سۋرەتتى تۇسىرگەن – اۆتور
قارجىلاي كومەكتىڭ ارقاسىندا سۇرانىسقا يە كاسىپتىڭ اياسى ودان ءارى كەڭەيە تۇسەدى. اۋەلدە از-ازدان ساتقان تۇشپاراسىنا جىل وتە سۇرانىس كوبەيگەن. جالعىز ءوزى كۇنىنە تۇيگەن بەس-التى كيلو تۇشپاراسى لەزدە ءوتىپ كەتىپ وتىرعان. قازىر كاسىبى كەڭەيىپ, ەكى ادامدى جۇمىسپەن قامتىپ وتىر. ءوندىرىس كولەمى دە ەداۋىر ارتقان. سونىڭ وزىندە سورەدە تۇشپارا قالمايدى. فارشقا نەندەي دامدەۋىش قوساتىنىن كىم ءبىلسىن, ايتەۋىر اۋىلدىقتار «رايحاننىڭ تۇشپاراسى» دەپ, ىزدەپ ءجۇرىپ الادى ەكەن. ءتىپتى وسكەمەننەن دە تاپسىرىس تۇسەدى.
– باستاعان كاسىبىمە قولداۋ كورسەتكەن اۋدان اكىمدىگىنە راحمەت ايتامىن. 2009 جىلى كۇرشىمگە كەلىن بولىپ تۇسكەنمىن. اتا-ەنەم 20-25 جىل بويى تۇشپارا ءتۇيىپ, ناپاقا تاۋىپ وتىرعان ەكەن. سولارعا كومەكتەسىپ ءجۇردىم. كەيىن بولەك شىقتىق. ۇيدە بالامەن وتىرىپ, تۇشپارا جاساۋدى قايتا قولعا الدىم. ءبىر جاعىنان جالعىز ءوزى جۇمىس ىستەپ جۇرگەن جولداسىما كومەكتەسەيىن دەدىم. اۋەلدە, ەكى دۇكەنگە تاراتىپ وتىردىم. جاساعان تۇشپارام حالىققا ۇنادى. قولىم دا جاتتىقتى. كەيىن جۇمىسقا شىعىپ كەتتىم. بىراق كەشكىسىن بالا-شاعانىڭ تاماعىن بەرىپ تاستاعان سوڭ تۇشپارا ءتۇيىپ ءجۇردىم. ول كەزدە 5-6 كيلوعا دەيىن تاپسىرىس تۇسەتىن, – دەيدى رايحان نۇرعازينا.
ءدامدى تۇشپاراعا سۇرانىس بارىن بايقاعان اكىمدىك وكىلدەرى مەملەكەت تاراپىنان كومەكتىڭ بارىن ايتقان. ءسويتىپ, ۇيلەرىن كەپىلدىككە قويىپ, كاسىپتى دوڭگەلەتۋ ءۇشىن نەسيەگە قولجەتكىزگەن. تۇسكەن قارجىنى تۇشپارا تسەحىن اشۋعا جۇمساعان. ءونىم كولەمىن دە ۇلعايتقان. ءتۇرلى تۇشپارا, ءدامدى مانتى جاساي باستاعان. قازىر 40 كيلو تۇشپارا ءتۇرىن جاسايدى. اراسىندا مانتى تۇيەدى. ەڭ باستىسى, كليەنت بازاسى قالىپتاسىپ ۇلگەردى. ءتىپتى سوناۋ وسكەمەننەن دە سۇرانىس بار.
رايحاننىڭ ايتۋىنشا, ونىمدەرىن كۇرشىم اۋلىندا 9 دۇكەنگە, سارىولەڭدە 1 دۇكەنگە تاراتادى. كۇزگە سالىم سويىلعان سوعىمنىڭ ءسۇر ەتى تاۋسىلعاندىقتان با, كوكتەم شىعا تۇشپاراعا دەگەن سۇرانىس ەكى ەسە كوبەيەدى. كاسىپكەر كەلىنشەك مۇنىمەن توقتاپ قالماي, كاسىبىن بۇدان دا بيىككە كوتەرۋدى ارماندايدى.
شىعىس قازاقستان وبلىسى,
كۇرشىم اۋدانى
