مولدىرەپ جاتقان كۇمىس كولدەردىڭ جاعالاۋلارىن تازالاۋعا قاتىستى. جالپاق جۇرتتى جۇمىلدىرعان «تازا قازاقستان» رەسپۋبليكالىق اكتسياسى اياسىندا قىرۋار جۇمىس تىندىرىلدى.
– ء«مولدىر بۇلاق» اكتسياسىنا ستۋدەنتتەر مەن ەرىكتىلەر, مەديتسينا جانە ءبىلىم مەكەمەلەرى قىزمەتكەرلەرى مەن مەملەكەتتىك قىزمەتشىلەر قاتىسىپ جاتىر. ءتىپتى وزدەرىنىڭ جۇرەك قالاۋى بويىنشا تۋعان جەردىڭ ءوڭىن كەلتىرۋگە اتسالىسىپ جاتقان بىلايعى ادامدار دا از ەمەس. بۋراباي باۋرايىنا جاز ماۋسىمىندا ميلليوننان استام ادام كەلەدى, – دەيدى بۋراباي اۋدانىنىڭ اكىمى اراي سادىقوۆ, – مۇنشاما ادام جۇرگەن كەزدە تازالىق ساقتاۋ دا وڭاي ەمەس. «تازا قازاقستان» ەكولوگيالىق اكتسياسى باستالعالى 12 تونناعا جۋىق قوقىس شىعارىلدى. بيىل 400-دەن استام جاڭا كونتەينەرلەر ورناتپاقپىز.
جادىراعان جاز ايلارىندا بۇل وڭىردە ءسال عانا اسىرەلەپ ايتقاندا, ينە شانشار جەر تابا المايسىز. تۋريزم تابىس كوزى بولعانىمەن, جەرگىلىكتى جۇرت تۇمسا تابيعاتتىڭ اي جۇزىنە كىرەۋكە تۇسپەي, بالاۋسا كۇيىندە ساقتالىپ قالعاندىعىن قالايدى.
– اسىرەسە بۋراباي وزەندەرى مەن كولدەرىنىڭ جاعالاۋلارى تازالاۋدى قاجەت ەتەدى, – دەيدى «وقجەتپەس» دەمالىس ءۇيىنىڭ بۋحگالتەرى ايسۇلۋ نۇرقانوۆا, – دەمالىس ماۋسىمىنا ءالى ءبىراز ۋاقىت بولعانىمەن, قازىردىڭ وزىندە مۇنتازداي تازالاپ, جارقىراتىپ قويعان ءجون. ەڭ باستىسى, بۋرابايدىڭ ساف اۋاسىن جۇتىپ, ءمولدىر سۋىنا شومىلعىسى كەلەتىن دەمالۋشىلاردىڭ وزدەرى تازالىق ماسەلەسىنە كوڭىل بولسە دەيسىڭ.
اكتسياعا بۋراباي باۋرايىنىڭ تۇرعىندارى عانا ەمەس, وبلىستىڭ وزگە وڭىرلەرىنەن دە كەلگەن تابيعات جاناشىرلارى ورتاق ىسكە جۇمىلا كىرىسىپ, كوپ-كورىم ەڭبەك ەتتى.
مۇنداي شارۋا كوكشەتاۋ قالاسىندا دا ۇيىمداستىرىلدى. قالانى قاق جارىپ وتەتىن شاعالالى وزەنىنىڭ جاعالاۋلارى, قوپا كولىنىڭ جيەگى تازارتىلدى. ال اتباسار اۋدانىنداعى نوۆوسەلسكوە اۋلىنىڭ تۇرعىندارى جىلاندى وزەنىنىڭ جاعالاۋىن تازارتسا, سەرگەەۆ سەلولىق وكرۋگىنىڭ تۇرعىندارى ەسىل وزەنىنىڭ قوس قاپتالىن مۇنتازداي ەتتى. ارشالى اۋدانىندا دا كىشى جانە ۇلكەن سارىوبا, اناركول كولدەرىنىڭ ماڭايى تازارتىلدى. 12 شاقىرىم قاشىقتىق كورەر كوزگە ءبىر جاسارىپ قالدى. تابيعات جاناشىرلارى الپىس توننادان استام تۇرمىستىق قالدىقتاردى جيناپ, پوليگونعا جەتكىزدى.
دەمالىس كۇندەرى 250 مىڭنان استام اقمولالىقتار تازالىق جۇمىسىنا قاتىستى.
اقمولا وبلىسى,
بۋراباي اۋدانى
