ساۆاننالار مەن دجۋنگليلەرمەن قورشالعان, ەرەكشە فاۋنا مەن فلوراسى بار وقشاۋلانعان ايماق ادامداردىڭ كوزىنەن سەنىمدى تۇردە جاسىرىلعان. بۇل قۇپيا مەكەن «تەپۋي» دەگەن اتپەن بەلگىلى. گران-سابان ايماعىندا تۇراتىن پەمون ۇندىستەرىنىڭ تىلىندە «قۇدايلار ءۇيى» دەگەندى بىلدىرەدى. تەپۋيلەر ءبىر كەزدەرى اتلانت تەڭىزى جاعالاۋىنان امازونكا, ورينوكو جانە ريۋ-نەگرۋ وزەندەرىنىڭ الابىنا دەيىن سوزىلعان القاپتى ءۇستىرتتىڭ قالدىعى. كولدىڭ ورنىندا بۇل ۇستىرتتەر وڭتۇستىك امەريكا مەن افريكا ءالى ءبىر قۇرلىق بولىپ تۇرعان كەزدەرى, شامامەن 200 ملن جىل بۇرىن پايدا بولعان.
قۇستار ءبيى
ومىرىندە ءبىر رەت بولسىن قۇستارعا ءسۇيسىنىپ قاراماعان ادام جوق شىعار. ال 1000 قۇستىڭ قوسىلا ءان شىرقاپ, بيلەي جونەلەتىن قۇبىلىسىن بىلەسىز بە؟
ول «مۋرمۋراتسيا» دەپ اتالادى. وتە سيرەك كەزدەسەتىن جانە سىرلى قۇبىلىس. وندا مىڭداعان قاراتورعاي توپتاسىپ, ۇشىپ بارا جاتقاندا كوركەم بي بيلەيدى, شوۋ كورسەتەدى. ءبىر قىزىعى, ساعاتىنا 40 كيلومەتر جىلدامدىقپەن ۇشىپ بارا جاتقان قۇستار, ءبىر-بىرىمەن سوقتىعىسپاي, ءبىر-بىرىنەن قالىپ قويماي, ۇيلەسىمدى تۇردە ءبىر مەزەتتە تۇتاس باعىتتارىن وزگەرتە الادى.
روبوت يت
قىتايلىق ينجەنەرلەر مۇگەدەكتەرگە ارنالعان روبوت يت جاساپ شىعاردى. جوبا جاساندى ينتەللەكتىگە نەگىزدەلگەن. اقىلدى قۇلتەمىر ەستيدى, كورەدى ءتىپتى سويلەي دە الادى.
زاماناۋي يت العاشقى رەت شانحاي قالاسىندا سىناقتان ءوتتى. روبوت يت ەرەكشە جاندارعا جول نۇسقايدى. جوبا اۆتورلارى ءاۋ باستا وسىنى ماقسات ەتكەن. سوندىقتان ديزايننان گورى ناۆيگاتسيا مەن قاۋىپسىزدىككە باسىمدىق بەرىلگەن. ول توڭىرەكتەگى دىبىستاردى ەستيدى. قوجايىنىنىڭ تاپسىرماسىن بۇلجىتپاي ورىندايدى. سونداي-اق اينالاسىن كورەدى, سويلەي دە الادى. تاعى ءبىر ەرەكشەلىگى ءتورت ەمەس, التى اياعى بار. سەكۋندىنا 1,6 مەتر جىلدامدىقپەن قوزعالا الادى.
