يگى ءىس جاڭاارقا اۋدانىنىڭ 90 جىلدىعى جانە ساكەن سەيفۋلليننىڭ 125 جىلدىعىنا وراي ۇيىمداستىرىلعان. الەمدىك رەكورد ورناتۋ ءۇشىن اۋدانداعى 14 اۋىلدان مىڭعا تارتا كەلىنشەك جينالعان. اق جاۋلىقتى انالار مەن قىز-كەلىنشەكتەر 10 توننا قىمىزدى مىڭ كۇبىگە ءبولىپ قۇيىپ, ءبىر مەزەتتە جارىسا ءپىستى. وقيعانى گيننەستىڭ رەكوردتار كىتابىنا تىركەۋ ءۇشىن كۋبادان ارنايى كەلگەن يۋدەلكيس دياس الەمدىك رەكورد ورناتىلعانىن رەسمي تۇردە راستاپ, قۋانىشىن بىلدىرگەن.
856 كيلو باۋىرساق
گيننەستىڭ رەكوردتار كىتابىنا ەنگەن وتانداستارىمىز كوپ. اسىرەسە ۇلتتىق قۇندىلىقتاردى الەمگە تانىتقاندار كوز سۇيسىندىرەدى. سونداي ەرەكشە رەكوردتىڭ ءبىرى – الماتى تۇرعىندارىنىڭ جاساعانى.
2014 جىلى الماتى تۇرعىندارى «انالار كۇنىن» تويلاۋ بارىسىندا 856 كيلو باۋىرساق پىسىرگەن. ونى دايىنداۋعا بارلىعى 650 كگ ۇن, 650 ليتر وسىمدىك مايى, 450 ليتر سۋ, 15 كگ تۇز جانە 15 كگ قانت كەتتى. بۇل وقيعا رەكوردتار كىتابىنا «ەڭ كوپ پىسىرىلگەن جانە جەلىنگەن باۋىرساقتار» دەگەن اتپەن ەنگەن.
10 مىڭ دومبىراشى
قوڭىر دومبىرانى قولعا الىپ, اۋەلەتىپ وتىرعان كۇيشىنى كورسەك, كوڭىلىمىز كونشىپ قالادى. ال 10 مىڭ دومبىراشى ءبىر مەزەتتە كۇي تارتسا شە.
2010 جىلى قىتايدىڭ ۇيعىر اۆتونومياسىندا تاعى ءبىر رەكورد تىركەلگەن. بۇل جولى 10 مىڭ دومبىراشى ءبىر ساتتە قازاقتىڭ «كەڭەس» كۇيىن ورىنداپ, الەم نازارىن اۋداردى. ال 2011 جىلى جاستار جاپپاي «قارا جورعا» ءبيىن بيلەدى. بۇل ەلىمىزدىڭ تاۋەلسىزدىك كۇنىنە ارنايى دايىندالعان سىيلىعى-تۇعىن. كەيىن اتالعان فلەشموب گيننەستىڭ رەكوردتار كىتابىنا تىركەلدى.
