فوتو: استانا اكىمدىگى
بۇل اپتا ء«مولدىر بۇلاق» دەپ اتالادى, ونىڭ بارىسىندا سۋ ايدىندارى – وزەندەر مەن كولدەردىڭ اينالاسى قوقىستان تازارتىلادى. ەكواكتسيا اياسىندا يندۋستريالدى پارك كاسىپورىندارىنىڭ 300-دەن استام قىزمەتكەرى ينۆەستيتسيالار جانە دامۋ باسقارماسىمەن بىرلەسىپ, استانا قالاسىنىڭ كاسىپورىندارىمەن بىرگە اقبۇلاق ارناسىن قوقىستان تازارتتى.
ەكواكتسيا اقبۇلاق وزەنىنىڭ بويىندا جۇرگىزىلدى. اقبۇلاق – ەلوردا تۇرعىندارى دەمالاتىن جانە سپورتپەن شۇعىلداناتىن ورىنداردىڭ ءبىرى.
«كەڭەسە كەلە ءدال وسى ورىندى تاڭدادىق. تۋىستارىمىزبەن سەرۋەن قۇراتىن سۋ ارناسىنىڭ اينالاسى تازا بولعانىن قالايمىز. بۇگىن ەكواكتسياعا ءتۇرلى كاسىپورىندارداعى ارىپتەستەرىم قاتىسىپ جاتىر جانە تاڭەرتەڭنەن باستاپ ءبىز اقبۇلاق ارناسىنىڭ اۋماعىن قوقىستان تازالاپ جاتىرمىز», دەدى كاسىپورىن قىزمەتكەرى اسىل رىسپاەۆ.
ونىڭ ايتۋىنشا, مۇنداي ەكواكتسيالار تۇراقتى نەگىزدە جۇرگىزىلەدى. ەكواكتسياعا قاتىسۋشىلار ساناۋلى ساعاتتا وزەننىڭ اينالاسىن تازالاپ, بىرنەشە قاپ قوقىس جيناپ, تازالىققا ۇلەس قوستى.
ەستەرىڭىزگە سالا كەتەيىك, ەكواكتسيا باستالعاننان بەرى كاسىپكەرلىك نىسانداردىڭ 5 مىڭنان استام وكىلى – كاسىپورىندار, شاعىن جانە ورتا بيزنەس سۋبەكتىلەرى, ساۋدا ورتالىقتارى, سالوندار, كافەلەر, دۇكەندەر, باسقا دا جەكە كومپانيالار مەن ۇيىمدار ءوز وبەكتىلەرىنە ىرگەلەس اۋماقتاردا تازالىق ورناتتى.
سونىمەن قاتار اكىمدىك ەلوردالىق كاسىپكەرلەر ءۇشىن جىل بويى تازالىق پەن ءتارتىپتى ساقتاۋ بويىنشا ۇسىنىستارى بار چەك-پاراقتار ازىرلەدى. ۇسىنىستار جىل مەزگىلدەرىنىڭ ەرەكشەلىكتەرىن ەسكەرە وتىرىپ وزگەرەدى. سوندىقتان ولار ءتورت فورماتقا بولىنەدى: كوكتەم, جاز, كۇز جانە قىس.
