سۋرەتتەر سپورتتى دامىتۋ ديرەكتسياسىنان الىندى
جاستار جاسىنداي جارقىلدادى
الدىمەن جاستار باسەكەسى تۋرالى ايتساق, 6 مامىردا اياقتالعان دودا وتە قىزىقتى ءوتتى. سەبەبى بۇل سىندا جاستارىمىزعا اسىرەسە ءۇندىستان مەن وزبەكستان بوكسشىلارى باسەكەلەس بولدى. سوعان قاراماستان 12 سالماقتىڭ توعىزىندا قىزدارىمىز فينالعا شىقتى.
العاشقى بولىپ 52 كگ سالماقتا رينگكە كوتەرىلگەن باعجان وتىنباي ۇندىستاندىق نيشاعا 0:5 ەسەبىمەن جول بەرىپ, كوڭىلىمىزدى كۇپتى ەتكەن-ءدى. الايدا ودان كەيىنگى ءتورت جەكپە-جەكتە قىزدارىمىز جەڭىسكە جەتىپ, قالىڭ جانكۇيەردى قۋانتىپ تاستادى. 54 كگ سالماق دارەجەسىندە اياجان سىدىق ۇندىستاندىق تاماننامنان 4:1 ەسەبىمەن باسىم تۇسسە, 57 كگ سالماقتا اياجان ەرمەك وزبەك بوكسشىسى فەرۋزا شاريپوۆاعا ەش مۇمكىندىك بەرمەدى – 5:0. 60 كگ سالماقتا تولعاناي قاسىمحان ۇندىستاندىق نيكيتا چاندتى 4:1 ەسەبىمەن جەڭدى. ال 66 كگ سالماقتىڭ جەكپە-جەگىن كوپ جانكۇيەرمەن بىرگە ءبىز دە اسىعا كۇتتىك. سەبەبى اتالعان سالماقتا قازاقتىڭ قوس قىزى قولعاپ ءتۇيىستىردى. ۇلدانا تاۋباي مەن قىتايلىق قانداسىمىز دينا جاناتبيكە اراسىنداعى باسەكە كوپتىڭ كوڭىلىنەن شىقتى. تەڭ دارەجەدە وربىگەن باسەكەدە ۇلدانا 4:3 ەسەبىمەن جەڭىستى ج ۇلىپ الدى.
ال 70 كگ سالماقتا ەل نامىسىن قورعاعان ماريا سيدورەنكو قىتاي ساپىنداعى تاعى ءبىر قانداسىمىز الميرا ابدىرايىمعا 0:5 ەسەبىمەن ەسە جىبەردى. شۇعىلا ءنالىباي 75 كگ سالماقتا ۇندىستاندىق رۋدريكادان (4:1) ايلاسىن اسىرسا, 81 كگ سالماقتا ارۋجان زەينوللاەۆا ۇندىستاندىق ءحۋشيدى (4:1) جەڭىپ, ازيا چەمپيونى اتاندى. +81 كگ سالماقتا پانار سەيىتحانقىزىنىڭ وزبەك بوكسشىسى سوبيراحون شاحوبيددينوۆاعا 0:5 ەسەبىمەن ەسەسى كەتتى.
بۇل كەشتە جىگىتتەردىڭ ناتيجەسى تومەن بولدى. فينالعا 13 سالماق بويىنشا التى بوكسشىمىز عانا جولداما الدى. 60 كگ سالماقتا الەكسەي حاۆانتسەۆ ۇندىستاندىق ساگار جاحارعا ەش مۇمكىندىك بەرمەي, 5:0 ەسەبىمەن باسىم ءتۇستى. سارى قۇرلىق دوداسىنا جاڭا سالماققا اۋىسقان (67 كگ) تورەحان سابىرحان بۇل تۋرنيردە جاسىنداي جارقىراپ, الدىنا جان سالعان جوق. سونداي-اق ول دودانىڭ «ەڭ ۇزدىك بوكسشىسى» اتاندى. جەرلەسىمىز فينالدىق ايقاستا مۋحاممادازيزبەك يسمايلوۆتى (وزبەكستان) ەكى مارتە نوكداۋنعا ءتۇسىرىپ, كۇمانسىز جەڭدى. وسىلايشا, ول جاسوسپىرىمدەر مەن جاستار اراسىندا ازيانىڭ ءتورت دۇركىن چەمپيونى اتانىپ وتىر. ءبىر قىزىعى, تورەحان جاسوسپىرىمدەر مەن جاستار اراسىندا ءۇش دۇركىن ازيا چەمپيونى تۋعان اعاسى ماحمۇد سابىرحاننىڭ رەكوردىن بۇزدى.
– فينالداعى وزبەك بوكسشىسى ماعان وتە جاقسى تانىس. بۇعان دەيىن ەلىمىزدەگى بىرنەشە تۋرنيرگە قاتىسقان. وقۋ-جاتتىعۋ جيىنىندا دا قولعاپ تۇيىستىرگەنبىز, – دەدى تورەحان سابىرحان. – ايقاس بارىسىندا باپكەرلەر تاراپىنان «بەلسەندىلىكتى اقىرىنداپ كۇشەيتەرسىڭ» دەگەن تاپسىرما بولدى. ويتكەنى مۋحاممادازيزبەك يسمايلوۆ ءۇش راۋند بويى جوعارى قارقىندا جۇدىرىقتاسا المايدى. ءبىرىنشى راۋندتا ونىڭ شابۋىلىنا قارىمتا جاۋاپ قايتارعاندا ول باسىن بۇعىپ, قۇشاقتاپ الۋعا تىرىستى. ۋاقىت وتە كەلە بەيىمدەلىپ, ونىڭ دا «كىلتىن» تاپتىم. جالپى, چەمپيوناتتا وسى سالماقتا مىقتى سانالعان قىرعىزستان, ءۇندىستان بوكسشىلارىن جەڭىپ, جاقسى تاجىريبە جيناقتادىم. ءاۋ باستا پاريج وليمپياداسىنىڭ جولداماسى ءۇشىن ىرىكتەۋ تۋرنيرىنە قاتىسقىم كەلگەن. الايدا قورعانىس «شلەمنىڭ» الىپ تاستالۋىنا بايلانىستى IBA ەرەسەكتەر ساناتىن 18 جاستان 19 جاسقا كوتەرگەن ەكەن. سوندىقتان پاريجگە بارۋدىڭ رەتى كەلمەدى. مۇنىڭ دا ءبىر قايىرى بار دەپ ويلايمىن. ەندى كۇزدە حورۆاتيادا وتەتىن جاستار اراسىنداعى الەم چەمپيوناتىندا توپ جارسام دەيمىن.
تورەحاننىڭ ءساتتى جولىن ونەر سەيىلحان (71 كگ) ءسانجارالى بەگاليەۆ (75 كگ), ماديار بەكسۇلتانوۆ (80 كگ) جالعاستىردى. ال 86 كگ سالماقتا يمانعالي نۇرپەيىس وزبەك احمادجون يسرويلوۆكە 0:5 ەسەبىمەن ەسە جىبەردى.
اتالعان دودادا «ەڭ ۇزدىك بوكسشى قىز» – الميرا ءابدىرايىم (قىتاي), ال «ەڭ ۇزدىك بوكسشى ۇل» تورەحان سابىرحانعا (قازاقستان) بۇيىردى. جارىس جەڭىمپازدارى 1-ورىن – 700 اقش دوللارى, 2-ورىن – 400 دوللار, 3-ورىن 200 دوللار اقشالاي سىياقىمەن ماراپاتتالدى.
5 التىن, 1 كۇمىس جانە 6 قولا مەدال جەڭىپ العان جىگىتتەرىمىز بەيرەسمي جالپى كوماندالىق ەسەپتە 1-ورىن السا, 6 التىن, 3 كۇمىس جانە 3 قولا ەنشىلەگەن قىزدارىمىز دا تۋرا وسىنداي ناتيجەگە قول جەتكىزدى. 25 سالماق بويىنشا (13 ۇل, 12 قىز) 7 التىن, 3 كۇمىس جانە 12 قولا بۇيىرعان وزبەكستان ەكىنشى ساتىعا جايعاستى. 5 التىن, 9 كۇمىس, 8 قولا جەڭىپ العان ءۇندىستان بوكسشىلارى ۇزدىك ۇشتىكتى تۇيىندەدى.
– 29 ناۋرىز كۇنى عانا جاستار كومانداسىنا اعا جاتتىقتىرۋشى بولىپ تاعايىندالعانىمدى بىلەسىزدەر. ۋاقىت تىعىزدىعىنا بايلانىستى دوداعا بوكسشىلاردى تولىقتاي دايىنداپ ۇلگەرمەدىك, – دەدى جاستار قۇراماسىنىڭ باس جاتتىقتىرۋشىسى قايرات ءساتجانوۆ. – قاتەلىكتەرىمىزدى بايقادىق. تاكتيكالىق, تەحنيكالىق جانە كۇش-قۋات جاعىنان جاتتىعۋ از بولىپ قالدى. بولاشاقتا وسى قاتەلىكتەرمەن جۇمىس ىستەيمىز. بۇگىندە جاستار قۇراماسىندا كۇش-قۋات جاعىنان دايىندىق ازداۋ. ەكىنشىدەن, حالىقارالىق تاجىريبەلەرى جەتىسپەيدى. الداعى ۋاقىتتا, تۇركىستان وبلىسىنداعى «الماتاۋ» سپورت كەشەنىندە وقۋ-جاتتىعۋ جيىنىن وتكىزەمىز. سوسىن سيدنەي وليمپياداسىنىڭ كۇمىس جۇلدەگەرى مۇحتارحان دىلدابەكوۆتىڭ قۇرمەتىنە ۇيىمداستىرىلاتىن حالىقارالىق جارىسقا قاتىسامىز. ودان كەيىن كۇزدە وتەتىن الەم چەمپيوناتىندا باق سىنايمىز.
بوكسشىلار جاراقاتتان امان
بوكسشىلاردىڭ فيزيكالىق جاتتىعۋىنا جاۋاپتى مامان دوناتاس يانۋشەۆيچيۋستى سوزگە تارتقانىمىزدا, ول قۇراما بوكسشىلارىن جىلدامدىق پەن اياقتا تەز قيمىلداۋ ادىستەرىن دامىتۋ كەرەك ەكەنىن ايتتى.
– قازاقستانعا العاش كەلگەندە جىگىتتەردىڭ تارتىپكە ءمان بەرەتىنى ەرەكشە كوزگە ءتۇستى. ەڭبەك, سپورتتىق مىنەز, جاتتىعۋعا دەگەن جاۋاپكەرشىلىك قازاق بوكسشىلارىنىڭ بويىندا بار. جاتتىعۋدان تىس, ۇيقى مەن تاماققا دا قاتتى كوڭىل اۋدارادى. كاسىپقوي بوكستاعى جاتتىعۋ ءۇردىسىن اۋەسقوي بوكسقا دا ەنگىزدىم. «اقبۇلاق», «الماتاۋ» وليمپيادالىق دايىندىق ورتالىقتارى بارلىق تالاپقا ساي. بۇل دا ءوز كەزەگىندە الاڭسىز ناتيجەلى جاتتىعۋعا وڭ اسەرىن تيگىزەدى. دەگەنمەن ءالى كوپتەگەن جوسپار بار. جىلدامدىق, شىدامدىلىق, اياقتا قيمىلداۋ, كۇش-قۋاتتى ودان ءارى ارتتىرۋ قاجەت, – دەيدى مامان.
ايتجانوۆتىڭ ايلاسى
7 مامىردا 22 جاسقا دەيىنگى بوكسشىلار اراسىندا ازيا چەمپيوناتىنىڭ فينالدىق ايقاسى ءوتتى. 13 سالماقتىڭ بارلىعىندا دا شەشۋشى كەزەڭگە جولداما العان ەرلەر قۇراماسى 8 التىن مەدال جەڭىپ الدى. قىزدارىمىز دا 6 التىن, 4 كۇمىس جانە 1 قولا مەدالمەن كوش باستادى.
51 كگ سالماق دارەجەسىندە بوكسشىلاردى تاڭداۋدا باس باپكەر مىرزاعالي ايتجانوۆ «قۋلىققا» بارعان سەكىلدى. بۇعان دەيىن 54 كيلودا ونەر كورسەتكەن كەنجە مۇرات ۇلىن 51 كگ سالماققا ارنايى ءتۇسىرىپتى. نەگە؟ سەبەبى ول وزبەك بوكسشىسى اسىلبەك جاليلوۆقا قارسىلىق كورسەتەتىن بىردەن-ءبىر بوكسشى ەكەن. وتانداسىمىز وزبەك بوكسشىسىن بۇعان دەيىن 2023 جىلى «Elorda Cup» ءتۋرنيرىنىڭ 1/2 فينالىندا 4:1 ەسەبىمەن جەڭگەن-ءدى. باپكەرلەر قۇرعان جوسپار ورىندالدى. كەنجە مۇرات ۇلى اسىلبەك جاليلوۆتى 5:0 ەسەبىمەن ۇتتى.
54 كگ سالماقتا نۇرسۇلتان التىنبەككە فينالدان گورى, جارتىلاي فينالدىق ايقاس وتە اۋىر ءتيدى. سەبەبى وزبەك بوكسشىسى توبەلەسۋدى جاقسى كورەدى ەكەن. نۇرسۇلتان فينالدىق جەكپە-جەكتە موڭعوليالىق ويۋن-ەردەنە ەنحسايحاننان ايلاسىن اسىردى. نۇرسۇلتان وسىمەن ەكىنشى رەت 22 جاسقا دەيىنگى ازيا چەمپيوناتىندا توپ جاردى.
67 كگ سالماقتا كەلەشەگىنەن زور ءۇمىت كۇتتىرەتىن بوكسشىنىڭ ءبىرى – ەلنۇر ءسۇيىنباي. قارسىلاستارى مىقتى. دەسە دە, شەبەرلىگى, ايلا-ءتاسىلىنىڭ ارقاسىندا توپ جاردى. ول فينالدا 2023 جىلعى جاستار اراسىندا ازيا چەمپيوناتىنىڭ قولا جۇلدەگەرى پريت ماليكتى 5:0 ەسەبىمەن جەڭدى.
71 كگ سالماقتا سابىرجان اققالىقوۆ پەن تاجىك دوۆۋد ماكحاموۆ اراسىنداعى جەكپە-جەك وتە كەرەمەت ءوتتى. اسىرەسە سابىرجان ناعىز قازاق بوكسىن كورسەتتى. كەرەك جەرىندە سوققى جاساپ, ءوزىن جان-جاقتى كورسەتە ءبىلدى. ەسەپ – 5:0, ءبىزدىڭ جىگىتتىڭ پايداسىنا شەشىلدى.
دياس مولجىگىتوۆ (75 كگ) تە جارادى. جەڭىستى نامىستىڭ ارقاسىندا ج ۇلىپ الدى. ول بولاشاعىنان زور ءۇمىت كۇتتىرەتىن بوكسشى ەكەنىن دالەلدەي الدى. جەرلەسىمىز جاستار اراسىندا الەم چەمپيونى, وزبەك بوكسشىسى جاۆوحير ۋمماتاليەۆتى 5:2 ەسەبىمەن ۇتتى.
تالاي جارىستا جۇلدە الىپ جۇرگەن ەل چەمپيونى ەراسىل جاقپەكوۆكە جارتىلاي فينال اۋىر سوققان ەدى. ويتكەنى وزبەكستان وكىلىنىڭ جاستار اراسىندا الەم چەمپيونى دەگەن اتاعى بار ەدى. باسىنان جاراقات الدى. ونى تىككىزىپ, فينالعا شىققان اۋعانستاننىڭ جالعىز وكىلى گايس اليزادادان قينالماي باسىم ءتۇستى.
جالولوۆتى نوكداۋنعا جىبەردى
وزبەكتىڭ ماقتانىشى بوكستان وليمپيادا, الەم چەمپيونى باحودير جالولوۆ قازاق بوكس جانكۇيەرلەرىنە جاقىن تانىس. ءبىزدىڭ قامشىبەك قوڭقاباەۆپەن 8-9 مارتە رينگ تورىندە كەزدەسكەن. سول ءباحوديردىڭ تۋعان ءىنىسى ساماندار جالولوۆ استانادا نوكداۋنعا ءتۇسىپ, جەكپە-جەكتى ەرتە اياقتادى. ونى ساباسىنا تۇسىرگەن – تەمىرلان مۇقاتاەۆ. 86 كگ سالماقتا ونەر كورسەتكەن تەمىرلان بىلتىر ەل سپارتاكياداسىندا كوزگە تۇسكەن ەدى. سول سىندا 19 جاسىندا نەبىر تاجىريبەلى بوكسشىلاردان باسىم ءتۇسىپ, چەمپيون اتانعانىن ءوز كوزىمىزبەن كوردىك. بيىل دا, مىنە, ەل نامىسىن ابىرويمەن قورعادى.
92 كگ سالماقتا بەكنۇر باتىربەكتىڭ قارسىلاسى كەزدەسۋدەن باس تارتىپ, جەڭىس جەكپە-جەكسىز بەكنۇرعا بۇيىردى. باس جاتتىقتىرۋشى مىرزاعالي ايتجانوۆتىڭ ايتۋىنشا, بەكنۇر ۇلتتىق قۇرامانىڭ مۇشەسى ەمەس. بىلتىرعى سپارتاكيادادا ۇشتىككە دە كىرمەگەن. وتكەن وقۋ-جاتتىعۋ جيىنىندا جەڭگەنى بار, جەڭىلگەنى بار, بارلىعىن ىرىكتەپ, اقىرى تاڭداۋ وسى بەكنۇر باتىربەككە ءتۇسىپتى. دۇرىس تاڭداۋ جاساعان سەكىلدى, جەرلەسىمىز باپكەرلەردىڭ سەنىمىن اقتاي ءبىلدى.
جەڭىلگەندى جەر كوتەرەدى
ال ەرلەر اراسىندا فينالدىق ايقاستى باستاپ بەرگەن 48 كگ سالماقتاعى ەرنار قاراپ 2022 جىلعى جاستار اراسىندا الەم چەمپيونى سۋرەش ۆيشۆاناشپەن جۇدىرىقتاستى. بۇل جەردە ءۇندىستان بوكسشىسىنىڭ جەرلەسىمىزگە قاراعاندا ءسال باسىمدىعى بار ەكەنى كورىنىپ-اق تۇردى. 57 كگ سالماقتا ەربولات سابىر ەكى راۋند تازا جەڭىپ تۇرسا دا, وكىنىشكە قاراي, قاباعىنداعى جاراقاتىنا بايلانىستى جول بەردى. 60 كگ سالماقتا رۋسلان كۇزەۋباەۆتىڭ قارسىلاسى بويى ۇزىن ءارى شەبەرلىگى ءسال جوعارى بولدى. اتتەگەن-ايى, جەڭىس كىلتىن تابا المادى. 63,5 كگ سالماقتا ەراسىل تاڭقاي فينالعا دەيىن وتە جاقسى ونەر كورسەتىپ كەلدى. جارتىلاي فينالدا كوپ كۇش جۇمساپ قويعان سەكىلدى. فينالدا وزبەكستان وكىلى ابدۋللوح مادامينوۆقا ەسە جىبەردى. +92 كگ سالماقتا امانات سابىرعالي جاراقاتىنا بايلانىستى جارىستى جالعاستىرۋدان باس تارتتى. بۇعان دەيىن ەكى بوكسشى جاستار اراسىنداعى الەم چەمپيوناتىنىڭ فينالى مەن بىلتىر 22 جاسقا دەيىنگى ازيا چەمپيوناتىنىڭ فينالىندا كەزدەسكەن.
– بوكسشىلارىمىزعا كوڭىلىمىز تولدى. ويتكەنى ارقايسىسىنىڭ وزىندىك شاما-شارقى بار. فينالعا دەيىن جەتكەننىڭ ءوزى – كورسەتكىش. بارلىق سالماقتا التىن بۇيىرمادى. الدىن-الا شامامەن توعىز التىندى جوسپارلاپ ەدىك. وكىنىشكە قاراي, 57 كگ سالماقتا دارىگەردىڭ الدە تورەشىنىڭ قاتەلىگى دەيمىز بە, جەڭىستى ءۇندى بوكسشىسىنا «سىيلادى». مۇنداي جايتتار وليمپيادا, الەم چەمپيوناتى, ازيا ويىندارىندا دا بولادى. بىراق ءبىر بوكسشى ءۇشىن جارىستى توقتاتىپ, سپورتشىلاردى شەتتەتۋدىڭ اقىرى جاقسىلىققا اپارمايدى. وزگە سپورتشىلارىمىزعا كەسىرى تيمەسىن دەپ كەيدە بارلىعىنا كونۋگە تۋرا كەلەدى. سپورتتا جەڭىس پەن جەڭىلىس قاتار جۇرەدى. كەلەڭسىز جاعدايلار بولادى. وعان دايىن بولدىق. بىراق جىگىتتەردىڭ ەشقايسىسىنا وكپەمىز جوق, – دەدى قۇرامانىڭ باس باپكەرى مىرزاعالي ايتجانوۆ.
6 التىن, 4 كۇمىس, 1 قولا
قازاق قىزدارى اراسىندا رينگ تورىنە ءبىرىنشى بولىپ گۇلنار تۇراپباي كوتەرىلىپ, 2022 جىلعى جاستار اراسىندا الەم چەمپيوناتىنىڭ قولا جۇلدەگەرى, ۇندىستاندىق قارسىلاسى تاماننانى 4:1 ەسەبىمەن جەڭىپ, كوڭىلىمىزدى ءبىر كوتەرىپ تاستاپ ەدى. الايدا ودان كەيىنگى ءۇش جەكپە-جەكتە قىزدارىمىز – انيتا اديشەۆا (52 كگ), ەلينا بازاروۆا (54 كگ), انەل ساقىش (57 كگ) بىرىنەن سوڭ ءبىرى جەڭىلىپ, كوڭىلىمىزدى كۇپتى ەتتى. ءبىر كەزدەسۋدەن كەيىن انار تۇرسىنبەك (63 كگ) تە الدىڭعىلاردىڭ كەبىن كيدى. ايتكەنمەن, شاحناز يساەۆا (60 كگ), اقنار يشانوۆا (66 كگ), جاسمين قيزاتوۆا (70 كگ), ديانا ماعاۋياەۆا (81 كگ), ەلدانا تاليپوۆا (+81) قارسىلاستارىنان باسىم ءتۇسىپ, قازاقستان قورجىنىنا كەزەكتى التىن مەدالدى سالىپ بەردى.
22 جاسقا دەيىنگى بوكسشىلار اراسىندا وتكەن ازيا چەمپيوناتىندا (ەرلەر مەن قىزدار) قۇراما قىز-جىگىتتەرى 14 التىن, 9 كۇمىس جانە 1 قولا مەدال جەڭىپ الدى. ءۇندىستان بوكسشىلارى 7 التىن, 5 كۇمىس, 9 قولا مەدال ەنشىلەسە, 4 التىن, 6 كۇمىس جانە 10 قولا مەدالمەن وزبەكستان ۇزدىك ۇشتىكتى تۇيىندەدى.
تورەشىلەرگە دە ۇلكەن سىناق
– قازاقستاندا بۇعان دەيىن 2016 جىلى ايەلدەر اراسىنداعى الەم چەمپيوناتى ۇيىمداستىرىلعان ەدى. 2023 جىلى جاستار جانە جاسوسپىرىمدەردىڭ ازيا چەمپيوناتىن قابىلدادىق. ەندى مىنە 22 جاسقا دەيىنگى جانە جاستار اراسىندا ازيا چەمپيوناتىن وتكىزۋ مارتەبەسىنە يە بولدىق, – دەدى ازيا بوكس قاۋىمداستىعىنىنىڭ ۆيتسە-پرەزيدەنتى ازيز قوجامبەتوۆ. – بۇگىنگە دەيىن ازيا قۇرلىعىندا ەرەسەكتەر, 22 جاسقا دەيىنگى, جاستار مەن جاسوسپىرىمدەر, مەكتەپ وقۋشىلارى اراسىنداعى تۋرنيرلەر بولىپ ءبولىنىپ كەلگەن ەدى. ەندى 22 جاسقا دەيىنگىلەرمەن بىرگە جاستار قوسىلدى. جاسوسپىرىمدەر مەن مەكتەپ وقۋشىلارىنىڭ جارىسى دا بىرىگەدى. وسىعان بايلانىستى دوداعا قاتىسۋشى ەلدەر مەن سپورتشىلاردىڭ سانى ارتتى. 2022 جىلى تاشكەنتتە 22 جاسقا دەيىنگىلەر اراسىندا وتكەن دوداعا 12 ەلدەن 109 سپورتشى قاتىسسا, 2023 جىلى تايلاندتا 32 ەلدەن 243 بوكسشى جۇلدەگە تالاستى. بيىل جاستارمەن قوسا العاندا 50 سالماقتا جۇلدە ساراپقا سالىندى. ناتيجەسىندە, استاناعا رەكوردتىق كورسەتكىش 25 مەملەكەتتەن 397 (267 ەر, 130 ايەل) ۇمىتكەر باس قوستى. ەكىنشىدەن, دودا 11 كۇنگە جالعاستى. ۇشىنشىدەن, 22 جاسقا دەيىنگى ازيا چەمپيوناتى تەك سپورتشىلارعا عانا ەمەس, تورەشىلەرگە دە ۇلكەن سىناق بولدى. مىسالى, قازاقستاننان بەس تورەشى ءوز دەڭگەيىن ءوسىرۋ ءۇشىن, ەمتيحان تاپسىردى. گۆاتەمالا, الجير, كۋبا, ەۋروپانىڭ بىرنەشە ەلىنەن ارنايى تورەشى كەلدى. بۇلاردىڭ ءبىر بولىگى وليمپيادادا دا قازىلىق ەتەدى.
وسىلايشا, 11 كۇنگە سوزىلعان سارى قۇرلىق دوداسىندا 50 سالماق دارەجەسىندە قازاقستان 25 التىن, 13 كۇمىس جانە 10 قولا مەدال جەڭىپ الدى. ال 12 التىن, 14 كۇمىس 17 قولا بۇيىرعان ءۇندىستان ەكىنشى ساتىعا جايعاسسا, 11 التىن, 9 كۇمىس جانە 22 قولا مەدالمەن وزبەكستان ۇزدىك ۇشتىكتى تۇيىندەدى.
