فوتو: caspianlife.kz
ءوتىنىم قابىلداۋدىڭ 1-لەگىندە 4500 تۇلعاعا گرانت بەرۋ جوسپارلانىپ وتىر.
جاڭا بيزنەس-يدەيالاردى ىسكە اسىرۋ گرانتىنا ءوتىنىم بەرە الاتىن ازاماتتار:
- تىركەلگەن جۇمىسسىزدار;
- جەكە كاسىپكەرلەر (تىركەۋ مەرزىمى 3 جىلعا دەيىن).
بۇل رەتتە ۇمىتكەر تومەندەگى الەۋمەتتىك ساناتتاردىڭ بىرىنەن بولۋ كەرەك:
- مۇگەدەكتىگى بار ادامدار;
- قولدانىستاعى «قانداس» مارتەبەسى بار ادامدار;
- وڭىرارالىق قونىس اۋدارۋشىلار;
- از قامتىلعان وتباسى مۇشەلەرى;
- كوپبالالى وتباسى مۇشەسى (جۇبايى / زايىبى);
- مۇگەدەكتىگى بار بالانى تاربيەلەپ وتىرعان ادام (جۇبايى / زايىبى);
- اسىراۋشىسىنان ايىرىلۋ بويىنشا جاردەماقى الۋشىلار.
سونداي-اق ۇمىتكەردىڭ «باستاۋ بيزنەس» جوباسى بويىنشا كاسىپكەرلىك نەگىزدەرىنە وقىتۋ تۋرالى 3 جىلدان اسپايتىن مەرزىمگە سەرتيفيكاتى بولۋى ءتيىس.
«راسىمدەردىڭ اشىقتىعىن قامتاماسىز ەتۋ, ادامي فاكتوردى ازايتۋ, ءوتىنىش بەرۋشىلەرگە ىڭعايلى بولۋ ءۇشىن گرانتتار بەرۋدىڭ بۇكىل پروتسەسى ەلەكتروندىق فورماتقا اۋىستىرىلدى. گرانت الۋعا وتىنىمدەردى قابىلداۋ بىرىڭعاي تەرەزە – «Business.enbek.kz» پورتالى ارقىلى جۇزەگە اسىرىلادى.
گرانتتى: قاجەتتى قۇرال-سايمانداردى, ەڭبەك قۇرالدارىن, تەحنولوگيالىق جابدىقتاردى, مالداردى, جانۋارلاردى, قۇستاردى, كوشەتتەردى, بۇتالاردى, تۇقىمداردى ساتىپ الۋعا, ورىن-جايلاردى جالعا الۋ اقىسىن تولەۋگە الۋعا بولادى.
گرانتتار تۇتىنۋشىلىق ماقساتتارعا, كرەديتتىك قارىزداردى وتەۋگە, جىلجىمايتىن تۇرعىن ءۇي ساتىپ الۋعا جانە سالۋعا, جەر ۋچاسكەلەرىن ساتىپ الۋعا, اكتسيزدەلەتىن ونىمدەر وندىرۋگە بەرىلمەيدى», دەلىنگەن مينيسترلىك مالىمدەمەسىندە.
ۇمىتكەرلەر ءوز بيزنەس-جوباسىن كوميسسيا وتىرىستارىندا تانىستىرادى. ال كوميسسيانىڭ ءاربىر مۇشەسى بيزنەس-جوسپاردى بەلگىلى شارت نەگىزىندە باعالايدى.
گرانت بەرۋ تۋرالى شەشىم كوميسسيالىق تۇردە جانە ۇمىتكەرلەردىڭ بيزنەس-جوبالارىنىڭ پىسىقتالۋىن باعالاۋدىڭ ناقتى ولشەمشارتتارى نەگىزىندە قابىلدانادى.
كوميسسيا شەشىمى ۇمىتكەردىڭ پورتالداعى جەكە كابينەتىنە جىبەرىلەدى. كوميسسيانىڭ وڭ شەشىمى بولعان جاعدايدا ۇمىتكەر بانك دەرەكتەمەلەرىن ۇسىنادى, شارتقا قول قويادى جانە ودان ءارى توقسان سايىن قاراجاتتىڭ پايدالانىلۋى تۋرالى ەسەپ بەرەدى. مۇنىڭ ءبارى ەڭبەك موبيلدىلىگى ورتالىقتارى مەن ونىڭ فيليالدارىنا (مانساپ ورتالىقتارىنا) بارماي-اق ەلەكتروندىق فورماتتا جاسالادى.
ايتا كەتەيىك, گرانت قاراجاتى ءىسىن جاڭا باستاعان كاسىپكەرلەرگە وزدەرىنىڭ بيزنەس-الەۋەتىن اشۋعا, ءوندىرىستى جولعا قويۋعا جانە دامىتۋعا, سول ارقىلى ءوزىن تۇراقتى تابىسپەن قامتاماسىز ەتۋ ءۇشىن بەرىلەدى.
