«ەلۋ جىلدا ەل جاڭا» دەيدى حالقىمىز. وسىدان 74 جىل بۇرىنعى سويقان سوعىستىڭ زاردابى جويىلىپ, زامانىمىز جاڭاردى, ۇرپاق اۋىستى, ورتا تولىپ, كوڭىل بۇتىندەلدى. ول جاقسى كۇننىڭ ساعاتى سوققانىنا بيىل – 70 جىل. بىراق, جۇرەكتەن جارا جازىلسا دا, جادىدان جاڭعىرىق جوعالعان جوق. «ەشقاشان سوعىس بولماسىن!» دەيتىن بەيبىتشىلىكسۇيگىش حالقىمىز سول ءبىر سۇراپىلدىڭ ورتاسىنان امان-ەسەن ورالعان ارداگەرلەردى قۇرمەت تۇتۋمەن قاتار, ولاردىڭ ءورشىل, ەرجۇرەك رۋحىن ۇلگى-ونەگە تۇتادى.
ارداگەرلەردى ارداقتاپ, جاستاردى جىگەرلىلىككە شاقىراتىن «جەڭىسكە –قۇرمەت» مارافونى ماڭعىستاۋ وبلىسىندا جالعاسىن تاپتى. تولقىنى تىنىمسىز الاسۇرعان كاسپي تەڭىزىنىڭ جاعالاۋىنداعى الاڭعا جەڭىس قۋانىشىنا ءۇن قوسقان ۇرپاق جيىلدى. ولاردىڭ اراسىندا اسكەري قىزمەتكەرلەر, جاس ساربازدار, قالا تۇرعىندارى مەن بيلىك وكىلدەرى بار.
– حالقىمىزدىڭ ەرجۇرەك ۇلاندارى قان مايداندا ەرلىكپەن سوعىستى. ورتاق جەڭىسكە لايىقتى ۇلەس قوستى. جۇزدەگەن قاھارمان جاۋىنگەرلەرىمىز ءوز ەسىمدەرىن تاريحقا وشپەستەي جازىپ كەتتى. ولاردىڭ ىشىندە ماڭعىستاۋلىق باتىرلاردى ءبىز ماقتانىشپەن اتايمىز. بۇگىنگى يگى شارانىڭ باستى سەبەبى – «جەڭىسكە – قۇرمەت» اكتسياسى اياسىندا بارشا ارداگەرلەرگە قۇرمەت كورسەتۋ, ۇلىقتاۋ, ەرلىكتەرىن جاستارعا جەتكىزۋ, – دەدى اسكەري-پاتريوتتىق شارادا ءسوز العان ماڭعىستاۋ وبلىسى اكىمىنىڭ ورىنباسارى ءا.شوجەعۇلوۆ.
الاڭدا ساپ تۇزەگەن اسكەريلەردىڭ, قىلشىلداعان جاس جاۋىنگەرلەردىڭ وتكەننىڭ ونەگەسىن جالعاپ, بۇگىننىڭ تىنىشتىعىن ساقتاپ تۇرعان ەرەن كۇش – تاۋەلسىز قازاقستاننىڭ قالقانى ەكەنىن سەزىنەسىڭ. شارادا ۇلى وتان سوعىسىنىڭ ارداگەرى بيسەن بوقاەۆ ازات ەلىمىزدىڭ بۇگىنىنە تاۋبە ايتىپ, ەرتەڭىنە سەنىمىن ءبىلدىردى, سونداي-اق, بەرەكە-بىرلىككە ۇيىعان بەيبىت ءومىر بەسىگىندە وتان الدىنداعى بورىشىن وتەپ جۇرگەن جاس ساربازدارعا ساتتىلىك تىلەدى. وڭىردەگى №390 تەڭىز جاياۋ اسكەرىنىڭ كومانديرى, ۇلتتىق ۇلان پودپولكوۆنيگى ە.تولىقپاەۆ ەكىنشى دۇنيەجۇزىلىك سوعىس اتانعان الاپاتتا تايسالماعان بوزداقتاردىڭ رۋحىنا تاعزىم ەتۋ, ولاردىڭ ەرلىك ءداستۇرىن ۇلگى تۇتۋ قاسيەتتى بورىش ەكەندىگىن ايتىپ, ارداگەرلەرگە العىسقا تولى لەبىزىن ءبىلدىردى.
زاماندارىنا تاپ كەلىپ, باستارىنا تۇسكەن زوبالاڭدى قايىسپاي كوتەرىپ, ونى ەرگە ءتان قايسارلىقپەن جەڭىپ شىققان بۋىن وكىلى – مايدانگەر بيسەن اقساقال ۇرپاق ساباقتاستىعىن ۇزبەۋ, ەرجۇرەك جاۋىنگەرلەردىڭ ەرلىك ءىسى مەن ورەلى ءىزىن جالعاۋ ماقساتىندا ارداگەرلەر اتىنان اقتاۋ قالاسى اسكەري-تەڭىز ينستيتۋتىنىڭ تۇلەگى, اعا لەيتەنانت م.بايمۇحانوۆقا «جەڭىسكە – قۇرمەت» جالاۋشاسىن تابىستادى.
اسكەري شارادا اسەرلى اۋەندى قۇيقىلجىتىپ, اسكەري تارتىپپەن كەلىستى بي ىرعاقتارىنا ءتانتى ەتكەن ىشكى ىستەر مينيسترلىگى №6656 اسكەري ءبولىمىنىڭ ۇلتتىق ۇلان وركەسترى اسكەري اۋەن اۋەلەتىپ, تەڭىز جاياۋ اسكەرى بريگاداسىنىڭ بارلاۋ روتاسى اسكەري وقۋ-جاتتىعۋ قويىلىمدارىن كورسەتتى. الاڭدا اقتاۋ گارنيزونى باستىعىنىڭ بۇيرىعىمەن 2000-عا جۋىق اسكەري سالتاناتتى ساپ تۇزەدى. قازاقستاننىڭ شىعىس, سولتۇستىك, وڭتۇستىك ايماقتارى ارقىلى ماڭعىستاۋعا جەتكەن اكتسيا وسىلايشا شەرۋ تارتىپ, الماتىعا قاراي اتتاندى.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى.
سۋرەتتى تۇسىرگەن
تالانت قۇسايىن.
