«نۇرا» ەنتسيكلوپەدياسى – ولكە شەجىرەسىنە قوسىلعان سۇبەلى ۇلەس

قاراعاندىداعى «بولاشاق» ۋنيۆەرسيتەتىنىڭ ءبىلىم مەن تاربيە بەرۋدەگى مەرەيلى ءىس-قىزمەتىمەن بىرگە, قالىڭ وقىرمان قاۋىم رۋحاني جان دۇنيەسىن بايىتۋ ماقساتىندا ءبىراز جىلدان بەرى تۇراقتىلىقپەن اتقارىپ كەلە جاتقان جۇرتقا جاعىمدى ءبىر شاراسى بار. ول نە دەگەندە, وقۋ ورنى كومەك پەن قولداۋىمەن بەلسەندى تۇردە جۇمىس ىستەۋشى ورتالىق قازاقستان عىلىمي-زەرتتەۋ ينستيتۋتى عالىم­دارىنىڭ شىعارماشىلىق ىزدەنىسى ارقىلى جىل سايىن شىعارىلۋداعى تۋعان جەردىڭ تۇمسا تاريحى, تاعىلىمدى تۇلعالارى تۋرالى تانىمدىق دەرەكتەرى, مۇراعات ماعلۇماتتارى مول تۋىندىلاردى اتاۋعا بولادى. 15 تومنان تۇراتىن «قارلاگ تاريحىنىڭ وچەركتەرى», «ساكەن سەيفۋللين», «قاز داۋىستى قازىبەك بي», «بۇقار جىراۋ» تۇلعالىق ەنتسيكلوپەديالارى ەلەۋلى ەڭبەكتەر تۇرعىسىندا تانىلدى. ولكە شەجىرەسىنە قاتىستى ءىرى عىلىمي-زەرتتەۋ جوبالار اياسىندا دايىندالۋ ۇستىندەگى جاڭا كىتاپتار توپتاماسى كەزەك-كەزەگىمەن وقىرماندار قولىنا تيگەلى دە وتىر. وسىمەن قوسا, ايماقتىڭ ىرگەلى اۋداندارى مەن قاسيەتتى جەرلەرىنىڭ ارعى-بەرگى تاريحى, بۇگىنگى تاڭداعى تىنىس-تىرشىلىگى, ەل ەسىندە ەرەكشە قالعان قايراتكەرلەر, ونەر جامپوزدارى ءومىرى, ەرلىگى مەن ەڭبەك جولى ۇلگىلى جاندار جايلى ءبىر تارتىپپەن, ءبىر جۇيەمەن بايان ەتىلگەن ەنتسيكلوپەديالىق دەڭگەيدەگى ەڭبەكتەر شىعارۋ دا ۇردىسكە اينالعان. «قاسيەتتى مەكەن قارااعاش», «ورتاۋىم – التىن بەسىگىم», « اقتاۋىم – اتا مەكەنىم», «مەرەي­لى مەكەن مويىنتى» اتتى كىتاپتار سەرياسى, «جاڭاارقا» ەنتسيكلوپەدياسى جاقىندا «نۇرا» ەنتسيكلوپەدياسىمەن جالعاستى. ولكەنىڭ استىقتى ىرىسى رەتىندە تانىمال ءوڭىردىڭ باي شەجىرەسى, ۇرپاقتان ۇرپاققا جالعاسقان مۇرا, ەلگە قادىرلى ادامداردىڭ ءىسى مەن قىزمەتى, جەر-سۋ اتاۋلارى سىرى, بىرنەشە ۇلتتىڭ وكىلدەرى بەيبىتشىلىك پەن بىرلىكتە ءومىر سۇرۋدەگى ىنتىماقتاستىق جان-جاقتى قامتىلۋ ۇدەسىنەن شىققانىمەن قۇندىلىعى جىلى قابىلداندى. كىتاپتىڭ ءسۇيىنشى داناسىنا ايتىلعان مەملەكەت جانە قوعام قايراتكەرى ورالباي ابدىكارىموۆتىڭ وسىنداي پىكىرى كوپشىلىك ويىن ءبىلدىردى. نۇرالىقتار قولىنا ءتيىپ, ءوز تۋعان ورتالارى جايلى وقىپ-بىلۋگە ىقىلاس تۋعىزعان كىتاپتىڭ اۆتورلارى بەلگىلى ولكەتانۋشى ءىبىراحىم ءىسلاموۆ پەن ءىزباسارى, جۋرناليست جومارت وسپانوۆ ەكەنىن تانىستىرا كەتكەن ءجون. جوعارىدا اتالعان جيناقتاردى جازۋداعى ىزدەنىس­تەرى جاڭا قىرىنان تانىلىپ, كوركەم­دىك-مازمۇندىق ساپاسى ءتاۋىر باعاعا لايىق شىعارماشىلىق تابىس جاساي العاندارىن اتاۋعا بولادى. ايقىن نەسىپباي, «ەگەمەن قازاقستان». قاراعاندى.