فوتو: aqtobegazeti.kz
جۇمىسسىزدىق دەڭگەيى حالىقارالىق ەڭبەك ۇيىمىنىڭ ادىستەمەسى بويىنشا ەسەپتەلگەن. ياعني بۇل ۇيىمنىڭ ستاندارتتارىنا سايكەس, جۇمىسسىزدار – تابىستى كاسىبى بولماعان, ونى بەلسەندى ىزدەگەن جانە جۇمىسقا كىرىسۋگە دايىن ادامدار.
«2024 جىلعى I توقساندا قازاقستاندا حالىقارالىق ەڭبەك ۇيىمىنىڭ ادىستەمەسى بويىنشا ەسەپتەلگەن جۇمىسسىزدىق دەڭگەيى 4,7%-دى قۇرادى. ەكونوميكانىڭ ءارتۇرلى سالالارىندا 9 167,3 مىڭ ادام جۇمىس ىستەيدى, ولاردىڭ 6 981,4 مىڭى (76,2%) جالدامالى قىزمەتكەر بولسا, 2 185,9 مىڭ ادام (23,8%) – ءوزىن-ءوزى جۇمىسپەن قامتىعاندار. 15 جانە ودان ۇلكەن جاستاعى حالىققا شاققانداعى جۇمىسپەن قامتۋ دەڭگەيى 64,8% بولدى», دەلىنگەن حابارلامادا.
ال 15 پەن 34 جاستاعى جاستار اراسىنداعى جۇمىسسىزدىق دەڭگەيى 3,1%-دى قۇراپ وتىر.
ستاتيستيكا بيۋروسىنىڭ اقپاراتىنشا, ەڭبەك جانە حالىقتى الەۋمەتتىك قورعاۋ مينيسترلىگىنىڭ جۇمىسپەن قامتۋ ورگاندارىندا 2024 جىلعى ءساۋىر ايىنىڭ سوڭىنداعى جاعداي بويىنشا 315,6 مىڭ جۇمىسسىز ادام رەسمي تىركەلگەن. تىركەلگەن جۇمىسسىزداردىڭ ۇلەسى جۇمىس كۇشىنىڭ 3,3%-ىن قۇرادى.
