فوتو: newsroom.kz
قازاقستان رەسپۋبليكاسى پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋ ەكى ەل اراسىنداعى داۋلى ماسەلەلەردىڭ ءتۇيىنى تۇبەگەيلى تارقاۋىنا تىلەكتەستىك ءبىلدىرىپ, الماتى تمد ەلدەرى ءۇشىن تاريحي وقيعالاردىڭ ورتالىعى بولعانىن اتاپ ءوتتى. بۇل رەتتە كسرو-نىڭ 11 ەلى قول قويعان 1991 جىلعى الماتى دەكلاراتسياسىن ايرىقشا اتاۋعا بولادى. سوندىقتان كەلىسسوزگە الماتى ارنايى تاڭدالعانىنا ارمەنيا مەن ازەربايجان قازاقستاننىڭ ماڭىزدى ستراتەگيالىق سەرىكتەستەرى ەكەنىنە توقتالدى.
«ازەربايجان مەن ارمەنيا – ءبىز ءۇشىن جاقىن ەلدەر. تاراپتارعا جەمىستى جۇمىس پەن سەنىمدى ديالوگ تىلەيمىن», دەدى م.نۇرتىلەۋ.
ەكى ەلدىڭ سىرتقى ساياسي ۆەدومستۆالارىنىڭ باسشىلارى 1991 جىلعى الماتى دەكلاراتسياسىنىڭ ازەربايجان مەن ارمەنيا اراسىنداعى قاتىناستاردى رەتتەۋ, ونىڭ ىشىندە شەكارانى دەليميتاتسيالاۋ پروتسەسىندە ماڭىزدى ءرول اتقارعانىن ەسكەرە وتىرىپ, الماتى قالاسىنداعى كەزدەسۋدىڭ سيمۆولدىق سيپاتىنا ءمان بەردى.
«ارمەنيا مەن ازەربايجان اراسىنداعى قارىم-قاتىناستى قالىپقا كەلتىرۋ ۇدەرىسى بويىنشا تۇراقتى كەزدەسۋلەر ءوتىپ, بەيبىت كەلىسىمگە كەلۋ باعىتىندا بىرقاتار قادام جاسالىپ جاتىر. بىزگە كەزدەسۋ الاڭىن ۇسىنعان قازاقستانعا العىس ايتامىز. دەلەگاتسيالار سوڭعى رەت ەكى اي بۇرىن بەرليندە كەزدەسكەن بولاتىن. تاراپتار بەيبىتشىلىك كەلىسىمىنە كەلۋ ءۇشىن, ولاردىڭ ۇستانىمدارىن كورسەتەتىن قۇجاتتارمەن الماسۋ جۇرگىزىلدى», دەيدى دجەيحۋن بايراموۆ.
كەلىسسوزدەردىڭ ناقتى قانداي شەشىممەن اياقتالاتىنى ازىرگە بەلگىسىز. كەزدەسۋگە كەلگەن تاراپتار ءوز تالاپ-تىلەكتەرىن ورتاعا سالعان جۇزدەسۋدى جۋرناليستەردىڭ قاتىسۋىنسىز جالعاستىردى.
«ارمەنيا بەيبىتشىلىك كەلىسىمىنە ناقتى ءمان بەرىپ وتىر. ءبىز كەلىسسوز ۇدەرىسىنە تياناقتى قاتىسامىز. مەنىڭشە بەيبىتشىلىك كەلىسىمىنە قول قويۋمەن شەكتەلىپ قالماي, ءارى قاراي قادام باسۋىمىز كەرەك. بارلىق كولىك ينفراقۇرىلىمى ولار وتەتىن ەلدەردىڭ ەگەمەندىگىندە قالاتىنىن ەسكەرىپ, باسقا دا نازىك ماسەلەلەرگە مەيلىنشە ءمان بەرگەن ابزال. ەكىجاقتى بەيبىتشىلىك ۇدەرىسىن ىلگەرىلەتۋگە الاڭ ۇسىنىپ, بەلسەندىلىك تانىتقان قازاقستان پرەزيدەنتىنە العىس ايتقىم كەلەدى. بۇگىنگى كەلىسسوزدەر وسى ۇدەرىسكە ءوز ۇلەسىن قوساتىنىنا سەنىم بىلدىرەمىن», دەدى ارارات ميرزويان.
ايتا كەتۋ كەرەك, كەلىسسوزدەر وتىرىسىنا دەيىن الماتىعا كەلگەن قوس ەلدىڭ سىرتقى ىستەر مينيسترلەرى قازاقستان سىرتقى ىستەر ءمينيسترى مۇرات نۇرتىلەۋمەن كەزدەسىپ, وڭىرلىك ەكونوميكالىق جانە كولىكتىك ءوزارا بايلانىستى دامىتۋ ماسەلەلەرى بويىنشا پىكىر الماستى.
كەزدەسۋ بارىسىندا ەلدەر اراسىنداعى ستراتەگيالىق ارىپتەستىك پەن وداقتاستىقتى ودان ءارى نىعايتۋ ماسەلەلەرى تالقىلانىپ, تاۋار اينالىمى مەن ترانزيتتىك-كولىكتىك الەۋەت كولەمىن ۇلعايتۋ جايى سارالاندى.
الماتى
