سۋرەتتى تۇسىرگەن – اۆتور
ءبىر قاراعاندا سيرەن بە دەيسىز. ەندى بىردە جاپونيانىڭ ايگىلى ساكۋراسىنا ۇقساتاسىز. الايدا نەگىزگى اتاۋى – مارال وتى. مامىردا گۇلدەيدى. بۇل وسىمدىك رەسەيدىڭ ءشۇي جولى بويىنداعى بەتكەيلەردە تۇتاسىپ وسەدى. ءتۋريزمنىڭ دامىعاندىعى ما, ول جاقتا مارال وتى گۇلدەگەندە ساياحاتشىلار اناۋ-مىناۋ جۇمىسىن ىسىرا تۇرىپ, الىس-جاقىننان ارنايى جەتىپ, سۋرەتكە تۇسەدى, تابيعاتتىڭ سۇلۋلىعىن تاماشالايدى. سول سەكىلدى وسكەمەن – سامار تاس جولىنداعى مارال وتىن دا كوبەيتىپ, تۋريستەردى تارتسا دەگەن وي كەلگەن. ول تۋرالى بوتانيك ماماندار نە دەيدى؟ ەڭ اۋەلى سولاردىڭ پىكىرىن تىڭداعانبىز.
– ءيا, ەرەكشە ادەمى گۇل. وكىنىشكە قاراي, ازايىپ بارا جاتقاندىقتان, «قىزىل كىتاپقا» ەندى. كوبەيتۋ جاعىن زەرتتەپ, ءوزى بەيىمدەلگەن جەرلەرگە وتىرعىزۋعا بولادى, ارينە. بىراق ونىمەن اينالىساتىن ارنايى ماماندار كەرەك شىعار؟ – دەيدى س.امانجولوۆ اتىنداعى شقمۋ بيولوگيا كافەدراسىنىڭ دوتسەنتى, بيولوگيا عىلىمدارىنىڭ كانديداتى جامال يگىسىنوۆا.
ەگەر مارال وتى ومەش اسۋىنان اسقانداعى لايلى بۇرىلىستارىنىڭ ىشىندەگى بەتكەيلەرگە كيىزدەي قاپتاپ, كوكتەمدە قۇلپىرىپ تۇرسا, ساياحاتشىلاردىڭ ارنايى ساپارلايتىنى انىق. جاپونيادا ساكۋرا اعاشى گۇل اتقاندا قانشاما ەلدەن تۋريست سابىلادى. ماسەلەن, توكيوداعى «سيندزيۋكۋ» ساياباعىندا عانا 1000 ءتۇپ ساكۋرا اعاشى بار ەكەن. سول سەكىلدى ساماردىڭ «ساكۋراسىن» دا كوبەيتۋدى قولعا السا, يگى ءىس بولار ما ەدى. قازىردىڭ وزىندە ءار ءتۇپتىڭ تۇبىنە توقتاپ, سۋرەتكە ءتۇسىپ جۇرگەن سۇلۋلىققا جانى قۇمار جولاۋشىلاردى بايقادىق.
شىعىس قازاقستان وبلىسى,
سامار اۋدانى
