فرانتسيادا اۋقىمدى شەرۋلەر ءوتتى

استانا. 11 قاڭتار. كەشە, 10 قاڭتاردا فرانتسيانىڭ كوپتەگەن قالالارىندا مىڭداعان ادامداردىڭ قاتىسۋىمەن شەرۋلەر بولىپ ءوتتى. جۇرت وسىلايشا پاريجدە ايدىڭ العاشقى ونكۇندىگىندە ورىن العان تەراكتىلەردە قازا تاپقانداردى ەسكە ءتۇسىردى. بۇل تۋرالى ras.kz حابارلادى. «بوستاندىقتى قولداۋ مەن تەررورعا قارسى مارش بۇل كۇنى پو, ورلەان, تۋلۋزا, نانت, نيتستسا سەكىلدى قالالاردى قامتىدى. كوشەگە شەرۋگە شىققانداردىڭ جالپى سانى 700 مىڭ ادامعا جۋىقتادى. ال ەسكە ءتۇسىرۋ مەن ىنتىماقتىستىقتى بىلدىرەتىن نەگىزگى اكتسيا بۇگىن, 11 قاڭتار كۇنى ءورىس الدى. وعان ەۋروپا وداعى مەن جەكەلەگەن ەلدەردىڭ ليدەرلەرى قاتىستى. سولاردىڭ قاتارىندا گەرمانيا كانتسلەرى انگەلا مەركەل, يتاليا پرەمەر-ءمينيسترى ماتتەو رەنتسي, يسپانيا ۇكىمەتىنىڭ باسشىسى ماريانو راحوي, ەۋروپا كەڭەسىنىڭ پرەزيدەنتى دونالد تۋسك, ۇلىبريتانيا پرەمەر-ءمينيسترى دەۆيد كەمەرون, ەۋرووداق ديپلوماتياسىنىڭ باسشىسى فەدەريكا موگەريني, ەۋروپارلامەنت توراعاسى مارتين شۋلتس بولدى. ۋكراينا جاعىنان پرەزيدەنت پەتر پوروشەنكو كەلدى. تەراكتىلەردىڭ باسى 7 قاڭتار كۇنى پاريجدەگى Charlie Hebdo ساتيرالىق جۋرنالىنىڭ رەداكتسياسىنا ەكى ادامنىڭ شابۋىل جاساپ, كالاشنيكوۆ اۆتوماتىنان وق جاۋدىرۋىنان باستالدى. وسى لاڭكەستىكتىڭ ناتيجەسىندە رەداكتسيانىڭ 10 قىزمەتكەرى جانە 2 پوليتسەي قازا تاپتى. تاعى 11 ادام جاراقات الدى. كەيىنىرەك تاعى بىرقاتار نىسانداردا جارىلىستار بولىپ, سوڭى اتىسقا ۇلاستى. كۇش قۇرىلىمدارىمەن قاقتىعىستا لاڭكەستەردىڭ ءبارى ءولتىرىلدى. ايدار ورىسباەۆ. دەرەك: ras.kz. سۋرەت: ipress.ua.