جازاتايىم وقيعا ازايماي تۇر

2023–2025 جىلدارى ءوڭىر  كاسىپ­ورىندارىندا 313 جازاتايىم وقيعا تىركەلگەن. سونىڭ سالدارىنان 336 ادام زارداپ شەككەن. مەملەكەتتىك ەڭبەك ينس-پەكتسياسى كوميتەتى پاۆلودار وبلىسى بويىنشا دەپارتامەنتىنىڭ مالىمەتىنشە, ءوڭىر كاسىپورىندارى مەن ۇيىمدارىندا 2025 جىلى 104 جازاتايىم وقيعا تىركەلىپ, سالدارىنان 113 ادام زارداپ شەككەن. ونىڭ ىشىندە 66 ادام اۋىر جاراقات الىپ, 7 ادام قازا تاپقان.

«2024 جىلى 103 جازاتايىم وقيعا تىركەلىپ, 112 زارداپ شەككەن ادام انىقتالعان. 78 ادام اۋىر زار­داپ الىپ, 9 ادام كوز جۇمعان. 2023 جىلى تىركەلگەن 106 جازاتايىم وقيعادان 111 ادام زارداپ شەككەن, ونىڭ 65-ءى اۋىر جاراقات العان. ءتورت وقيعا ادام ولىمىمەن اياقتالعان. زارداپ شەككەندەردىڭ باسىم بولىگى – تاۋ-كەن, مەتاللۋرگيا سالاسىندا, بيۋد­جەتتىك ۇيىمداردا, شاعىن بيزنەس سۋبەكتىلەرىندە, قۇرىلىس سالاسىندا ەڭبەك ەتە­تىن ازاماتتار. وندىرىستىك وقي­عا­نىڭ نەگىزگى سەبەپتەرى – جۇ­مىستىڭ قاناعاتتانعىسىز دەڭ­گەيدە ۇيىمداستىرىلۋى, زارداپ شەگۋشىنىڭ ابايسىزدىعى, ەڭبەك­تى قورعاۋ مەن قاۋىپسىزدىك تالاپ­تارىنىڭ بۇزىلۋى», دەيدى دەپارتامەنت باسشىسىنىڭ مىن­دەتىن اتقارۋشى ابىلاي سابىروۆ.

جازاتايىم وقيعانىڭ ەڭ ءجيى كەزدەسەتىنى – ادامداردىڭ بيىك­تەن قۇلاۋى, قوزعالمالى, كوكتە قالىقتاپ جۇرەتىن, اينالمالى زاتتار مەن بولشەكتەردىڭ اسەرى. وتكەن جىلعى ستاتيستيكالىق دەرەكتەرگە ۇڭىلسەك, كاسىپورىن­دار اراسىندا ەڭ كوپ جاراقاتتان­عان جۇمىسكەرلەر «قازحروم» تۇق» اق فيليالى – اقسۋ فەر­روقورىتپا زاۋىتىنا تيەسىلى – 10 ادام. سونداي-اق «ەۋروازياتتىق ەنەرگەتيكالىق كورپوراتسياسى» اق فيليالى – «شىعىس» كەنىشىندە – 6 ادام, «ستەكلومير KZ» جشس – 4 ادام, «بوگاتىر كومىر» جشس – 5 ادام, «پروم­ماشكومپلەكت» جشس – 3 ادام, «R.W.S. Concrete» جشس – 2 ادام, «پەتك» اق – 2 ادام, «سمارت اۆتوبۋس پۆ» جشس – 4 ادام, «قازاقستان ءاليۋمينيى» اق فيليالى ەلەكتر ستانساسىندا 2 ادام وندىرىستىك جاراقات العان. 2025 جىلى ولىمگە اكەلگەن جازاتايىم وقيعا «بوگاتىر كومىر» جشس-دا تىركەلىپتى: 2 ادام قازا تاپقان. سونداي-اق «ستروي-ديزاين PV» جشس, «قاجسەرۆيس» جشس, «قازحروم» تۇق» اق فيليالى – اقسۋ فەرروقورىتپا زاۋىتى, «مك ەۋرازيا-اگرو» جشس مەن «گامما سارىكول» جشس-نىڭ ارقايسىندا كىسى ولىمىمەن اياقتالعان ءبىر جازاتايىم وقيعادان تىركەلگەن.

كەيىنگى جىلدارى تىركەلگەن ەڭ قايعىلى وقيعانىڭ ءبىرى – 2024 جىلدىڭ قاڭتار ايىندا مايقايىڭ التىن كەنىشىندە اۆتوبۋسپەن قۇردىمعا ءتۇسىپ قازا تاپقان 4 قۇتقارۋشىنىڭ ءولىمى. قۇتقارۋشىلار «كاسىبي اسكەري­لەندىرىلگەن اۆاريالىق-قۇتقارۋ قىز­مەتتەرىنىڭ رەسپۋبليكالىق ورتالىق شتابى» جشس پف مەكە­مەسىندە ەڭبەك ەتەتىن ەدى.

«وكىنىشكە قاراي, وندىرىستىك جازاتايىم وقيعادان زارداپ شەككەن ادامداردىڭ جۇمىس بەرۋشىدەن كەلتىرىلگەن ماتە­ريالدىق زياندى وتەۋ نورماسى ەڭبەك زاڭناماسىندا قاراس­تىرىلماعان. وسى سەبەپتى, زار­داپ شەككەندەر ازاماتتىق سوت­قا ءوز بەتىمەن جۇگىنەدى. ال قىل­مىستىق ىستەر جونىن­دەگى مەم­لەكەتتىك ەڭبەك ينسپەكتسيا­سىنىڭ ماتەريالدارى تەرگەۋلەر اياقتالعاننان كەيىن اۋماقتىق پوليتسيا ورگاندارىنا جولدانادى», دەپ قوستى دەپارتامەنت وكىلى.

قازىر ەلىمىزدە 2024–2030 جىل­دارعا ارنالعان «ەڭبەك قاۋىپ­سىزدىگى» تۇجى­رىمداماسىن ىسكە اسىرۋ جونىندە جۇمىس جۇرگىزىلىپ جاتىر. قۇجات ەڭبەك قاۋىپسىزدىگى سالاسىندا جۇمىس بەرۋ­شىلەرگە قويىلاتىن تالاپ­تاردى وڭتايلاندىرۋعا باعىت­تالعان شارالار كەشەنىن قام­تيدى. ماقساتى – وندىرىستىك جا­راق­اتتانۋدى تومەندەتۋ, ءتيىستى مەملەكەتتىك باقى­لاۋدى قام­تاماسىز ەتۋ.

دەپارتامەنت باسشىسى وڭىردە وندىرىستىك وقيعالاردىڭ الدىن الۋ, كاسىبي اۋرۋلاردىڭ پروفيلاكتيكاسىنا قاتىستى قا­بىلداناتىن شارا­لار اياسىن­دا 33 كاسىپورىندا «نولدىك جاراقاتتانۋشىلىق – Vision Zero» تۇجىرىمداماسى, 22 ەڭ­بەك ۇيى­مىندا «حالىقتىق باقى­لاۋ» جوباسى ەنگىزىلگەنىن اتاپ ءوتتى. بۇل كاسىپ­ورىنداعى ەڭبەك قاۋىپسىزدىگىن تىكەلەي باقىلاۋعا مۇمكىندىك بەرىپ وتىر. ءوڭىر كاسىپورىندارىندا 881 وندىرىستىك كەڭەس جۇمىس ىستەيدى, ولار­دىڭ مىندەتىنە وندىرىستىك جارا­قات­تانۋ­دى بولدىرماۋ, جۇ­مىس ورىن­­دارىنداعى ەڭبەك جاع­­دايىن تەكسەرۋدى ۇيىم­داس­تىرۋ كىرەدى.

پاۆلودار وبلىسى