فوتو: pixabay.com
بەلگىسىز بىرەۋلەر پاۆلودارلىق قارتقا تەلەفون سوعىپ, وزدەرىن بانك قىزمەتكەرلەرى رەتىندە تانىستىرعان. الاياقتار زەينەتكەرگە بىرەۋدىڭ ونىڭ اتىنان نەسيە العىسى كەلگەنىن ايتقان. وتىنىشتەن باس تارتۋ ءۇشىن تاعى ەكى بانكتەن نەسيە الۋ قاجەت. زەينەتكەر الاياققا سەنىپ, ايتقانىن ورىنداعان. ناتيجەسىندە ەر ادام ەكى بانكتەن وزىنە جالپى سوماسى 4 201 198 تەڭگە نەسيە الىپ, تەلەفون سوعۋشىلاردىڭ كورسەتكەن ەسەپشوتىنا اۋدارعان.
پوليتسەيلەر بۇعان دەيىن جاسالىپ جاتقان ەسكەرتۋلەرگە قاراماستان, ازاماتتار بەلگىسىز قوڭىراۋ شالۋشىلارعا سەنۋىن جالعاستىرىپ جاتقانىن اتاپ ءوتتى. كوبىنەسە قارت ادامدار الاياقتاردىڭ قۇربانى بولادى.
«الاياقتىق فاكتىسى بويىنشا سوتقا دەيىنگى تەرگەۋ باستالدى. كۇدىكتىنىڭ جەكە باسىن انىقتاۋ بويىنشا جەدەل-ىزدەستىرۋ شارالارى جۇرگىزىلىپ جاتىر», دەپ حابارلادى وبلىستىق پوليتسيا دەپارتامەنتىنىڭ ءباسپاسوز قىزمەتى.
ءتارتىپ ساقشىلارى بەيتانىس جانە بەلگىسىز تۇلعالارعا سەنبەۋدى سۇرايدى.
