سۋرەتتى تۇسىرگەن – ەرلان ومار, «EQ»
ءىس-شارانىڭ شىمىلدىعى اقىن ەركەبۇلان قاينازاردىڭ نۇرتىلەۋ يمانعالي ۇلىنا ارناعان جىر شاشۋىمەن اشىلدى. جەتىسۋدا دۇنيەگە كەلىپ, جارتى عاسىرعا جۋىق ۋاقىت جۋرناليستيكا قازانىندا قايناپ, «وي-كوكپار», «بەتپە-بەت», «دىڭگەك», «قولتاڭبا» سىندى حابارلار جۇرگىزىپ, «باي-قۋاتتى بولايىق!» دەگەن قاناتتى سوزىمەن قازاق حالقىنىڭ جۇرەگىنەن ورنىن العان تۇلعانىڭ ەرەن ەڭبەگىن ناسيحاتتاۋعا باعىتتالعان بۇل يگى ءىس-شارا وسىمەن التىنشى مارتە ۇيىمداستىرىلىپ وتىر.
ەلۋگە جۋىق تاستاياق شەبەرى قاتىسقان باسەكەدە باس جۇلدەنى پارلامەنت ءماجىلىسىنىڭ دەپۋتاتى, اقىن جاناربەك ءاشىمجان يەلەندى. ەكىنشى ورىن الاشتانۋشى عالىم قايرات ساقتىڭ ەنشىسىنە بۇيىرسا, ءۇشىنشى ورىن قالامگەر بورانباي جارىلقاعانوۆ قانجىعاسىنا بايلاندى. ءتورتىنشى ورىندى بەلگىلى فوتوجۋرناليست ەربول ەردەنبەك جەڭىپ الدى. جالپى, ۇزدىك سەگىزدىككە ەنگەن بيلياردشىلار ماناپ كوكەنوۆ, ابدىكەرىم ماناپوۆ, امانگەلدى سەيىتحان, بەيسەن قۇرانبەك اتىنداعى اتالىمدار بويىنشا ماراپاتتالدى.
نۇرتىلەۋ يمانعالي ۇلىنىڭ شاكىرتى ءنۇردىلدا ورازدىڭ ۇيىتقى بولۋىمەن ءداستۇرلى تۇردە ءوتىپ كەلە جاتقان تۋرنيرگە «Tas Group» كومپانياسىنىڭ قۇرىلتايشىسى دۋلات تاستەكەي دەمەۋشىلىك ەتىپ كەلەدى. بيىل دا سول ءداستۇر جالعاسىن تاۋىپ, جەڭىمپازدار مەن ۇزدىك ويىن كورسەتكەندەرگە قارجىلاي سىيلىق تابىس ەتىلدى.
