سۋرەتتى تۇسىرگەن – اۆتور
وبلىس ورتالىعىن جارىقتاندىرۋ جوباسىن باستاعانداعى ماقسات ەسكىرگەن 16 مىڭ شامدى جارىق ديودتى ەلەكتر ۇنەمدەگىش تۇرىنە اۋىستىرىپ, جارىق اعىنىن بىرقالىپتى رەتتەۋگە قول جەتكىزۋ ەدى. بۇل ءۇشىن كوشە شامدارىن اۆتوماتتى باسقاراتىن بىرىڭعاي ديسپەتچەرلىك ورتالىق ىسكە قوسىلعان. قولعا الىنعان جۇمىستار تولىق اياقتالعاندا ەلەكتر قۋاتىن 60%-عا دەيىن ۇنەمدەلۋى مۇمكىن ەكەن.
كوشەنى جارىقتاندىرۋ جۇيەلەرىن جاڭعىرتۋ جونىندەگى جۇمىس توبىنىڭ جەتەكشىسى رينات بۇتاجانوۆتىڭ سوزىنە سەنسەك, 11 583 كوشە شامى جاڭارتىلعان, 214 باسقارۋ شكافى مەن 212 كم ەلەكتر جەلىسى اۋىستىرىلعان. الايدا ورناتىلعان جارىق شامدار از ۋاقىت ىشىندە كۇيىپ كەتىپ وتىرعان. كەيبىرەۋلەرى مۇلدەم جانباي قالعان. جالپى, قالادا شامامەن 2 مىڭعا جۋىق جارىق شامى ىستەن شىقسا, سونىڭ 1 400-ءى – جەلىلىك, 600-ءى ءار جەردە ورنالاسقان.
– شامداردىڭ ىستەن شىعۋداعى نەگىزگى سەبەبى – كوشەنى جارىقتاندىرۋ جۇيەسىنىڭ توزۋى, تۇتىنۋشىلار سانىنىڭ ءوسۋى, قولايسىز اۋا رايى. بايقاساق, قالادا قاتتى جاڭبىر جاۋسا نەمەسە داۋىل سوقسا, كەيبىر شاعىن اۋدانداردا جارىق ءسونىپ قالادى. سول سياقتى جاڭعىرتۋ كەزىندە قۇرىلىس-مونتاجداۋ جۇمىستارىنىڭ ساپاسىزدىعى دا بار. ەسكەرتە كەتەيىك, جوبا ءالى اياقتالعان جوق. ەگەر «Everlight Electronics Co» كومپانياسى ءوز مىندەتتەرىن ورىنداسا, ولقىلىقتار قالپىنا كەلتىرىلەدى. قازىر قوسالقى مەردىگەر «Digital Security» كومپانياسى قالپىنا كەلتىرۋ جۇمىستارىن قارقىندى جۇرگىزىپ جاتىر. وسكەمەن كوشەلەرىنىڭ جارىق شامدارىن جاڭعىرتۋ جوباسىن جىل سوڭىنا دەيىن اياقتاۋدى جوسپارلاپ وتىرمىز, – دەدى ر.بۇتاجانوۆ.
قازىرگى ۋاقىتتا وسكەمەندەگى بىرنەشە كوشەنىڭ جارىق شامدارى قالپىنا كەلتىرىلگەن. قولعا الىنعان جۇمىس ماۋسىمنىڭ ورتاسىنا دەيىن تولىق اياقتالادى. «Digital Security» جشس باسشىسى دانيار اۋەسپاەۆتىڭ ايتۋىنشا, بۇگىنگە دەيىن وسكەمەندە 461 شام جاڭارتىلعان.
– قالانىڭ ورتالىق كوشەلەرى مەن جەكە سەكتورداعى 461 جارىق شام اۋىستىرىلدى. كومپانيا ماماندارى تۇرعىنداردىڭ ءوتىنىمى بويىنشا كوشەلەردى جارىقتاندىرۋ جۇيەسىن تاۋلىك بويى باقىلاۋدا ۇستاپ, قىزمەت كورسەتەدى. سونداي-اق بيىكتەگى جانە جەر استىنداعى ەلەكتر جەلىلەرىن قالپىنا كەلتىرۋمەن دە اينالىسادى. وسىعان دەيىن 5 شاقىرىم وقشاۋلانعان ەلەكتر جەلىسى اۋىستىرىلىپ, 8 باسقارۋ شكافىنىڭ جۇمىسى رەتتەلدى, – دەدى د.اۋەسپاەۆ.
قازىرگى تاڭدا ەسكىرگەن باسقارۋ شكافتارىن قايتا بولشەكتەۋ, كوشەلەردى جارىقتاندىرۋ جەلىسىنە قوسىلعان بوگدە كوزدەردى اجىراتۋ ماسەلەلەرى قاراستىرىلىپ جاتىر. ەلەكتر جەلىسىن قالپىنا كەلتىرۋ جانە جوندەۋ جۇمىستارى نازاردان تىس قالعان جوق. جوبا اياسىنداعى جالپى جۇمىستار جىل سوڭىنا دەيىن تولىق اياقتالادى. جوسپار ويداعىداي بولسا, جىل سوڭىندا وسكەمەن قالاسى سامالاداي جارقىراپ تۇرارى ءسوزسىز.
وسكەمەن
