يننوۆاتسيالىق كورمەدە «Jarqyn» سمارت مەكتەبى وقۋشىلارىنىڭ حيميا, بيولوگيا, ەكولوگيا, اقپاراتتانۋ, قازاق ءتىلى, تاريح, گەوگرافيا, سۋرەت, اعىلشىن ءتىلى ت.ب. پاندەردەن جازعان عىلىمي جوبالارى قويىلىپتى. وسىنىڭ ىشىندە ەسىل سۋىن تازالاۋ, كيىكتەردى ساقتاۋ مەن لايىقتى كوبەيتۋ, ەلوردا كوشەلەرىنىڭ تاريحى, الاش تۇلعالارى بەينەسىن جىپپەن ءورىپ سالۋ ت.ب. تىڭ جوبالار ءىس-شاراعا قاتىسۋشى قاۋىمدى ايرىقشا قىزىقتىردى. ەڭ باستىسى, وسى ەڭبەكتەردىڭ اۆتورلارى ءوز ۇسىنىستارىن جۇيەلى, تارتىمدى جەتكىزە الدى.
«Jarqyn» سمارت مەكتەبىنىڭ ديرەكتورى داۋرەن ماحانوۆ: «قازىر مەكتەپتەن مەكتەپتىڭ ايىرماسى – باسەكەگە قابىلەتتى وقۋشىنى دايارلاپ, تۇلەتىپ ۇشىرۋدا. ءبىز – ارقاشان ىزدەنەتىن, ءاربىر وقۋشىنىڭ تامىر سوعىسىن تۇسىنەتىن ۇجىمبىز. ءبىلىم, وتانشىلدىق تاربيە, زاماناۋي تەحنولوگيانىڭ مەڭگەرتۋ ۇيلەسسە, المايتىن اسۋىمىز جوق. مەكتەپتىڭ اتا-انامەن تىعىز بايلانىستا جۇمىس ىستەۋىنىڭ مىسالى – وسى ءىس-شارا. ءار بالا – ءبىزدىڭ جارقىنىمىز» دەپ, ۇجىمنىڭ العا قويعان ماقسات-مىندەتىن قىسقاشا ايتىپ بەردى. مەكتەپ قامقورشىلارىنىڭ توراعاسى نۇرلان الجانقۇلوۆ: «بالاسىن ويلاعان مەملەكەت, قوعام – بولاشاققا قام جەيدى دەگەن ءسوز. ءبىز «Jarqyn» سمارت مەكتەبىن قۇرامىز, اشامىز دەگەندە, وسى يدەيامىزعا سەنگەن ازاماتتار, مىنە, ءالى دە جانىمىزدا. پرەزيدەنتىمىز ۇلتتىق قۇرىلتايدا جاس ۇرپاق تاربيەسىنە, بىلىمىنە, ءتىپتى قانداي كىتاپ وقيتىنىنا دەيىن نازار اۋدارۋدى قاتاڭ تاپسىردى. «Jarqyn» – جاس پەداگوگتەردىڭ ءارى ىزدەنىس, ءارى تاجىريبە الاڭى. ولار ءار وقۋشىنىڭ قاي سالاعا بەيىمىن ەرتە اڭعارىپ, سونى دامىتۋعا كۇش-جىگەر جۇمساپ وتىر. سمارت – اقىلدى دەگەن ءسوز. بۇل اقىل عىلىممەن, سونداي-اق سپورتپەن, ونەگەلى تاربيەمەن ارتادى. اتا-انالارعا دا ەرەكشە ريزاشىلىعىمدى جەتكىزەمىن!», دەدى.
تانىمدىق مادەني ءىس-شارادا ەلوردانىڭ بىرنەشە مەكتەبىن باسقارعان ەڭبەك ارداگەرى, ءماسليحاتتىڭ ەكس-دەپۋتاتى ز.ءجۇسىپوۆا, تەحنيكا عىلىمدارىنىڭ دوكتورى, پروفەسسور ءا.بايدىبەكوۆ, فيلولوگيا عىلىمدارىنىڭ دوكتورى, پروفەسسور د.مىقتىبەك, قازاقستاننىڭ ەڭبەك سىڭىرگەن قايراتكەرى, ءانشى ق.ماقانوۆ, مەكتەپتىڭ اتا-انالار كەڭەسىنىڭ توراعاسى ب.شويبەكوۆ ءسوز الىپ, استاناداعى باعىتى ەرەكشە مەكتەپكە ءسات-ساپار تىلەدى. پەداگوگ زاۋرە عيناياتقىزى: «Jarqyn» مەكتەبىنىڭ اياق الىسى ءبارىمىزدى قۋانتىپ وتىر. ءۇش جىل از دا, كوپ تە ەمەس. ەڭ باستىسى, ناتيجە بار. ا.بايتۇرسىن ۇلى «بالاعا كوپ ۇيرەتەم دەپ اسىقپاي, از دا بولسا انىق, ناقتى ۇيرەتۋ ابزال» دەگەن. ۇجىم شاعىن بولسا, بارلىق ءپاندى ۇيرەتۋ, بالانى جاقسى تاربيەلەۋ ايقىن جۇزەگە اسادى. «Jarqyn» وسىنى كورسەتىپ وتىر», دەدى.
وسىناۋ ءىس-شارانى وقۋشىلاردىڭ ءوزى جۇرگىزىپ وتىردى. سونداي ونەرپاز ۇل-قىزداردىڭ مۋزىكالىق تارتۋى, دومبىرا وركەسترىنىڭ كۇي شاشۋى, ءتۇرلى سپورتتىق ونەر ۇلگىلەرى «Jarqyn» سمارت مەكتەبىنىڭ جان-جاقتى ەكەنىن كورسەتتى.
باقىتجان ايدارحان ۇلى
