وبلىستاعى «دارىن» ورتالىعى جانە حالىق ارتىستەرى اعايىندى ابدۋلليندەر اتىنداعى شىعىس قازاقستان ونەر كوللەدجى ۇيىمداستىرعان ءدۇبىرلى دوداعا ايماقتىڭ ءار اۋدانىنان 11 كۇيشى, 6 انسامبل قاتىستى. شاناقتان كۇمبىرلەي توگىلگەن قوڭىر كۇي تىڭداعان جاندى تەبىرەنتپەي قويمادى. الىس-جاقىننان كەلگەن قازىلار دا «پاح شىركىن» دەپ تاڭداي قاعىسىپ وتىردى. كورەرمەندەر دە قيقۋ قوسىپ, قوشەمەت كورسەتۋمەن بولدى.
– شىعىستا قازاقتىڭ قازاقتىعىن كورسەتەر ۇلكەن بايقاۋعا قازىلىق ەتۋگە كەلىپ قالدىق. وقۋشىلاردىڭ تالانتىنا, تالابىنا تامسانىپ وتىرمىز. تۇكپىردەگى ءار اۋداندا كورىنبەي جاتقان, ەلەنبەي جۇرگەن تالانتتار وسىنداي بايگەدە كورىنەدى, تانىلادى. بولاشاقتارىنا ۇلكەن ەسىك اشىلادى. سوندىقتان مۇنداي بايقاۋ جالعاسىن تابۋى كەرەك. ۇيىمداستىرۋشىلارعا مىڭ العىس! – دەيدى مادەنيەت قايراتكەرى, كۇيشى مۇرات ابۋعازى.
قوڭىر ءۇندى دومبىرالارىن ارقالاپ, ايماقتىڭ ءار اۋلىنان كەلگەن وقۋشىلار التاي-تارباعاتايدىڭ, باتىستىڭ ءداستۇرلى كۇيلەرىن توكپەلەتتى. ال وسىنداي ۇلتتىق ناقىشتاعى بايقاۋدىڭ وتۋىنە مۇرىندىق بولىپ, دەمەۋشىلىك كورسەتكەن كاسىپكەر ايدوس بايعونىسوۆ ەدى. قازاقتىڭ ءتول مۇراسىن ناسيحاتتاۋعا ۇلكەن ۇلەسىن قوسقان كاسىپكەرگە دە كوپشىلىك ريزاشىلىق ءبىلدىردى.
– كۇيدىڭ قادىرىن ءبىلىپ, قۇندىلىعىن باعالاي الىپ ءجۇرمىز بە؟ وسى سۇراق الاڭداتتى. الەمدى تاڭعالدىرعان دومبىرادان توگىلگەن كۇيدى دە بيىككە كوتەرۋگە ءتيىسپىز, – دەيدى كۇي ونەرىنىڭ جاناشىرى, كاسىپكەر ايدوس جومارتحان ۇلى.
ۇيىمداستىرۋشى, ۇلتتىق ونەردىڭ جاناشىرى, كۇيشى شالقار ىرىسحاننىڭ ايتۋىنشا بايقاۋ ەكى كەزەڭنەن تۇردى. ءبىرىنشى كەزەڭدەگى ءۇش كۇيدىڭ ەكەۋى التاي, تارباعاتاي ءداستۇرلى كۇيشىلىك مەكتەبىنەن ورىندالسا, ءۇشىنشىسى شەرتپە كۇيدەن تۇردى. ەكىنشى كەزەڭدە دە قاتىسۋشىلار ءۇش كۇي وينادى.
– بايقاۋ جەڭىل بولسىن دەگەن نيەتتە ءوتىنىم بەرگەندەردىڭ بارىنە دايىن نوتا جىبەردىك. سونىمەن دايىندالدى. شىعىستىڭ كۇيى كەڭىنەن ناسيحاتتالۋى بۇرىن بولماعان. دەمەۋشىمىزدىڭ ارقاسىندا بۇل بايقاۋ كەلەسى جىلى دا وتەتىن بولىپ وتىر. بۇل دەگەن كۇيشىلەردىڭ كاسىبيلىگىن شىڭداۋعا ىقپال ەتەدى. سونداي-اق رەپەرتۋارلىق قورلارى دا ارتتى, – دەيدى كۇيشى شالقار ىرىسحان.
ءسويتىپ, «كۇي داريا, كۇي عۇمىر» اتتى وبلىستىق كۇيشىلەر بايقاۋىندا جۇلدەلى ءۇشىنشى ورىندى حالىق ارتىستەرى اعايىندى ابدۋلليندەر اتىنداعى شىعىس قازاقستان ونەر كوللەدجىنىڭ وقۋشىسى تەمىرلان قايىربەك ەنشىلەدى. ەكىنشى ورىندى كاتونقاراعاي اۋداندىق مۋزىكا مەكتەبىنىڭ وقۋشىسى سانجار قايىردينوۆ يەلەنسە, ءبىرىنشى ورىننىڭ تۇعىرىنان مۇحامەدالي قايتبەك كورىندى. ال قازىلار القاسى باس جۇلدەنى ءبىر اۋىزدان وسكەمەندەگى «جۇلدىز» ونەر مەكتەبىنىڭ 8 سىنىپ وقۋشىسى ولجاس ازاتبەككە تابىستادى.
– بۇل بايقاۋدىڭ ەرەجەلەرى مەن ءۇشىن قيىن سياقتى كورىندى. بىراق اكەم ۇيرەتىپ, قولداپ, رۋحتاندىرىپ قويدى. جاسىرمايمىن, كەيبىر كۇيلەردى نوتاسىز ۇيرەنگەندىكتەن كۇردەلى تۇستارىن الىپ شىعۋدا قوبالجىدىم. ونىڭ ۇستىنە, بايگەگە تۇسكەندەر ارنايى مۋزىكا مەكتەبىنىڭ وقۋشىلارى ەدى. مەنى قولداعان اعايىن-تۋىستارعا العىس ايتامىن, – دەيدى باس جۇلدەنى قانجىعاعا باسقان ازاتبەك ولجاس.
ايتا كەتەيىك, جۇلدەلى ورىن العانداردىڭ بارلىعىنا ارنايى سەرتيفيكات پەن اقشالاي سىيلىقتار تابىس ەتىلدى. انسامبلدىك ورىنداۋدان باس جۇلدەگە ريددەر قالاسىنداعى بالالار مۋزىكا مەكتەبى قابىرعاسىندا قۇرىلعان «كەربەز» دومبىراشىلار ءانسامبلى يە بولدى. ءبىرىنشى ورىندى «شىعىس سازى», ەكىنشى ورىندى «بالداۋرەن», ءۇشىنشى ورىندى «بايگە» دومبىراشىلار ءانسامبلى الدى.
جوعارىدا ايتىپ وتكەندەي, بۇل بايقاۋ كەلەسى جىلى دا جالعاسىن تابادى.
وسكەمەن
