بۇل كۇنى اكتسياعا قاتىسۋشىلار قاراعايعا ورانىپ جاتقان كورىكتى اۋىلداردىڭ ءبىرى, تايىنتى جاققا جولعا شىقتى. وبلىستىق ۆولونتەرلەر فرونت-كەڭسەسىنىڭ جەتەكشىسى ايدوس ادىلبەكوۆتىڭ ايتۋىنشا, جىل كولەمىندە مولشەرى 29 ملن كوشەت وتىرعىزىلادى ەكەن. جول-جونەكەي وسى ءىس-شارانىڭ وتۋىنە ۇيىتقى بولعان الەكسەي سيبيرسكي قاتىسۋشىلارعا جۇمىس بارىسىن ءتۇسىندىرىپ ءوتتى. كوشەت ەگۋدە, توپىراق اراسىندا اۋا قالىپ قالماۋىن باسا ايتتى. ماسەلەن, تاياز شۇڭقىرعا تامىر جايقالعان كوشەتتى وتىرعىزۋ بەكەرشىلىك ەكەن. كوشەتتەردى تاسىمالدايتىن بولسا, تامىرى اۋا وتە قويمايتىنداي پاكەتتە بولعانى ابزال. ايتپەسە, تامىرداعى توپىراق قۇرعاپ كەتەدى. وسى سەكىلدى ازدى-كوپتى ەرەجەلەردى تۇسىندىرگەن سوڭ جان-جاقتان كەلگەن قاتىسۋشىلار جاسىل جەلەك ەگۋگە كىرىسكەن.
– كوشەتتەر الدىمەن تۇقىمباقتاردا تامىر جايادى. سوسىن وسىنداي كەڭ ۋچاسكەلەرگە شىعارامىز. كوكتەمگى ۋاقىتتا 2000 گا, قالعان 3600 گا كۇز ايلارىندا ەگىلەدى, – دەدى شقو تابيعي رەسۋرستار جانە تابيعات پايدالانۋدى رەتتەۋ باسقارماسى باسشىسىنىڭ ورىنباسارى ارمان ەسەنتاەۆ.
ەكوبەلسەندى الەكسەي سيبيرسكيدىڭ سوزىنشە, ەكوجۇيەنى رەتتەۋ قادامدارىن ەلىمىزدە دە جاساۋدى ءجون كوردى. الاپات ورمان ءورتى بولعان اباي وبلىسىنا بارۋدى دا جوسپارلاپتى. دەگەنمەن شىعىس قازاقستانعا دا ات باسىن بۇرۋدى ءجون كوردى.
– بايقاساڭىزدار, تايىنتى تاستى جەر. قاراعاي جاقسى شىعادى. سوندىقتان قاراعاي كوشەتتەرىن وتىرعىزدىق. ونىڭ كۇتىمىن جەرگىلىكتى ورمان شارۋاشىلىعى قىزمەتكەرلەرى جاۋاپكەرشىلىكتەرىنە الادى. الداعى ۋاقىتتا مۇنىڭ اۋقىمى كەڭەيەدى. ەندىگىدە ەگىلەتىن كوشەتتەردىڭ سانى ەكى ەسەگە ۇلعايادى, – دەدى ەكوبەلسەندى ا. سيبيرسكي.
پرەزيدەنت باستاماسىمەن قولعا الىنعان «تازا قازاقستان» اكتسيا اياسىندا شىعىس قازاقستان وبلىسىندا بىرقاتار شارۋا اتقارىلدى. اركىم اينالاسىن قوقىستان تازارتىپ, تال ەكتى. تابيعات جاناشىرلارىنىڭ سوزىنشە بۇل يگى ءىس جالعاسىن تابا بەرمەك.
شىعىس قازاقستان وبلىسى,
ۇلان اۋدانى
