سۋرەتتى تۇسىرگەن – اۆتور
كەنجەباي كولىن جاعالاپ بارىپ, بەلدەن اسقانداعى شالعىندى جازىقتا بۇرىن-سوڭدى مۇنشالىقتى سۋ بولماعان كورىنەدى. بيىل ايناداي كول جاتىر. ورتا تۇستاعى قامىس-قامىستىڭ اراسى شۋلاعان قۇس. جاعاسىنداعى جازيرادا قاڭقىلداعان قازدارى قويداي جايىلىپ ءجۇر. ۇيرەكتەرى توبەڭنەن توبىمەن ۇشادى. ودان بولەك لايلەك, اققۇتان سەكىلدى قۇستار قونعان. ءبىر قىزىعى, جان بالاسىنان ۇرىكپەيدى. ال اۋىلعا تاياۋ بەتتەگى ايدىندا جۇپ-جۇبىمەن اققۋلار ءجۇزىپ ءجۇر. قاناتتارىمەن سۋدى سابالاي كەلىپ قونىپ جاتقاندارى قانشاما؟ جەرگىلىكتى جۇرت بۇرىندارى ءبىر جۇپ اققۋ كورسەك كوردىك, ايتپەسە ول دا جوق بولاتىن دەيدى. بيىل قۇستىڭ كوبەيۋىن ۇلكەندەر جاقسىلىققا بالاپ وتىر. راس, قاي قۇس بولسىن, جۇمىرتقاسىن جايلى ءارى تىنىش جەرگە سالادى.
كوز الدىمىزدا ءجۇزىپ جۇرگەندەرىن ساناپ كورىپ ەدىك, 12 اققۋ ەكەن. جۇپ-جۇبىمەن كول بەتىندە تەربەلىپ ءجۇر. الەمدە اققۋدىڭ جەتى ءتۇرى بولسا, ەلىمىزدە ونىڭ ەكى-اق ءتۇرى مەكەندەيدى: سىبىرلاق جانە سۇڭقىلداق اققۋ. قۇستىڭ سىرىن بىلەتىندەردىڭ ايتۋىنشا, اقسۋاتتىڭ ماڭايىنا قونىپ جاتقاندارى سىبىرلاق اققۋلار. قانداي بولسا دا, كول بەتىن كورىكتى ەتىپ جۇزەدى. ادەمى كورىنىس. ارعى جاعىنان اسقارىن قار باسقان التاي تاۋىنىڭ كۇنگەي جاعى مۇنارتادى. جەلكە تۇسىمىزدا ساۋىر-سايقاننىڭ سىلەمدەرى كورىنەدى. نۋ قامىستىڭ اراسىنا جۇپتاسىپ جۇمىرتقا سالعان اققۋلار كۇزگە دەيىن وسى ماڭنىڭ كوركى بولادى.
شىعىس قازاقستان وبلىسى,
كۇرشىم اۋدانى
