بارا سالا بىزگە التى اي ءتىل ۇيرەتتى. تۇرىك ءتىلى مەن اعىلشىن ءتىلىن ۇيرەندىك: اپتاسىنا 4 كۇن. تەك جۇما, سەنبى كۇندەرى عانا ماماندىققا باۋليتىن پاندەر قويىلدى. «جۋرناليستيكا جانرلارى», «قازاق جۋرناليستيكاسىنىڭ تاريحى», «تەلەراديو نەگىزدەرى» – ساباقتارىمىز دا وسال ەمەس. سوناۋ «دالا ءۋالاياتىنىڭ گازەتى» مەن «قازاق» گازەتى, «ايقاپ» جۋرنالىنىڭ تاريحى, شىعارۋ بارىسىنداعى قيىندىقتارى, ءبارى-ءبارىن ءبىز العاش وسى جۋرناليستيكا كافەدراسىنداعى دارىستەر بارىسىندا وقىپ-بىلدىك. سەيدۋللا سادىقوۆ اعامىز باستاعان بەكجىگىت سەردالى, الىمبەت بوستانوۆ, دوسىمبەك نىسانباەۆ, ءۇمىت زۇلحاروۆا, اسحات سادىبەكوۆ, بەكجان ەسەنباەۆ سىندى ۇستازدارىمىز جاقسى ءبىلىم بەردى. ونىڭ قادىرىن, دەڭگەيىن باكالاۆرياتتى ءبىتىرىپ, قازۇۋ-گە تۇسكەندە بىلدىك. سوندا ۇستازدارىمىز «تۇركىستان ۋنيۆەرسيتەتى سەندەرگە جاقسى ءبىلىم بەرىپتى, ءبىزدىڭ بالالار وقۋ-بىلىمنەن گورى جۇمىسقا ەرتە كىرىسىپ كەتتى», دەپ بىرنەشە ۇستاز ايتتى.
جالپى, ءبىزدىڭ قوجا احمەت ياساۋي ۋنيۆەرسيتەتى ستۋدەنتتەردى الەۋمەتتىك قامتۋ جاعىنان دا الدا بولدى. سەبەبى تەگىن تاماق, وقۋ ورنى مەن جاتاقحانا اراسىندا تەگىن تاسىمالدايتىن اۆتوبۋس, جايلى جاتاقحانامەن قامتاماسىز ەتتى. بەلسەندى ستۋدەنت بولساڭ, ءبىر كۇندە ءبىر ەمەس, ءتىپتى تۇسكى جانە كەشكى اس ىشۋگە ەكى تالون بەرەتىن. جوعارىدا ايتىپ كەتكەندەي, ءتۇرلى سايىستا وزا شاۋىپ, بايگە الساڭ, اقشالاي سىيلىعى ءوز الدىنا. قىسقاسى, نە كەرەك, ۋنيۆەرسيتەتتىڭ وسىنداي قولداۋىنىڭ ارقاسىندا الاڭسىز ءبىلىم الىپ ءارى قوعامدىق جۇمىسپەن دە اينالىسىپ, جاي مامان ەمەس, كوكىرەگى وياۋ, كوزى اشىق, قوعام بەلسەندىسى بولىپ شىقتىق. قاتارلاستارىمىز كىلەڭ مادەنيەت سارايىنداعى بي, ءان, كوڭىلدىلەر مەن تاپقىرلار كلۋبىنا قاتىساتىن ونەرپاز, دارىندى جاستار بولدى. ءبىز ءبىر-بىرىمىزبەن ءبىلىم جاعىنان, قوعامدىق جۇمىسقا قاتىسۋ جاعىنان باسەكەلەس بولدىق, بىراق ءبىر ءۇيدىڭ بالاسىنداي تاتۋ دا بولدىق.
قازىرگىدەي ءبىر-ءبىر ۇيالى تەلەفونعا شۇقشيۋ دەگەن جوق. اقپاراتتى كوبىنە گازەت-جۋرنالدار, تەلەسيۋجەتتەر مەن باعدارلامالاردان الاتىنبىز. كىتاپ وقيتىنبىز. سونى وتىرىستاردا تالقىلاپ, «ادەبي ورتا بار ما؟» دەگەن سياقتى تاقىرىپتاردا ءجيى پىكىرسايىس وتكىزىپ تۇرۋشى ەدىك. سوندا «جاستار عوي» دەپ بالسىنبەي, سول تۇستاعى ۋنيۆەرسيتەتىمىزدىڭ ماڭدايالدى پروفەسسور-وقىتۋشىلارى راحمانقۇل بەردىباي, مەكەمتاس مىرزاحمەت ۇلى سىندى تاۋ تۇلعالار كەلىپ, قاتىسىپ, ءوز باعالارىن بەرىپ كەتۋشى ەدى. ول دەگەن ءبىز ءۇشىن ءبىر مارتەبە بولدى.
«قۇتتى بىلىك» ءۇشىن ماقسات شوتاەۆ ۇستازىمىزعا ەرەكشە العىس. فيلولوگيا فاكۋلتەتىندە ءدارىس بەرەتىن اعايىمىز بوس ۋاقىتىندا وسى ءبىلىم سايىسىن ۇيىمداستىرىپ, جىل سايىن جاڭا توپ قۇرىپ, بۇرىنعى مىقتى كوماندالارمەن سايىستىرىپ, كىل مىقتىدان, كىم مىقتىنى ايقىنداپ بەرەتىن. اي سايىنعى ۇزدىكتەردەن جىل سوڭىندا كۋبوك يەگەرى ىرىكتەلىپ شىعاتىن.
سول جۋرناليستيكا كافەدراسىنىڭ قۇرىلعانىنا, مىنە, 30 جىل تولىپتى.
قازىر قاراپ وتىرسام, ءبىز كەرەمەت ستۋدەنتتىك شاقتى باستان وتكەرىپپىز. قوجا احمەت ياساۋي ۋنيۆەرسيتەتى دەسە, كوز الدىمىزعا سول ءبىر قۇت مەكەن ەلەستەيدى.
اتىرگۇل ءتاشىم,
جۋرناليستەر وداعىنىڭ مۇشەسى
