شىمكەنت قالاسىندا مامانداردى بىرلەسىپ دايارلاۋ ماسەلەسى ەكى ەل ۇكىمەتتەرى دەڭگەيىندە تالقىلانىپ, KazNARU مەن تياشمي عىلىمي زەرتتەۋ وقۋ ورىندارى رەكتورلارىنىڭ كەزدەسۋى وتكەن بولاتىن. ناتيجەسىندە, تاشكەنت قالاسىندا KazNARU بازاسىندا فيليال اشۋ جونىندەگى جول كارتاسى قابىلدانىپ, جوعارى وقۋ ورىندارى اراسىندا 2028 جىلعا دەيىن عىلىم-ءبىلىم قىزمەتى سالاسىندا ىنتىماقتاستىق كەلىسىمشارتى جاسالدى.
بىلىكتى ماماندار دايارلاۋدى ماقسات ەتكەن كەلىسىمدەر اياسىندا KazNARU باسقارما توراعاسى – رەكتور اقىلبەك كۇرىشباەۆ پەن تياشمي عىلىمي زەرتتەۋ ۋنيۆەرسيتەتىنىڭ رەكتورى باحودير ميرزاەۆ سۋ حابىنىڭ اۋديتوريالارى مەن عىلىمي-زەرتحانالارىنىڭ جۇمىسىمەن تانىستى. سونىمەن بىرگە ينفراقۇرىلىمدى دامىتۋ, قارجىلاندىرۋدى نىعايتۋ, وقۋ ءۇردىسىن جەتىلدىرۋ ءۇشىن زاماناۋي وقۋ جانە عىلىمي ادەبيەتتەرمەن قامتاماسىز ەتۋ, سۋ رەسۋرستارىن باسقارۋ, سۋدى پايدالانۋ, مەليوراتسيا جانە جەردى رەكۋلتيۆاتسيالاۋ سالاسىندا بىرلەسكەن عىلىمي جوبالاردى ازىرلەۋگە قاتىستى تاياۋ ۋاقىتتا جۇزەگە اساتىن باعىتتاردى جان-جاقتى تالقىلادى.
«مەملەكەت باسشىسى اگروونەركاسىپتىك سەكتوردى دامىتۋدىڭ باسىم باعىتتارىن ايقىنداي وتىرىپ, نارىقتا سۇرانىسقا يە مامانداردى دايارلاۋعا بازالىق جوعارى وقۋ ورنىن انىقتاۋ جونىندە ناقتى مىندەتتەر قويعانى بەلگىلى. وسىعان وراي جاقىندا عىلىم جانە جوعارى ءبىلىم ءمينيسترى ساياسات نۇربەك تياشمي عىلىمي زەرتتەۋ ۋنيۆەرسيتەتىنىڭ فيليالىن KazNARU-دا اشۋ تۋرالى بۇيرىققا قول قويدى. جوعارى جانە جوعارى وقۋ ورنىنان كەيىنگى ءبىلىم بەرۋدىڭ جالپىعا مىندەتتى ستاندارتىنا سايكەس «ۆ082 سۋ رەسۋرستارى جانە سۋدى پايدالانۋ», «م137 سۋ رەسۋرستارى جانە سۋدى پايدالانۋ» ءبىلىم باعدارلامالارى بويىنشا KazNARU-مەن بىرلەسىپ ازىرلەنگەن قوسديپلومدىق باكالاۆريات جانە ماگيستراتۋرا باعدارلامالارىن ىسكە اسىرا وتىرىپ, بىلىكتىلىگى جوعارى سۋ شارۋاشىلىعى ماماندارىن دايارلايتىن بولامىز», دەپ اتاپ ءوتتى رەكتوردىڭ ءبىرىنشى ورىنباسارى پىرىمقۇل يبراگيموۆ.
تاشكەنت يرريگاتسيا جانە اۋىل شارۋاشىلىعىن مەحانيكالاندىرۋ ينجەنەرلەرى ينستيتۋتى عىلىمي-زەرتتەۋ ۋنيۆەرسيتەتىنىڭ تاريحى 1923 جىلدان تۇركىستان مەملەكەتتىك ۋنيۆەرسيتەتى گيدروتەحنيكالىق ءبولىمىنىڭ بازاسىنداعى ينجەنەرلىك-مەليوراتيۆتىك فاكۋلتەتىنەن باستالادى. 1929 جىلى وسى فاكۋلتەت نەگىزىندە ورتالىق ازيا ماقتا-يرريگاتسيالىق پوليتەحنيكالىق ينستيتۋتى قۇرىلدى. 1934 جىلى بۇل وقۋ ورنى ورتالىق ازيانىڭ سۋارۋ جانە اۋىل شارۋاشىلىعىن مەحانيكالاندىرۋ ينجەنەرلەرى ينستيتۋتىمەن بىرىكتىرىلىپ, تاشكەنت سۋارۋ جانە اۋىل شارۋاشىلىعىن مەحانيكالاندىرۋ ينجەنەرلەرى ينستيتۋتى بولىپ وزگەرتىلدى. باستاپقىدا ونىڭ قۇرىلىمىندا گيدرومەليوراتسيا جانە مەليوراتسيا فاكۋلتەتتەرى عانا بولعان. ودان كەيىنگى كەزەڭدە جەرگە ورنالاستىرۋ, گيدرومەليوراتسيالىق جۇمىستاردى مەحانيكالاندىرۋ, تەحنولوگيا جانە اۋىلشارۋاشىلىق ماشينالارىن جوندەۋدى ۇيىمداستىرۋ, جالپى ينجەنەرلىك فاكۋلتەتتەر اشىلىپ, وقۋ باعدارلاماسىنداعى يننوۆاتسيالىق وزگەرىستەر بۇگىندە اتالعان ينستيتۋتتىڭ حالىقارالىق نارىقتا ينجەنەر كادرلار دايارلاۋداعى رەيتينگىنىڭ ارتۋىنا ىقپال ەتىپ وتىر. 2021 جىلى وقۋ ورنىنىڭ اتاۋى تاشكەنت يرريگاتسيا جانە اۋىل شارۋاشىلىعىن مەحانيكالاندىرۋ ينجەنەرلەرى ينستيتۋتى ۇلتتىق عىلىمي-زەرتتەۋ ۋنيۆەرسيتەتى بولىپ وزگەرتىلدى.
بۇگىندە ۋنيۆەرسيتەت گيدروەنەرگەتيكا, يرريگاتسيا, مەليوراتسيا, اۋىل شارۋاشىلىعىنداعى يننوۆاتسيالىق تەحنيكالار مەن تەحنولوگيالار, سۋ ۇنەمدەيتىن سۋارۋ تەحنولوگيالارى, جاڭارتىلعان ەنەرگيا كوزدەرى, گەودەزيا جانە گەوينفورماتيكا, ەكولوگيا مەن قورشاعان ورتانى قورعاۋ باعىتتارى بويىنشا جوعارى بىلىكتى كادرلاردى دايارلاۋ جونىندەگى بازالىق جوعارى وقۋ ورنى رەتىندە ايماق ەلدەرىنە تارتىمدى بولىپ وتىر. مۇندا 12 مىڭنان استام ستۋدەنت 40 باعىت بويىنشا 7 فاكۋلتەتتە ءبىلىم الىپ, ماگيستراتۋرادان 32 ماماندىق الىپ شىعادى.
KazNARU سۋ حابىنىڭ ديرەكتورى اندرەي ريابتسەۆتىڭ ايتۋىنشا, فيليالدا ءبىلىم بەرۋ, وقۋعا قابىلداۋ جانە ءبىلىم ساپاسىن باسقارۋ ءتارتىبى ەلىمىز زاڭناماسى, سونداي-اق فيليالدىڭ ىشكى قۇجاتتارىمەن رەتتەلەدى. ستۋدەنتتەرگە قازاق, ورىس, اعىلشىن تىلدەرىن جانە «قازاق ءتىلى» مەن «قازاقستان تاريحىن» وقىتۋ جوسپارلانعان. وقۋ ۇردىسىنە شەتەلدىك پروفەسسور-وقىتۋشىلاردى تارتۋ كوزدەلىپ وتىر. جاڭا فيليالدىڭ اشىلۋى سۋ شارۋاشىلىعىنا قاجەتتى باسەكەگە قابىلەتتى ماماندار دايارلاۋمەن قاتار وزبەكستان مەن قازاقستاننىڭ سۋ رەسۋرستارىن ۇتىمدى پايدالانۋ, اۋىل شارۋاشىلىعى ونەركاسىبى سالاسىندا يننوۆاتسيالىق تەحنولوگيالاردى ازىرلەۋ, تسيفرلى ەكونوميكانى دامىتا وتىرىپ, ورتالىق ازياداعى سۋ قاۋىپسىزدىگىن نىعايتۋعا باعىتتالعان كەشەندى ءبىلىم باعدارلامالارىن ىسكە اسىراتىن بولادى.
قازىرگى كەزدە ەكى ۋنيۆەرسيتەت اراسىندا جاسالعان كەلىسىمشارت نەگىزىندە KazNARU سۋ, جەر جانە ورمان رەسۋرستارى فاكۋلتەتى ءبىرىنشى كۋرسىنىڭ 15 ستۋدەنتى تاشكەنتتە يرريگاتسيا جانە گيدروتەحنيكالىق قۇرىلىستار فاكۋلتەتىندە ءبىلىم الىپ جاتىر.
الماتى
